ما رأيكم دام فضلكم ..

[المواطن مصرى]

السادة رواد و مشرفى قسم (فيات) بالموقع

كنت قد كتبت قبل حوالى شهر مستفسراًَ عن نصيحتكم بخصوص شراء اياً من السيارتين فيات 131 او فيات ريجاتا و بعد نصائح الأساتذه : حازم - حسام - سبعاوى و تشجيعهم للريجاتا قررت البحث عن واحده فى حدود المبلغ المتوافر معى (30 الف جنيه) و بعد بحث و جهد جهيد و زيارتين لسوق العاشر و تتبع اعلانات الوسيط وجدت سياره اعتقد انها مناسبه
لكنى اريد ان اخذ رأيكم في ملاحظاتى العامه على السياره و سعرها و نصيحتكم هل اشترى ام اعيد البحث

- نوفا ريجاتا موديل 1988 صناعه شركة النصر
- الموتور 1500 سى سى و حالته 70% بناء على فحص البنزينه بالكمبيوتر
- معدل استهلاك البنزين 200 كم او اقل قليلا فى الصفيحه بناء على كلام صاحبها
- عدد الكيلومترات حسب العداد حوالى 109 الف كيلو متر
- السياره كانت مرفوعه لظروف سفر صاحبها بين عامى 2001 و 2003
- اللون احمر (دهان جديد من عام و نصف بناء على كلام صاحبها) و للأمانه شكل الدهان مفيهوش خدوش او خبطات و قد تأكد السمكرى من عدم وجود خبطات اماميه جامده
- لا يوجد دهان للدواخل و لكن يوجد رش بالشنطه من الداخل الجانب الأيسر لوجود خبطه سابقه تم معالجتها و هو ما اكتشفه السمكرى و باستثناء ذلك حاله الشاسيه سليمه
- الفتيس يعمل و ينقل بسهوله كل النقلات لكن توجد مقاومه او عضه بالبلدى مع الرابع فقط برغم ان الخامس شغال بسهوله (بعد سرعه 120 كم)
- سحب السياره فوق المتوسط كما قال الميكانيكى و اتزانها كما عرفت فى البنزينه مضبوط لكنى جربت على وصله طريق مصر - السويس اللى بعد العاشر و دست على البنزين بقوه و مشبت حتى 140 كيلو لكنى لاحظت رجه خفيفه و ارتفاع صوت الموتور بعد 120 كيلو و هذا كان للتجربه فقط فانا اقصى سرعه امشى بيها 90 او 80 كمان لانى مش محترف سواقه و يادوب من البيت للشغل و من الشغل للبيت
- التكييف يعمل بكفاءه و قد جربت تشغيله اثناء اختبار قياده على سرعه 110 كيلو على طريق مصر - السويس و كان جيد جدا لكن بيعمل تكثيف للمياه (قال الخبراء ان فيه حاجه اسمها خرطوم السربنتينه بيتغير فى حدود 50 جنيه)
- الكماليات : سنتر لوك - زجاج كهربائى أمامى - كاسيت كلاريون بسماعتين كبيرتين بيضاويتين فى الخلف و كلها تعمل بكفاءه (خصوصا الكاسبت صوته عالى جدا)
- البطاريه فيها من نوع كلورايد و هى سائله و ليست جافه و لها اكثر من سنه و نصف فى العربيه و حالتها متوسطه بناء على كشف البنزينه
- يوجد بقايا ترسيب زيت فى حوض الموتور و قال الميكانيكى انه ناتج من عدم تغيير الزيت منذ فتره و عدم تنظيف دوره الزيت و ليست مشكله تسريب بدليل انه لا يوجد ترسيب زيت على البوجيهات (حسبما قال)
- لا يوجد باور ستيرنج لكن من واقع تعلمى للقياده على سياره لادا 2017 موديل 1995 فالدركسيون خفيف جدا بالنسبه لى اثناء الحركه لكنه واسع شويه اثناء الركن فى مكان ضيق (بمعنى صعوبه السيطره على السياره نوعا ما بالنسبه لشخص يجيد القياده بالعافيه)
- الفرش متبهدل (من وجهه نظرى) و قالوا لى ممكن ان تركب طاقم فرش مستورد فى حدود 400 جنيه بالمصنعيه من التوفيقيه او من واحد اسمه مرجان (اكيد مش مرجان احمد مرجان)
- التابلوه حالته جيده و يعمل بكفاءه عدا الجزء الخاص بكمبيوتر الاعطال يوجد به سنسور مش شغال يؤدى لعدم عمل لمبتين من اصل سته لمبات موجوده
- بالنسبه لحاله العفشة : يوجد بها اثنين مساعد امامى كونى (تم تركيبهم من حوالى عام و نصف بناء على كلام صاحبها ) و المساعدين الخلفيين لم يتغيروا منذ عام 1999 لكنى لاحظت صوت غريب يظهر عند استخدام الدركسيون بعد سرعه 90 كم و قال الميكانيكى انه ممكن يكون فيه مشكله فى (شبىء ما) لا اذكره لكنه ممكن تشحيمه ليعمل بسهوله شديده و ممكن تغييره بتكلفه لا تذكر
- يوجد بها 4 فرد كاوتش جديده تيوبلس من نوع كورى اول مره اسمع عنه فى حياتى اشتراهم صاحبها قبل عرضها للبيع بأسبوع (يعنى تقريبا اول شهر يوليو الحالى)
- المالك الحالى للسياره هو المالك الثانى لها و قد اشتراها عام 1999 و نقل ملكيتها باسمه و اطلعت على العقد و الرخصه و هو يريد بيعها لشراء سياره زيرو هيونداى او دايو
- السياره تابعه لمرور الدراسه و نهايه الترخيص 4/2008

الملاحظات الفنيه تمت اثر فحص السياره من قبل ميكانيكى و سمكرى (معرفه احد اصدقائى فى الشغل) بعد رفعها فى بنزينه فى اول مدينه نصر متخصصه فى تقديم التقارير الفنيه عن السيارات (كلفنى هذا الموضوع بالضبط 114 جنيه شامل اجر الميكانيكى و السمكرى)

المهم بعد الاطاله و الاسف على الاطاله ان صاحبها طالب 30 الف جنيه و مصر جدا الا ينزل مليم واحد و يقول انه اشتراها عام 1999 بـ 26 الف جنيه و ركب لها مساعدين و دهنها و ركب لها كاسيت و سماعات و صلح فيها حاجات و بالتالى هو خسران (من وجهه نظره)

فالسؤال هو : هل هذا السعر عادل من وجهه نظركم ؟!

و هل ما قلته من ملاحظات يشكل مشكله حاليا او فى المستقبل ؟!

و هل يمكن اجراء التصليحات التى قالوا لى عليها بالأسعار التى عرفتها ؟!

مع مراعاه اننى لا املك سوى الثلاثين الف جنيه التى معى و حوالى الفين جنيه للطوارىء (تحت البلاطه) و انا موظف لا امتلك دخل سوى مرتبى فبالتالى لن يكون معى اى اموال لاصرفها على السياره فى حاله حدوث مشكله جامده فيها فى المستقبل يمكن ان تكتشفوها بخبراتكم من مجموع الملاحظات التى قلتها لكم

ارجو اتساع صدركم لقبول اسئلتى و فى انتظار الاجابه حتى احدد موقفى مع الرجل صاحبها حيث اننى قابلته اليوم و اعطانى مهله حتى يوم الثلاثاء القادم

شكرا جزيلاً على وقتكم و اجاباتكم

[ahmed1981]

توكل على الله
هي سعرها عالي
لو تنزل الف أو ألفين يكون أكثر واقعية

[حسام كرم]

اعتقد لايفتى ومالك فى المدينة
ففنياً بعد راى السمكرى والميكانيكى وكمبيوتر قياس قوة الموتور وجهاز قياس الاتزان
لانستطيع التعليق
اما من ناحية السعر فلو استطعت تنزيل الف او اثنين كما قال ا / احمد خير وبركة
وان لم تستطع فتوكل على اللة واشترى
فالسيارة من وصفك واضح انه مناسبة

[hazem_khidr]

اتوكل علي الله بس لو تعرف فعلا تنولها شويهه علي اساس حاله الموتور زي ما بتقول 70% يعني قدامه سنه و حتحتاج تعمل عمره للموتور و فهمه قوله انت ركبتها 8 سنين ف دا طبعا بفلوس مش ببلاش ولا انت عاوز تركب و تنزل و كمان تكسب.ف طبعا عمليه مش مفهومه.
استخير ربنا برضه و شوف ولو ماكنش فيه نصيب ما تزعلش ان شاء الله خير و فيه مكان العربيه الف كمان.

[oshy]

اتكل على الله بس خدها منى نصيحه هات 132 1600 سى سى ووفر فلوسك مدام انته مش محتاج الكماليات الهايله اللى انت قلت عليها و كمان 132 اسرع منها و من رأيى أحسن بس تكون ايطالى

[sab3aawy]

العربية على كلامك معقولة بس حاول تخفض السعر شوية

طالما اساسيات العربية سليمة ، عمرة الموتور مش مكلفة ، يعنى بعد سنة ممكن تعمل لها عمرة تتكلف من 1500 الى 2000 حسب حالة الموتور

بس انا مش من انصار فكرة ال132 دى خالص، أنها عربيات قديمة أوى ونظامها ذو الجر الخلفى يعتبر بعيد عن المألوف الآن بما يجعلها out of date ومعظم قطع غيارها مش موجودة غير استيراد وغاليه جدا ومعظمها سئ ، وبرغم ان الريجات اخف وزنا فصالونها اوسع عشان جر امامى وثباتها احسن علشان تعليق خلفى حر، واستهلاكها للبنزين افضل علشان كامة واحدة وجر امامى بدون تفريط فى قوة المحرك وتسارعها احسن علشان وزنها اقل وشكلها ايروديناميكى، وبرغم ان الريجاتا قديمة لكنها تكنولوجيا هى نفس ما تنتجة الشركات اليومين دول ، يعنى مثلا تكنولوجيا الريجاتا متفرقش حاجة عن اللانوس او الإكسنت سوى الحقن الإلكترونى، وقطع غيارها مرطرطة جديد ومستعمل، وبالتالى فهى حل عملى جدا