بونتو 95 حكاية معاناة

[mohamed nemo]

بسم الله
اولا دي مش اول عربية بونتو اجيبها كانت معايا واحدة قبل دي مو 94 كان فيها مشكلة ف السخونية و بعد دوخة و تغيير جوانات و ريداتير و كل حاجة متحلتش روحت بعتها و جبت بونتو مو 95 تاني للاسف
بدأت المشكلة ان العربية لما بتمشي سلانسيه و هي واخده غيار يعني واخده غيار و ش دايس بنزين .. تنتش تنتيشة بسيطة اوي .. انا اتعفرت روحت للاسطي شوقي ف شامبليون جنب الكيلاني قالي دي سلك بوجيهات و قديم و مش عارف غيرت السلك .. لسة التنتيشة زي ما هي .. و الاسوء من كدة انها بقت تنتش و انا طالع تنتيشة فظيعة ممكن تخبطني ف الازاز .. و لمبة التشيك تنور .. قولت اكيد السلكة اللي راكبهالي بايظة روحت غيرتها و حطيت القديمة .. و استمرت المشكلة هي هي بالاسوء
بسبب التنتيشة دي واير التعشيق بتاع عصاية الفتيس اتقطع و غيرته ف النص كدة و اتكلف مبلغ خرافي 500 جنيه و 50 جنيه تركيب
نرجع للتنتيش
اكتشفت مع الوقت ان لما العربية بتسخن التنتيش بيروح فضلت كدة اسبوع بسخنها كويس قبل ما امشي ..
ف يوم بقا جيت ادور العربية مبتدورش .. مفيش كهرباء واصلة للموبينة .. غير حساس كرنك .. مبتدورش .. يبقي كنترول هو اللي كان عامل المشكلة غيره و هتخلص ان شاء الله .. الاول بدل ما اغيره روحت اصلحه بردو مدورش العربية .. روحت جايب واحد اجربه العربية دارت .. تمام زي الفل دارت بس الموتور يعلي و يوطي rpm مبيثبتش ابدا و لما اكبسلها جامد و اسيب تبطل
لا دة اكيد ايدل .. هات ايدل جربه مفيش .. هات حساس بوابة جربه مفيش نفس القصة .. الكلام دة طبعا لما بكشف عليها بالكمبيوتر .. غير الكنترول تاني غيرته ظبطت موضوع ال rpm و رجعت الحساسات اللي جبتها ..
المشكلة اللي ظهرت ف الكنترول الجديد دة ان العربية مبتسحبش تيجي عند rpm 2 و تقف ماهما تدوس بنزين .. اروح دايس دبرياج و بنزين عشان اعليها و اسيب دبرياج .. تخيل كدة ف كل نقلة
في خلال ذلك القرف رجع موضوع التنتيش اول ما ركنتها يومين و دورتها .. تنتش و تدي مدافع و تلزقني ف الازاز .. كلمت ميكانيكي كان شغال ف اوماترا .. قالي هعملهالك دة فقر بنزين .. غيرلي حساس البوابة و ظبطت ف يومها لكن تاني يوم نفس المشكلة
فاض بيا بقا قولت هغير الكنترول تالت و هجيب بوابة كاملة و عملت كدة بالفعل .. نفس القصة بالظبط
روحت للكمبيوتر تاني قالي انا زهقت غير حساس الكرنك ... غيرته تاني ظبطت ف يومها و اليوم اللي بعديها .. و سافرت اسبوع و جيت امشي بيها بتنتش بردو و لمبة التشيك بتنور
==========================
انا طولت عليكو اوووووووي بس لو حد عنده حل و حاجة تاني اغيرها :D يقولي

[Mr.Lawyer]

لا حول ولا قوه الا بالله العظيم ، فعلاً العربيات المستعمل دى عامله زى البطيخه ومهما جبت حاله نضيفه ودفعت فلوس زياده هتكتشف فيها العجب ولازم تروح للصنايعيه

ان شاء تلاقى حل لمشكلتك فى اسرع وقت وبأقل التكاليف لان واضح ان حضرتك استويت وان شاء الله خبراء الفيات هيردوا عليك بالمفيد

بس انا ليا عتاب على حضرتك ليه بعت القديمه واشتريت نفس النوع والموديل تانى ، ليه محاولتش تغير لنوع تانى او موديل تانى ولا حضرتك بتحب العربيه وغاوى الموديل دا ؟!! مجرد استفسار

[mohamed nemo]

و الله يا استاذي بعت الاولانية عشان كنت هصرف عليها حبة حلوين بتاع 5 او 6 كدة فقولت ابيعها و اجيب حاجة تانية حالتها احسن .. بالفعل اول ما جبت دي كانت حالتها كويسة بس قعدت 3 شهور بس و بعد كدة كل الكلام دة حصل
ثانيا ليه جبت نفس العربية .. عشان ايطالي مش كوري ورق .. و هي عربية كويسة و يعيبها ان قطع غيارها غالية بس معمرة .. العيب الخطير اللي مكنتش اعرفه فيها ان محدش بيفهم فيها
بص بالفلوس اللي كانت معايا هي دي العربية الكويسة من بين .. كيا برايد و هيونداي اكسل و سيات ابيزا و فورد اسكورت

[Mr.Lawyer]

و الله يا استاذي بعت الاولانية عشان كنت هصرف عليها حبة حلوين بتاع 5 او 6 كدة فقولت ابيعها و اجيب حاجة تانية حالتها احسن .. بالفعل اول ما جبت دي كانت حالتها كويسة بس قعدت 3 شهور بس و بعد كدة كل الكلام دة حصل
ثانيا ليه جبت نفس العربية .. عشان ايطالي مش كوري ورق .. و هي عربية كويسة و يعيبها ان قطع غيارها غالية بس معمرة .. العيب الخطير اللي مكنتش اعرفه فيها ان محدش بيفهم فيها
بص بالفلوس اللي كانت معايا هي دي العربية الكويسة من بين .. كيا برايد و هيونداي اكسل و سيات ابيزا و فورد اسكورت

ان شاء الله تتصلح وتبقى احسن من الاول وللاسف المستعمل كدا بيبان قرفه بعد فتره ، بس اهم حاجه يا ريت متخليش اى ميكانيكى يمد ايده فيها عشان اللخبطه اللى حصلت والعك دا ، فياريت تدور على ميكانيكى متخصص ف العربيه فى محيط سكنك ، حتى لو بعيد روح له واسمع منه ، اقتنعت خليه يشتغل مقتنعتش ، شوف غيره ، وبأذن الله تلاقى حل لمشاكلك ، لانى برده حصلت معايا حبه مشاكل وسمعت احلى عك من الميكانيكيه لحد ما اتصلت بصاحب العربيه وقالى ع الميكانيكى اللى كان متابع معاه وروحتله وطلع الموضوع هايف واتحلت المشكله

[mohamed nemo]

تمام شكرا يا باشا

[ahmedyousryk]

بص كان عندنا مشكلة فى العربية انها بتترجرج وتنتش وساعات اة وساعات لا قعدنا نغير البيجوهات والفلاتر والقصص دية فى الاخر طلع فية خرطوم هوا فية شق صغير جدا بيسرب الهوا واتغير ب 3 جنية وكل المشاكل اتحلت .
العربية مش فيات اساسا بس بقولك عشان ممكن فى الاخر يطلع حاجة بسيطة الى عاملة دة كلة

[m.tito]

أولآ حضرتك عليك لوم ازاى يكون معاك بونتو 94 قبل كدة ، وتيجى تشترى بونتو 95 تانىمن غير ما تقلب فى العربية كويس وتطلع كل العيوب اللى فيها وتكشف عليها صح مفروض انك خبير فى البونتو من بعد تجاربك فى العربية القديمة ، بس معلش
حضرتك دلوقتى لازم اول حاجة تعملها تروح تكشف كمبيوتر عند حد محترم ونضيف وفاهم ، فى المهندس / ماهر عنده جهاز كشف بتاع فيات الاصلى عنوانه فى شارع ترسا - الهرم والكشف ب 100 جنية ، بس بيكشفلك على العربية صح الحساسات كلها والكنترول ويشوفلك اية اللى بيخلى العربية تبرجل كدة ، انا مش عارف انت كنت بتكشف فين قبل كدة والجهاز اية اللى بتكشف عليه فيات والا جهاز تانى ، عشان ساعات الاجهزة غير الفيات الاصلى بتطلع حاجات غلط ، انا معايا فيات بونتو 95 زيك ، وبعد ما نعرف ونشوف حوار الكمبيوتر ، فى ميكانيكى نضيف جدآآ فى مصر الجديدة شارع دمشق عشرة على العشرة هيضبطلك العربية صح ويعرفك اية اللى فيها ، والناس اللى بقولك عليها دى عن تجربة ، وحافظين العربية ولما تروح عندهم هتشوف كمية العربيات الفيات بخصوص الفيات الحديث اللى بيشتغلوا فيها ، وربنا يوفقك ، وانا تحت امرك فى اى حاجة

[تامر عصام]

أنا كان عندى نفس المشكلة و لم تنتهى إلا بعدما غيرت الكربراتير بتاعها بس طبعا ممكن يكون السبب عندك مختلف بس لازم تكشف على الكمبيوتر بتاعها اﻷول

[khaled_k21]

الاخ الكريم

مبارك عليك السيارة و بإذن الله يكون عطل بسيط و يتصلح و تببقي احسن اداء

اخي الكريم

مع احترامي للاخوة بس كان في تحذير من الاخوة بخصوص المهندس ماهر اللي في ترسا الهرم

ارجو مراجعه المشاركات و الخبرات لباقي الاعضاء

ثانيا لقد سمعت عن محمد حامد - ميكانيكي - في المطبعه فيصل و هو تخصص فيات و كان في التوكيل طبقا لكلامه و كلام الاخوة الاعضاء

عموما نصيحتي هي انك تدور علي احسن ميكانيكي متخصص و نحط الف خط تحت متخصص و ياريت كمان تسال عن خالد الفا اللي في فيصل اعتقد انه متخصص الفاروميو و فيات

و الله المستعان
اخيك
خالد

[Gelgel2004]

روح للاسطى هانى اللى عند الشيخ على بتاع الفيات بشارع دمشق - مصر الجديدة و ادعيلى