بدون عنوان(no name)

[A7medelfe2y]

دلوقتي انا كنت
الاول كله سامعني
ابو تيشرت احمر الي في الاخر دا معايا والي بيكلم الي جمبه دا ركز معايا الله يكرمك
احنا كل فلوسنا اتحطت في المباني والتشطيب واشترينا تاكسيين حتي الاوبل اتباعت عشان كنا محتاجين تمنها
المهم دلوقتي بيني وبينكوا كدا بس من غير ما حد يقول للحاج انا واقع علي خميره كدا تخشلها سكه 17 او 18 الف تقريبا وكنت عايز اجيب عربيه وتكون بتجري وبتسافر وتقبل النضافه واعتماديه المهم كنت عقدت النيه علي فيات 132 2000 وبعدين شوفت موضوع هنا مع واحد زميلنا في قسم الادا وعنده عربيه حلوه وشكلها جميل هي ليموني كدا واسمه الاستاذ خالد تقريبا المهم الفكره عجبتني وخصوصا اني عندي اتنيني لادا بس تاكسي والاتنين 2107 واحده 2007 والتانيه 2008 والاتنين روسي 1500 كاربيراتير المهم العربيه دي انا حافظها مسمار مسمار بس معييش اجيب زيهم ولو معايا 30 او 35 مش هجيب لادا اصلا المهم دلوقتي (والنبي ياجماعه حد يطلع ابو نضاره الي ورا دا حاسس انه مش طايقني كدا) نرجع تاني فكنت بفكر اجيب لادا الي هي التمانينات دي بس انا معنديش عنها اي معلومات فلو جبت واحده مثلا ب14 مثلا واتبقي معايا 4 ولا حاجه اجيب موتور 1500 او 1600 واجيب فتيس سريع 5 غيار واجيب كارونه زي الي عندي في التاكسيات مع كسوه حلوه وسمكره وبويه وكل دا طبعا علي خطوات مش مره واحده لاني هحتاج تكمله علي الي معايا وممكن كمان طاقم جنوط وفوانيس وشبكه واكصدامات 2107 وتابلوه نضيف غير بتاعها وياريت لو حد عنده معلومات عن امكانيه تركيب التكييف فيها هل هيبقي اعتمادي وهيتكلف كام وكفائته قد ايه ويقارن بالحديث من نوعه ولا لا وتأسيره علي الموتور في السحب والسخونه والعمر الافتراضي وينفع اشغله علطول ولا مش هينفع ؟
كل دي اسئله يالريت الاقي اجابه عليها
هل بقي الي هعمله دا احسن ولا اجيب 132 احسن
بس ياريت نخلينا في العربيتين دول تحديدا
وجزاكم الله كل خير وياريت الرد لو تكرمتم
ومش هينفع استني واحوش لغايه اما اوصل 25 او 30 عشان اجيب حاجه احسن لاني عايزها النهارده قبل بكره

[A7medelfe2y]

يانهار ابيض علي مدي التجاهل الموضوع بقاله دقيقه ونص ومفيش ولا كومنت
ده تسيب

[ahmed_h_g]

يعني عامل موضوع من غير عنوان ومستعجل كمان :)
أصبر وربنا يوفقك للخير

[عصام غنايم]

بص انا مش هقدر افيدك فى موضوع الادا بتاعك ده

بس اهو بعملك جو

يعنى حد شاف الموضوع ورد عليك بدل منفسيتك تتعب

أيد عندك الجميله دى بقى

يلا ربنا يوفقك الى ما فيه الخير ليك

[velkouf]

اختيار موفق اللادا عربية قوية متينة وسعرها معقول
وممكن تروشها وتعدل فيها زى مانت عاوز زاقتصادية فى البنزين
انما 132 2000 استهلاك بنزين عالى ضريبة عالية
ربنا يوفقك

[truss]

و انا صغير شوية كان معانا 132 مو 79 2000 سى سى, و واحد صاحبى كان معاه لادا مو 2006 و سوقتها قبل كدة:
1- لادا اتقل كتير فى سواقتها من 132 (ال 132 فعلاً ناعمة و خصوصاً ان فيها باور).
2- موتور ال 132 اشد من لادا و لو موتور مظبوط فعلاً عربية بتاعت جرى (موتور 2000 - 2 كامة).
3-فى الثبات اعتقد 132 احسن.
4- بالنسبة للتكييف, عمّى كان معاه زمان 132 فيها تكييف و كان شغال, لادا عمرى ما جربتلها تكييف و عموماً عشان تركب تكييف لازم الموتور يكون مظبوط و الحرارة عندك تمام.
5- 132 شكلها فى رأيى احلى و بيليق عليها التعديلات اكتر.

[ابو لؤى]

و انا صغير شوية كان معانا 132 مو 79 2000 سى سى, و واحد صاحبى كان معاه لادا مو 2006 و سوقتها قبل كدة:
1- لادا اتقل كتير فى سواقتها من 132 (ال 132 فعلاً ناعمة و خصوصاً ان فيها باور).
2- موتور ال 132 اشد من لادا و لو موتور مظبوط فعلاً عربية بتاعت جرى (موتور 2000 - 2 كامة).
3-فى الثبات اعتقد 132 احسن.
4- بالنسبة للتكييف, عمّى كان معاه زمان 132 فيها تكييف و كان شغال, لادا عمرى ما جربتلها تكييف و عموماً عشان تركب تكييف لازم الموتور يكون مظبوط و الحرارة عندك تمام.
5- 132 شكلها فى رأيى احلى و بيليق عليها التعديلات اكتر.

بسم الله ماشاء الله منظر الصوره اللى فى توقيع حضرتك تحفه بجد سبحان الله

[truss]

بسم الله ماشاء الله منظر الصوره اللى فى توقيع حضرتك تحفه بجد سبحان الله

شكراً لحضرتك
الصورة دى فى الطريق الصحراوى الشرقى فى الصعيد, بين المنيا و أسيوط

[A7medelfe2y]

بردوه لسه الموضوع مش محسوم مع اعطاء كل ذي حق حقه فكل الشكر لمن ساهم برد ولو بكلمه
بس لسه بردوه انا مستني واحد جينيس يكون ركب الاتنين ويجبلي كل حاجه عنهم ويختارلي الاحسن