برجاء الافادة فى موتور الريجاتا

[yassereiad]

السلام عليكم
ارجو افادتى من الخبراء انا اشتريت ريجاتا 85 مو 85 من صديق لى فى العمل وهو كان لسة مغير الموتور باخر استيراد لكن اتضح انة موتور 128 1300cc فهل هناك اى مشاكل بخلاف ان موتور الريجاتا 1500 واشد من موتور ال 128 فى السحب علما بانها بدون تكييف وهل بودى العربية تقيل على الموتور مع ان مشاويرى بسيطة ولا احتاج القوة فى الاداء وكمان الموتور موفر بنزين
سؤالى اسيب الموتور ولا اركب واحد 1500

شكرا للافادة

[MohabSaeed]

حرام عربيه رجاتا يركب فيها موتور 128
الى اعرفه ان ناس كتير معاها 128 بيركبولها موتور ريجاتا 1500 مش العكس .
طبعا حضرتك ليك الحق انك ترجع العربيه لصاحبها لو مكونتش تعلم الموضوع ده ,
لو حبيت تحتفظ بيها الاحسن تجيبلها موتورها ال1500 بتاع الريجاتا .
ديه وجهة نظرى

[Lord of the flies]

حرام عربيه رجاتا يركب فيها موتور 128
الى اعرفه ان ناس كتير معاها 128 بيركبولها موتور ريجاتا 1500 مش العكس .
طبعا حضرتك ليك الحق انك ترجع العربيه لصاحبها لو مكونتش تعلم الموضوع ده ,
لو حبيت تحتفظ بيها الاحسن تجيبلها موتورها ال1500 بتاع الريجاتا .
ديه وجهة نظرى

+1000000000000000000

[ahmedsrs]

فعلا موتور الريجاتا انعم وانضف من موتور 128 رجع العربية لصاحبها لأن ده غش وتدليس او يجب موتور ريجاتا على حسابه وتديله موتور 128 يتصرف فيه
ملحوظة ( لو كان عندك علم قبل شراء العربيه بالموضوع ده يبقى يبقى الحال على ماهو عليه)

[sab3aawy]

كان فيه ريجاتا فى ايطاليا بموتور 1300 لكنه برضه يفرق شوية عن موتور ال128 ال 1300(الموتورين شبه بعض تماما من برة ومن جوة و 90% من قطع غيارهما مشتركة لكن مع بعض الفروق الطفيفة جدا مثل شكل غطاء التاكيهات وشكل الاسبراتير وشكل كوعة المياه وبعض التفاصيل الصغيرة)

موتور الريجاتا 1300 اسمه 138-a3-000
75 حصان

وموتور ال 128 ال 1300 اسمه 128-a1-000
65 حصان

الكاربراتير مختلف، الريجاتا 2 باب وال128 باب واحد بس وبالتالى المانيفولد برضه مختلف

مشوار المكبس واحد فى الموتورين (55.5 مللى) وقطر المكبس تقريبا واحد(فرق اقل من1/2 مللى فقط لصالح الريجاتا ،84.4 مللى للريجاتا و 84 مللى لل 128

ولذلك فالفرق الاساسى بين القدرات الحصانية للمحركين يكمن اساسا فى الكاربراتير، لو انت عايز تاخد ال75 حصان كاملة من الريجاتا ممكن تجيب للمحرك كاربراتير ريجاتا 2 باب بالمانيفولد وسلك الاكسراتير بتاعه، لو هى راكب فيها الكاربراتير القديم بتاعها يبقى كدة انت واخد من الموتور ال1300 اقصى ما يمكن ان يعطيه لك، وبما ان الريجاتا كانت بتشتغل بمحرك 1300 من الفابريكة يبقى مفيش مشكلة اطلاقا، انا معايا ال1500 ومتورها خفيف ومع كدة حاسس انه شديد جدا عليها، يبقى ال 1300 بحالة جيدة مش هيكون وحش عليها لو راكبلها كاربراتير 2 باب

ده طبعا فيما يخص الناحية الفنية فىالموضوع، اما فيما يخص الناحية الاخلاقية فالجميع هنا غطوها وبالتالى معنديش جديد اضيفه

[yassereiad]

شكرا ليك MOHAB SAEED انا مكنتش اعرف ان الموتور 1342 CC وكذلك هو ميعرفش
هو اشتراة على انة موتور ريجاتا
شكرا ردك LORD OF THE FILES والاستاذ اAHMEDSRS اناشاكر مشاركتك
اما مهندسنا الكبير ا سبعاوى فانا كنت فى انتظار ردك العلمى وكانى فى محاضرة ايام كلية الهندسة انا مهندس اتصالات اعشق الردود المفصلة المبنية على اساس علمى
انا عوز اعرف حاجة الموتور اللى راكب مكتوب على ال body 1342 فهل دة موتور 128 ولا ريجاتا استيراد ؟
فى سؤال تانى بعد اذنك العربية فيها مشكلة عفشة من الخلف اسمع صوت كان اسطوانة فارغة موجودة فى الشنطة هو قالى ان القنطرة عاوزة تتغير انا مش فاهم يعنى اية قنطرة وكمان فى سمكرى قالة انة لازم يجيب النص الخلفى كامل لان القنطرة بتتلحم واللحام سوف يفك وترجع تانى تعزف اصوات
انا مش مقتنع ان علشان اضبط العفشة الخلفية اغير نص العربية الخلفى

[أبومعاذ]

شكرا ليك MOHAB SAEED انا مكنتش اعرف ان الموتور 1342 CC وكذلك هو ميعرفش
هو اشتراة على انة موتور ريجاتا
شكرا ردك LORD OF THE FILES والاستاذ اAHMEDSRS اناشاكر مشاركتك
اما مهندسنا الكبير ا سبعاوى فانا كنت فى انتظار ردك العلمى وكانى فى محاضرة ايام كلية الهندسة انا مهندس اتصالات اعشق الردود المفصلة المبنية على اساس علمى
انا عوز اعرف حاجة الموتور اللى راكب مكتوب على ال body 1342 فهل دة موتور 128 ولا ريجاتا استيراد ؟
فى سؤال تانى بعد اذنك العربية فيها مشكلة عفشة من الخلف اسمع صوت كان اسطوانة فارغة موجودة فى الشنطة هو قالى ان القنطرة عاوزة تتغير انا مش فاهم يعنى اية قنطرة وكمان فى سمكرى قالة انة لازم يجيب النص الخلفى كامل لان القنطرة بتتلحم واللحام سوف يفك وترجع تانى تعزف اصوات
انا مش مقتنع ان علشان اضبط العفشة الخلفية اغير نص العربية الخلفى

حاول تصور الموتور عشان نقدر نحدد اذا كان بتاع 128 ولا ريجاتا
موضوع ان القنطرة مقطومة اعتقد خطر و لو غيرت القنطرة العربية تعتبر رشة دواخل ولو غيرت النص الخلفي نفس القصة