ال 128 تاعبانى

[bahaaothman]

عربيتى 128 1300cc موديل 98 لسه شاريها من اسبوعين

المشكله ان دى اول عربية فى حياتى وانا ماعنديش خبرة ومش عارف اتعامل معاها ازاى لما تعطل

طبعا انا عشان لسه جديد وكده فالعربية ممكن تبطل منى لو الطريق زحمة وبيقف كل شوية بس المشكله انها لما تبطل مابتدورش تانى ولازم استنى عليها ربع ساعة عشان ترضى تدور

الكهربائى قالى البطارية تمام والعربية تمام وان العيب ده ممكن يحصل عادى ومالوش حل بس ممكن تركب كتاوت تقوية للمارش عشان مايحصلش تانى

رحت ركبتها والعربية مشيت حلو يومين ورجعت لنفس الموضوع تانى

انا مش عارف اعمل ايه وساعات بتعملها معايا فى اماكن بايخة فى طريق ضيق او على كوبرى

ارجوكم ايه الحل انا تعبت

شكرا

[Mohamed-Saoud]

تقريبا الكلام اللي ذكرته ده في كل 128 في مصر :)
أكشف على "المارش" و لو بايظ صلحه عند واحد شاطر علشان مايخربش تاني بسرعه...

[sab3aawy]

غالبا العربية بتشرق

غير طقم بيكات للكاربراتير واكشف على الأكس والباب بتوعه، ولو الكاربراتير تعبان غيره كله، مع تغيير البوجيهات بأخرى جديدة (شامبيون او دنسو، شمعة واحدة)

[hazem_khidr]

او ممكن تكون العربيه بتسخن تعمل كده
و لما تبرد تدور تاني

[trablla]

شوف ياباشا اولا لازم تكشف على العربيه كويس طالما لسه جايبها
وفى البدايه الف مبروك عليك

انا معايه نفس العربيه بس موديل 97 وعليك بالآتى

تروح عند ميكانيكى شاطر تقوله اكشفلى على الكربراتير ولو مش عايز اكشف انت واليك الطريقه

تشوف العربيه بتعمل قد ايه فى بنزين 90 لو ازيد من 175 يبقى تمام والكربراتير كويس
ولو اقل يبقى لأ
تانى حاجه
تخلى حد يوقف ورا العربيه وزود بنزين جامد لو طلعت دخنه سودا يبقى الكرابتير مش سليم
لو عادى وخفيف يبقى ميه ميه .

صحيح لو بايظ عليك وعلى ابراهيم بتاع شبرا

----------------------------

تانى حاجه
تروح تغير طقم سيرفيس يعنى بواجى وابلاتين وكوندنسر
واستنضف ومش تتسرخص

------------------------

تالت حاجه تغير سير التايمنج بتاع الموتور

------------------------

رابع حاجه جرب وقولى وان شاء الله هتلاقيها ميه ميه

وصحيح لو خايف تكون ييتسخن ازازه ميه خضرا هتلاقى العربيه بقت تلاجه
سعرها تمنيه جنيه اتقريبا

ربنا يوفقك ولو عزت حاجه قولى

[bahaaothman]

متشكر جدا يا جماعة حاجة جميلة الواحد يحس ان الناس حوليه

رحت امبارح للميكانيكى قالى هعليلك البنزين عشان متبطلش فى السلانسيه وعمل حاجة كمان كده حط حتة كاوتش فى مكان تحت الموتور قالى عشان بترعش وقالى غير الرادياتير عشان وحش وزود زيت الفتيس وفعلا رحت زودته

المهم النهاردة مشيت بالعربية كانت كويسة جدا وانعم من قبل كده والحمد لله مابطلتش منى بس لما وصلت وانا بركن بطلت منى وماشتغلتش بعد كده وطبعا انا كملت بقية الركنة زق. الغريب ان العربية ساعات تبطل وتشتغل عادى وساعات تبطل وماتنطقش

ماعتقدش ان السبب سخونة لان العربية بتعمل كده وبيكون مؤشر الحرارة فى النص او قبل كده يعنى مش سخنة

انا لسه مش عارف اعمل ايه هاروح اكشف عالكربراتير واشوف ومش عارف اغير الحاجات دى كلها ولا ايه (بواجى وابلاتين وكوندنسر وسير التايمنج بتاع الموتور) مع انى مش عارف الحاجات دى يعنى ايه

وهى ايه المية الخضرا دى وبتجاب منين

شكرا

[R A N A]

متشكر جدا يا جماعة حاجة جميلة الواحد يحس ان الناس حوليه

رحت امبارح للميكانيكى قالى هعليلك البنزين عشان متبطلش فى السلانسيه وعمل حاجة كمان كده حط حتة كاوتش فى مكان تحت الموتور قالى عشان بترعش وقالى غير الرادياتير عشان وحش وزود زيت الفتيس وفعلا رحت زودته

المهم النهاردة مشيت بالعربية كانت كويسة جدا وانعم من قبل كده والحمد لله مابطلتش منى بس لما وصلت وانا بركن بطلت منى وماشتغلتش بعد كده وطبعا انا كملت بقية الركنة زق. الغريب ان العربية ساعات تبطل وتشتغل عادى وساعات تبطل وماتنطقش

ماعتقدش ان السبب سخونة لان العربية بتعمل كده وبيكون مؤشر الحرارة فى النص او قبل كده يعنى مش سخنة

انا لسه مش عارف اعمل ايه هاروح اكشف عالكربراتير واشوف ومش عارف اغير الحاجات دى كلها ولا ايه (بواجى وابلاتين وكوندنسر وسير التايمنج بتاع الموتور) مع انى مش عارف الحاجات دى يعنى ايه

وهى ايه المية الخضرا دى وبتجاب منين

شكرا

بص حضرتك الحاجات دي (بواجى "اللي هيا البوجيهات" وابلاتين وكوندنسر وسير التايمنج بتاع الموتور "اعتقد ان ده سير الكاتينة بس مش متأكدة بس لو مش هو برده لازم تغير سير الكاتينة ده عشان له فترة استخدام وبيبوز بعدها) كل الحاجات دي يطلق عليها اسم طقم سرفيس اوسرفسة بلغة الميكانيكية ودي حاجات بتتغير اول مابتجيب العربية لان حضرتك بتغيرها وتعد عليها بعد كده كيلوات انت مشيتها عشان تبقي عارف هي استُهلكت ولا لأ باستخدامك انت.
بالنسبة للمياه الخضرا دي انا سمعت ان لو الرادياتير مش كويس يعني ملحم كتير وحالته محتاجة تتغير يبقي المياه الخضرا هاتبقي زي قلتها فالافضل تكشف علي الرادياتير الاول ولو محتاج تغيير غيره بس هات واحد نضيف والناس هنا ممكن تفيدك منين وبكام تجيبه
وبعد ماتركب الرادياتير ابقي اشتري الميه الخضرا دي من اي بنزينة او ممكن تلاقيها عند بتوع الرادياتيرات نفسهم .
الميه الخضرا دي بقي مضاف اليها مواد معينة فيها خواص تبريد يعني افضل من الميه العادية عشان قدرتها علي التبريد اسرع بكتير وكمان بتبقي معاجة ضد الصدأ يعني متخليش اي جزء في دورة المياه يصدي بسرعة وكمان اسمع انها مش بتتضاف كل يوم زي الميه العادية لا دي بتتحط علي فترات وبتحافظ على عدم سخونة الموتور وبرده لو العربية بتسخن جامد اكشف على طرمبة الميه لان عربيتي سخنت مني مرة ومع الاسف مؤشر الحرارة كان عطلان وقتها عشان في فيوز ضرب فمحستش انها سخنت ولاقيتها وقفت ومرضيتش تدور خالص روحت وديتها لميكانيكي لاقي طرمبة المياه كلها مصدية ومبتهدله وبايزة فغيرتها كلها واشتريت واحدة الماني نضيفة اوي.
بس الاول روح عن ميكانيكي وخليه يغير طقم السرفيس الاول واكتب في نوتة كده غيرت ايه عند كام كيلو عشان لما الكيلوات تخلص تعرف امتي تغير كل حاجة في وقتها.

[Mohamed-Saoud]

يعني هو الرادياتير يتغير بس لما تلاقي العربية بتسخن منك و تنور العلامة الحمراء بتاعة السخونة في التابلوه كل ما تروح مشوار طويل... غير كده يبقي الرادياتير شغال كويس و بالمره لو غيرته يبقي غيره لراياتير ألماني 3 ماسورة فرز أول (أصل أنا لسه عامل الحكاية دي قريب علشان سخونة العربية :))

أنا الصراحة مش عارف ايه علاقة المشكلة بتاعتك بالرادياتير :) :)

[HATEMHANY]

سؤال ؟؟؟ العربيه لما بتبطل و تحاول تدورها تانى بتبقى عماله تحاول تدور و مش بتلقط ولا ملهاش صوت خالص ؟

يعنى بتعمل صوت زى صهيل الحصان كده ولا مفيش اى استجابه خالص

لو الاختيار الاول يبقى بوجيهات و طقم كهرباء

لو الثانى يبقى البطاريه نايمه او اسلاكها مفوته و مش بتوصل كويس او بتلمس
او الدينامو مش بيشحنها اصلا

لو بتلقط و تفصل يبقى كاربيراتير مش نضيف

انت بتحط بنزين ايه ؟؟

[ahmedabdelhamid]

انا معايا 128موديل90 بتعمل نفس الحركة روحت للكهربائى قالى الاتوماتيك بتاع المرش وراح علمل سلكة تقوية مشيت بيها كدة حوالى اسبوعين زى الفل بس دلوقتى رجعت تانى كلمت الكهربائى والى تعالى بكرة نركب كتاوت لما اشوف هيحصل اية بكرة على فكرة لما تبطل وتعمل الحركة دية واجى ادورها مفيش صوت خالص بيطلع كائن البطرية ماتت ومع اى زقة صغيرة تدور بس الواحد تعب من الزق والبهدلة على فكرة البطارية جديدة يعنى عيب مرش وربنا يستر بكرة

[ahmedabdelhamid]

انا كدة جبتلك من الاخر عشان محدش يفتى فيها وعلى فكرة المرش استعمال عامل 150

[bahaaothman]

المشكله يا جماعة اكبر من كده

اول مرة العربية عملت كده استنيت 10 دقايق واشتغلت
تانى مرة كان معايا واحد بيفهم شوية قالى تعالى نزق قعدنا نزق كتير جدا والعربية مابتنطقش خالص وراح هو يدور على كهربائى وعلى ماجه جينا نشغل العربية اشتغلت من اول مرة

وده اللى خلانى الاحظ انها مش مشكلة بطارية ولا مارش انا لو استنيت على العربية 10 دقايق هتشتغل من اول مرة بس المشكله فى العطله

واضح ان فى حاجة بتحصل ولما باستنى على العربية شوية الحاجة دى بتكون راحت

وعلى فكرة مش كل ماالعربية تبطل تعمل كده لا ساعات وساعات

انا احترت فى العربية دى مابقتش اثق فيها ولما اوديها لميكانيكى او كهربائى ونجرب ندورها ونبطلها 100 مرة بتشتغل زى الفل

فى سواق قالى ده بيحصل لما بتدوس بنزين اوى وانت لسه بتدور العربية والمشكله دى مالهاش حل

مش معقول مافيش حل لو حتى فى طريقة اعرف ادور بيها العربية من غير المفتاح خالص يبقى كويس المهم يبقى فى حل او هاضطر ابيع العربية دى عشان زهقت منها

شكرا

[Nader]

اكشف هلى الموبينة، الموبينا ساعات لما بتبوظ مش بتشتغل

غير لما تبرد.

[maka]

اكشف هلى الموبينة، الموبينا ساعات لما بتبوظ مش بتشتغل

غير لما تبرد.

+111111111

لما تعمل كده حاول تبرد الموبينة بفوطة مبلولة شوية ودور وشوف

هتشتغل ولا لا

[ahmedabdelhamid]

انا زى ماقولتلك الاوتوماتيك بتاع المارش لما بيسخن بيعمل كدة حاول تغير الاتوماتيك وانا زيك بالظبط لما روحت للكهربائى فضلت ادور واطفى مليون مرة مبطلتش ولما اروح مشوار وركنها اجى ادور مترداش تدور لدرجة اني صورتها بالموبيل عشان الكهربائى يشوفها عشان يصدقنى عشان ادامة بتدور عادى وهى فعلا ساعات تعمل كدة وساعات لا حسب المزاج مثلا انهاردة رحت اجيب حجات من السوق ركنت ونزلت ولما رجعت مردتش تدور وحلفلت فضلت مستنى نص ساعة وجرب بردة لالالالالالالا طبعا مفيش فيدة خليت اخويا يزء طبعا هو متعود وفعلن اشتغلت فى سعتها ولما رجعت البيت ركنت وقلت اجرب اشوف هتعمل اية طبعا انتو عرفين الاجابة اية دارت طبعا منا خلصت مشوارى وانا إن شاء الله رايح بكرة الكهربائى اشوف هيعمل اية عشان انا تعبت من العربية دية