١٣٢ جديدة

[salahudin solt]

افتوني يا اهل الخبرة
انا معايا بومة ٢٠٠٧
بس بصراحة قطع الغيار غالية والخبطة بتاكل مرتب وانا دكتور من محدودي الدخل
وكنت جايب قرض عشان اشتري وشغلي كله نوبتجياات في القاهرة وانا من المحلة
فانا بعد اخر مشكلو حصلتلي بالعربة فكرت ابيعها
وكان في واحد قريبي عندة ١٣٢
لو اشترتها منه مثلا وجبتلها موتور جديد وغيرت العفشة وجبتلها جنطين ١٥
وفي ناس بتقولي في مواتير بتيجي اوتو
هتقضي الغرض

[hamo81]

هتصرف نفس المصاريف مع فارق الركوبة
القديم قطع غيارة رخيصة صحيح لكن أعطالة كتير وبالتالي هتصرف كتير غير وقف الحال
الحديث أعطالة قليلة لكن قطع غيارة غالية شوية
رأي تجيب لانوس أو فيرنا عربية حديثة وفي نفس الوقت قطع غيارها رخيصة وتبقى مسكت العصاية من النص

[wael61]

بعها وهات شاهين قطع غيار رخيصة اى ميكانيكى يشتغل فيها

[abokoko]

مينفعش تنزل من لانسر ل 132
مش هترتاح ابدا
اصبر
ربنا يوسعها عليك بالحلال
معاك عربيه يتمناها الجميع

حالة واحدة تبيعها
لو فيها عيب
وقتها للامانه اذكر العيب اللي فيها عند البيع

[salahudin solt]

هتصرف نفس المصاريف مع فارق الركوبة
القديم قطع غيارة رخيصة صحيح لكن أعطالة كتير وبالتالي هتصرف كتير غير وقف الحال
الحديث أعطالة قليلة لكن قطع غيارة غالية شوية
رأي تجيب لانوس أو فيرنا عربية حديثة وفي نفس الوقت قطع غيارها رخيصة وتبقى مسكت العصاية من النص

انا حسبتها العربية ب١٢
التحديثات دي لو موتور وفتيس ٤٠٠٠
وجنوط وعفشة زيهم
يبقي وقفت ب٢٠٠٠٠
والعربية جايبالي تسعين

[eng_amg]

أستاذ صلاح ..

أولا: عايز أعرف حضرتك كنت راكب إيه قبل البومة وبقالك قد إيه راكب البومة؟
علشان أعرف حضرتك حتعرف تتعايش معاها ولا إيه...

ثانيا: أنا كان معايا 132 أول عربية أتعلمت عليها السواقة.
هي فعلا بعض قطع غيارها رخيصة جداااا لكن الخبطة حتعورك برضو. وإليك أخر تعاملي مع هذه السيارة من حيث قطع الغيار في الفترة من 1999 إلي 2001

- الكبوت = 1500 جنيه
- الكارونة = 3000 جنيه
- الأبواب = حوالي 3000 جنيه
- الموتور = 5000 جنيه
الكلام دا من أكثر من 10 سنين
دا غير إن فيها أعطال متكررة جدا مثل:
- المارش بيبوظ بسرعة (الترس) ومتعب جدا للكهربائية ومحدش بيحب يشتغل فيه علشان صعب.
- فلانشات الكردان بتبوظ بسرعة وقطع الغيار غير أصلية في السوق وحتبوظ تاني
- قاعدة الفيتيس قريبة من الأرض وبتتحك وتنكسر بسرعة
- إستهلاك البنزين فظيع ..(حوالي 300 كم / 50 ليتر) بس مقابل ذلك سحبها جيد جدا

فلو قارنت للأسعار أعتقد إن إلي معاك أحسن.

وبعدبن في قاعدة خاصة بفيات.. إن فيات حبيبة الميكانيكية
يعني علشان تكون العربية معايا 100% كنت كل أسبوع لازم أعدي علي الميكانيكي يشيك علي العربية سواء فيها حاجة أو لا.

[salahudin solt]

شكرا يا بسمهندس اقنعتني
هي الفكرة اني كنت مستخسر اللانسر في السفر

[amr011111]

طالما بتسافر كتير يبقى بلاش قديم لان معظم الاوقات العربيه هتعملها معاك
بالنسبه لمصاريف التشغيل الاتنين زى بعض
القديم العربيه لو جبتها ب 12 الف جنيه من غير ما تغير فيها اى حاجه فى خلال اربع سنين هتصرف عليها على الاقل 20 الف جنيه قطع غيار ومصنعيات ولحامات ورش مكان اللحامات وعمليه مقرفه غير وقتك اللى هيضيع عند الصنايعيه

اللانسر مش هتصرف عليها غير زيت وكاوتش بس بعد خمس سنين لو بعتها هتخسر فيها عن ما جايباها زيرو قول 20 الف بس هتكون مريح اعصابك ومش خايف كل مشوار سفر العربيه هتعطل منك ولا لاء

فالاتنين نفس الموضوع
لو عاوز حاجه كويسه وقطع غيار رخيصه يبقى فيرنا او لانوس مع شرط الحاله

[تامر.محمد]

مش هاتستحمل خالص
لو عايز تقلل مصاريفك جامد يبقى لانوس او فيرنا مثلا , و كده راكب عربية تعتبر فارهة بالمقارنة بال132 و كل فئتها و في نفس الوقت مصاريف معقولة جدا جدا جدا بالمقارنة بالبومة
و لو عايز تقللها خالص يبقى شاهين , بس ما تقلش عن كده

[swimmer25]

لو مش محتاج فرق الفلوس في حاجة تانية يبقى خليك في اللانسر
لكن لو محتاج الفرق ضروري في شراء شقة مثلا أو زواج أو غيره يبقى فيه تفكير تاني

وبعدين مفيش حاجة إسمها مستخسرها في السفر..العربيات الجديدة بتعمل كم أكتر بكتير من القديم
أنا كان معايا ياريس 2008 عاملة 120 ألف كم وتحس إن ال 120 ألف دول أول ربع من عمر العربية يعني ولا حاجة في عمر العربية في حين إنهم بداية موت العربية ال 132
ده غير مصاريف الصيانة الدورية أكتر ومرمات البارومة اللي كل شوية تظهر وإستهلاك البنزين
وخلي بالك قدرك هتشوفه..الحوادث دي من عند ربنا ويجب أن تعلم أنا ما أصابك لم يكن ليخطئك

المهم إنت تلتزم بالطريق والسرعات القليلة والعربية هتعيش معاك وتبقى أخدت بالأسباب للبعد عن الحوادث

وربنا يكفيك شر الطريق

[salahudin solt]

شكرا للجميع????????????

[salahudin solt]

شكرا للجميع