رحلتي مع الغالية لانشيا

[khaled_k21]

السلام عليكم

انا و لله الحمد اشتريت لانشيا عربيه جميله بصراحه و تحس انك راكب سيارة محترمة و مش هاكرر كلام الاخوة الكرام اللي شكروا فيها لكن في خلال الاسبوع اللي عدي عليها كانت التجربه الاتيه :

1 - بعد ما جبتها و حطيتها في الجراج و جيت ادورها تاني يوم لاقيتها رافضه انها تدور
المارش شغال تمام - فلتر البنزين مليان - كهربا واصله - و لانها عملت كده عند صاحبها و هو فاهم فيها جدا لانه عنده اختها بس تيربو و قام بتنظبف السوكت بتاع الطرمبه و اشتغلت لكن الظاهر انها كانت حزينه شويه لانها سابته يمكن !!!!! فكنت عارف مكان العطل فين ( خلاص اتعلمنا )
المهم بعد محاولات كتيره للتاكد انه من الطرمبة سليمه بقياس بالافوميتر و عمل لمبه و توصيلها للسوكت كله تمام و هنا ادركت انه لابد من شراء طرمبة جديده - اتوكلت علي الله و بدات رحله البحث - لاقيت واحده صيني بكام ؟؟؟ 65 جنيه ماعجبتنيش - دورت تاني لاقيت واحده تانيه كوري بـ 155 جنيه – دورت تاني لاقيت بوش الماني متبرشمة بـ 110 و بعد الفصال اخدتها بـ 100 روحت ركبتها و تمام و هووووووووب
المكنه طلعت قماش ( هههههههههههه ) ااقصد اشتغلت بعد جهد جهيد

2- طبعا كان فيه ملحوظات فقررت ان اعرضها علي الدكاترة للاطمئنان علي صحتها الغالية - روحت لاستاذ الفيات محمد حامد في المطبعة ( الراجل محترم جدا و كان شغال في التوكيل اصلا ) كان في ايده عربيتين ( بيترا و اظن سيينا و هو تخصص فيات بس علي فكره و دا شئ رائع طبعا ) فالقي نظره علي السيارة و ابدي اسفة لانه متحولة كربراتير بدل الهاف انجيكشن و قال لقد حولوها الي 128 مع الاحترام الكامل طبعا لكل السيارات – طب يا حج نعمل ايه قال نرجعها واحده واحده لاصلها قولتله ماشي و اداني ميعاد و لانه مش فاضي فقررت اننا نروح لدكتور الاستقبال مؤقتا للاطمئنان برضه مايمنعش !!!!

3- كان الباب اليمين مش بيسك مع السنتر و قولت بالمرة اكشف علي الكهربا و اشوف ايه اللي محتاجه
روحت لاستاذ الكهربا الاسطي وليد في كفر طهرمس سالني ايه الشكوي قولتله نظبط الانوار و نشوف يمكن تكون محتاجه قرصين فيتامين مع حقنه فيوز و الا حاجه قالي تعالي باليل ( ماشي يا دكتور عنينا )


4- روحت محود علي الاسطي عصام عشان يظبطلي الباب ( راجل في قمه الادب ) فك و حل و تظبيط كالون بالظبط كده 25 دقيقه كام يا دكتره ؟ 25 جنيه ( الله يباركلك اتفضل )

5- قولت بقي اروح لدكتور الاستقبال يكشف روحت لمين ؟؟
الاسطي عبد الحليم في ش العطور – راجل هادي و جميل اوي - كان فيه ريحه بنزين اشترينا 6 كوليه خرطوم بنزين تم التركيب و ظبط كربراتير عشان العربيه كانت عاليه سنه و نص ضرس بص علي الحاله العامه كله تمام – طب ايه رايك نرجعها زي ما كانت قالي كده احسن لو عطلت بيك هاتعرف تتصرف !!!! ماااااااااشي
رجلش الهاند بريك – بص علي التيل – كله تمام كام يا حج 25 اتفضل و سلامو عليكم

6- باقي بقي التكييف يا باشا عشان العربيه تتكييف نروح لمين ؟؟؟
م ياسر ( شاب محترم عنده ضمير فاهم جدا لانه كان شغال في توكيل غبور من و هو صغير يعني خبرة تفوق ال 20 سنه و الاهم ان دماغه حلوة مش حافظ و خلاص ) اشحن اكبس شغل نضف الثلاجه بالميه
كام يا باشا ؟ 180 جنيه بس بصراحه ممتاز

الخلاصة بقي :
- نصيحه لكل مالكي السيارات التي تعمل بطرمبة بنزين كهربا – خلي واحده معاك احتياطي لانها روح العربيه و من غيرها العربيه مش هاتتحرك لو جبتلها فرقه حسب الله

- قبل ما تروح لاي صنيعي دور و استشير و اعتقد ان خبرات الاخوة مفيده جدا في المنتدي

- تجرب و تسمع من كل ميكانيكي كلامه و توزنه و بعددين تقرر

- لو هاتروح لصنيعي تكتب كل ملحوظاتك في ورقه و لا تمل من السؤال
و اخيرا منتظر راي الاخوة اللانشاويه و خبراتهم

و حتي تقرير اخر لكم اجمل تحيه و اغلي سلام
اخيكم خالد كمال من فيصل – الجيزة – مصر المحروسة

[hassan_uwk]

مجهود رائع :018a1d~146::018a1d~146::018a1d~146::018a1d~146:
ومبروك العربية وربنا يديك خيرها ويكفيك شرها
بس طبعا الانجكشن احسن وهيرفع اداء الموتور وعدد الاحصنة وهيفرق في السحب كتير

[khaled_k21]

شكرا جزيلا استاذي الكريم للرد و للمرور

و الله انا بقول كده برضه بس سنه سنه بإذن الله و ربنا يعينا

و ربنا يبركلك في سيارتك و يحميك

[M_OSMAN88]

بص يا استاذ خالد انا معايا ديدرا من 6 شهور بس عربية بصراحة سعرها اقل من قيمة العربية وتمن العربية دى فى سنة 1998 كان 112.000 جنية كانت التيمبرا والكريستالة ب 58.000 كانت الانوس 1 ب 35.000 عربية مريحة جدا فى المشى على الطريق تابتة عزلها كويس اوى لما تقفل الزجاج فيها كماليات كويسة .
لو عرفت ترجع الهاف انجيكشن بتاعها هتفرق معاك جامد

[khaled_k21]

و الله يا استاذ محمد هي تحس في ركوبتها في الفرق بينها و بين عربيات تانيه و عندك حق في عزل الصوت بالعكس كمان انت ممكن تعمل عزل في الابواب لان تجاويف الابواب واسعه و ممكن تحط طبقه عزل صوت و حرارة كمان

انا مع حضرتك في انها في كلمه واحده ( سابقه عصرها موديل التسعينات و فيها كماليات مش موجوده في الحديث ) لكن الله يجازيه بقي اللي مش قلل من سعر العربيه لا اللي قلل من قيمتها بانه عاملها معاملة غير محترمه في صيانتها او في انه بيسمع كلام الميكانيكيه اللي معظمهم بيفتوا علي الفاضيه و المليانه و معظم كلامهم غلط

يعني حضرتك لو تلاحظ الفرق بين الاتنين اللي روحتلهم
واحد صعبانه عليه حال العربيه انها مقلوبه كربراتير
و التاني بيقولي كده احسن عشان لو عطلت

لكن في الاخر انا مش حاسيس بامكانيات العربيه لانها متكتفه و مخنوقة

لكن صراحه لما بتجري اديها بس طريق و اتفرج عليها

صوت الموتور بيوطي بتثبت علي الارض تقفل الازاز ماتحسيش بحاجه

عموما لقد ارسلت لك رساله علي الخاص

و اشكرك علي مرورك الكريم

و نمتي ان نسمع اراء الاخوة اللانشاوية الكرام

اخيكم
خالد

[benmatar]

السلام عليكم
ربنا يباركلك فيها ومع الاستخدام والوقت تعجبك اكتر، بس رأيي المتواضع ترجعها لأصلها عشان تحس بيها فعلا وتشوف معدلات التسارع على حق، وانا تحت أمر حضرتك في أي استفسار.

[S O P H O S]

مبروك العربية

[khaled_k21]

الله يبارك فيك يا باشا