ارجو الافادة السريعة من رجالة البونتو

[ahmedsalah1322]

السلام عليكم يا وحوش الفيات، انا معايا بونتو ٢٠٠٢ لسا جايبها من تلات اسابيع و كانت ماشية معايا تمام لغاية ماحصل اللي حصل....كنت رايح شغلي عادي لقيت العربية من عول ما طلعت بيها بتسقف و مابتسحبش خالص و الحرارة مضبوطة علي النص عادي المهم سايستها لحد الشغل عشان هوا مشوار صغير و العربية بطلت ادام الشغل بالضبط ، و دورتها دارت لحد ما ركنتها و سيبتها حوالي ٨ساعات و بعدين نزلت اشوف ايه الموضوع فحبيت اتطمن علي المياه الاول ففتحت الريدياتير و فتحت طبة الهوا اللي في المشترك و حطيت مياه (طبعا العربية مش دايرة و باردة تماما) لقيت المياه بتنزل حنفية مابين الموتور و الفتيس و المياه مابتستناش ثانية و بتنزل علي طول المهم كلمت الاسطي هاني اللي عند الشيخ علي اللي في شارع دمشق ، قاللي دي الطبة بتاعة المياه اللي ورا الفتيس و لازم تقطر العربية و تجيبهالي و هنضطر نحل الفتيس ، المهم قطرتها و وديتهالوا فاول ما روحتلوا دور العربية و بيحط مياه من الريدياتير( من غير ما يفتح طبة الهوا) و لاقينا المياه يتنفخ تاني من الريدياتير زي النافورة فقالي كده العربية دي فيها جوان وش سلندر ... المهم ان المياهمادخلش عليها اي زيت خالص ولا الزيت طحن خالص ، فانا بصراحة مش مقتنع بانه جوان و حاسس انه بيشتغلني خصوصا ان الموتور داير عادي جدا و الكبس مش مهرب ، معلش انا طولت عليكوا بس انا محتار و محتاج مشورة الوحوش بتوع البونتو

[graffittiii]

بص ياباشا أنا مش خبير أوي بس هحاول أساعدك لحد ما حد من الأعضاء الأكتر خبرة يفيدك ..
علي حسب معلوماتي :
هو المفروض لو في جوان هيكون البوجيهات عليها مية ... ممكن تفك بوجيه وتشوف .
وبالتالي نتيجة أن في مية العربية بتكون بتقطع ودورانها مش منتظم ( متلتة ) .

ثانيا هو إيه الوصف اللي إنت وصفتهوله خلاه يقول طبة المية اللي ورا الفتيس !!!
أنا مش مقتنع أن في أعراض ممكن تخليه يعرف حاجة زي دي بالتليفون !!
إشمعني الطبة اللي ورا الفتيس ؟!!
ليه مش الريداتير مخروم مثلا .. أو دورة التبريد واخده هوا ؟!!..

لو أنا ميكانيكي وحد أتصل بيا بيقولي العربية بتنتش ومابتسحبش وبتبطل !!
أقوله طبة المية اللي ورا الفتيس ؟!!!!!!!!!! أنا شايفها إجابة خزعبلية بصراحة
لو أنا ميكانيكي هفكر في البوجيهات أو الكابلات بتاعتها أو idle sensor أو الموبينه أو جوان وش السلندر .

علي فكرة أنا مش بذم فيه هو ممكن يكون كويس وشاطر بس أنا مش لاقي تفسير .

[ahmedsalah1322]

اولا انا متشكر جدا لسرعة الرد و اهتمام حضرتك. ثانيا انا عاوز اوضح لحضرتك انه الاسطي هاني لما كلمته وقولتله المياه بتنزل من مكان طقم الدبرياج ( بين الفتيس و الموتور) فعشان كده هو قاللي انها الطبة اللي مكانها في الموتور ورا الفتيس. ثانيا العربية بتدور من سنة مرش و مابتقطعش خالص ولا متلتة فامعتقدش ان في اي مياه علي البوجيهات.

[Sameh nabil]

حصل معايا الموضوع ده بالظبط و المياه كانت بتتسرب من الطبه اللي موجوده ناحيه حساس الكرنك ( ٩٥ )

و صلحنا الموضوع بنوع معين من اللصق بيمسك جامد و يمنع التسريب ،، الحل التاني الاصعب ان الموتور يتفك و يتبعت مخرطه

[ahmedsalah1322]

فى البداية انا متشكر جدا لكل اللى تواصل معايا لحل المشكلة بتاعتى .
انا بكتب الرد ده عشان افيد السادة الأعضاء ملاك الفيات، انا رحت فعلا للأسطى هانى بعد العيد و أشتغل فى العربية و العربية كانت فعلا ضاربة جوان وش سلندر، بس انا عايز اقول ان الراجل ده محترم جدا و فاهم العربية اوى لدرجة الحفظ و عنده ضمير و بيشتغل فى العربية شغل توكيل بمعنى انه بيشتغل بنضافة و معاه عدة محترمة و حديثةو واثق جدا من شغله و تشخيصه. نيجى بقي للعيوب :-
1- هوا ميكانيكا بس و مالوش فى الكهرباء و ده هو اللى قاللى عليه و قاللى انه مابيفتيش فى حاجة مش فاهمها.
2- هوا اللي بشتغل بإيده و ماعوش حد غيره فبياخد وقت بس ده طبعاً ميزة و عيب.
3- الضغط عليه ماشاء الله عالى فلازم تاخد منه ميعا سابق و ده ممكن يكون بعد اسبوع.

لكن كمجمل انا طبعا مش شايف ان دى عيوب بس حبيت انقل التجربة للامانة و لإستفادة باقى الاعضاء. و جارى تجربة السيارة و هوافيكم بأي ملاحظات ان وجدت ان شاء الله.