طلب نصيحه فى الريتمو

[amr 2]

بسم الله الرحمن الرحيم
كل عام وانتم بخير بمناسبه عيد الاضحى المبارك . اما بعد فلى استفسار بخصوص إكصدام السيارة الريتمو حيث ان السيارة الان اجتازت مرحله السمكرة وسيتم الانتهاء من المعجون والرش بعد انتهاء إجازة العيد ( الصنايعيه مأجزين لغايه يوم السبت ) و لكن الاكصدام الامامى به بعض العيوب اهمها وجود تأكل وكسر فى الكورنر اليمين اسفل الفانوس فهل له إصلاح فعلى لمادة الفبر السميكه تلك . أم يجب شراء إكصدام جديد علما بأن سعرة غالى جدا 700 جنيه فى المنصورة ( ليه مش عارف أهو استغلال وخلاص لان كل حاجه العربيه دى مش متوافرة ) ياريت لو حد يعرف يفيدنى او لو يعرف مكان واحد متخصص فى الاكصدامات يعرفنى وبسرعه .
تانى حاجه انا محتار أرش الاكصدامات بنفس لون العربيه ( احمر ) ولا اسيبها سوداء . انا شوفتها مرشوشه بنفس لون العربيه بس فضى ميتاليك وكانت جميله جدا وشوفتها فى الابيض وكانت جميله لكن بصراحه مش عارف فى اللون الاحمر هتبقى إزاى . انتم ايه رأيكم .
وشكرا جزيلا .

[J A G U A R]

خلي حد بتاع فبر يشوف الاكصدام ممكن يصلحه
ولا الاكصدام حديد ..

بالنسبه للرش انا شايف ريتمو مشدوده ومتركبلها عتب وحاجات تانيه والاكصدام مرشوش احمر وكان شكله كويس

سؤال يا باشا
هيا العربيه دى قطع غيارها منتشره ورخيصه ولا مش منتشره وغاليه
ايه نظامها ..

[amr 2]

شكرا جزيلا لحضرتك .
اما بالنسبه لموضوع العربيه الريتمو فهو كالاتى : انا شخصيا شايف ان فى قطع غيار كتير متشابهه مع الفيات القديم وخاصه ال 128 دة من ناحيه العفشه والموتور و الفتيس و لكن الاكسسوار ( فوانيس , إكصدامات , صاج جديد ودورانات وكدة ) دة بيبقى غالى وفى الغالب مش متوافر خالص ( دة فى مدينه المنصورة فقط ) أما بقى لو عايز حاجتها فقدامك يإما بورسعيد او عزبه شلبى . مش عارف بيعاملوها ليه كدة مع انها بنت حلال يعنى مثلا دورت ولاقيت رفارف ودورانات جديدة 128 لكن مالقيتش اى حاجه للريتمو والوحيد اللى كان عندة فى المنصورة كان عندة جوز رفارف جديدة عايز فيهم 600 جنيه مع انهم ممكن لل128 يجيبوا نصف السعر تقريبا . وكذلك الفوانيس مرة جبت فانوس جديد ب80جنيه مع ان جوز فوانيس ال128 كانوا ساعتها ب 65 جنيه للجوز . هى عربيه حلوة بس يعيبها موضوع قطع الغيار دة دة غير طبعا انها تقيله فى البيع لذلك لو بتفكر تغير عربيات كتير انصحك بلاش منها أما بقى لو بتحب تستهلك ممكن تفكر فيها وبردة ما تاخدش رأيى كدليل قاطع إسأل وشوف وكل عربيه وليها حاله غير التانيه . وربنا يعطيك الاحسن لو بتفكر تشترى .

[J A G U A R]

شكرا جدا لحضرتك

انا كنت بفكر اجيب عربيه جنب عربيتى لدواعى المرمطه يعنى
فقولت اسأل حضرتك عنها