العربية بطلت وانا ماشي ومش عارف اية السبب ولا الكهربائي عرف

[e_amrawad]

معاية عربية نوفا 128 بطلت 3 مرات ف الزحمة
الطريق كان زحمة جداً وبطلت فجأة وانا ماشي وممشيتش غير لما اتزقت ورميتلها ومشيت وبعد حوالي ربع ساعة مشي في الزحمة بطلت تاني وبرضة ممشيتش غير بالزق والمرة الثالثة ممشيتش غير بعد مطلعت عيني زق.

روحت للكهربائي قاللي العربية مفيهاش حاجة الدينامو شحنة كويس والبطارية تشحن ومفيهاش تسريب والمارش سليم.

العربية عطلت يوم الخميس وميت بيها يوم الجمعة والسبت من غير متبطل ومش عارف السبب والله أعلم.

[aratux]

طلمبة بنزين؟؟

[e_amrawad]

بس هي لو طلمبة بنزين أعتقد ان هيكون فية مقدمات (تقطيع وحاجات كدة) والعربية عطلت يوم الخميس ومشيت بيها الجمعة والسبت من غير مالطرمبة تقطع ولا حاجة.

ولما عطلت كانت ماشية علي سرعة بطيئة وفي حاجة كمان اعتقد انها لو طلمبة بنزين كنت هحس بالدواسة بتاعة البنزين خفيفة وكمان مكنتش هتدور لو رمتلها.

انا شاكك ف الموبينة بس مش عارف اكشف عليها ازاي.

[M!NA]

راجع على البوجيهات ... و سلوك البوجيهات... احتمال تكون مقاومة السلوك زادت
و راجع كمان على الاسبراتير و الأبلاتين و الكوندينسر

[e_amrawad]

يعني العربية ممكن تبطل وهي ماسية عشان كهربة الماتور مش مظبوطة ومترداش تدور تاني
انا كنت فاكر ان لو كهربة الماتور مش مظبوطة هتأثر ع السحب ومش هتخلي العربية تبطل وهي ماشية وكمان مترداش تدور غير بالزق

عموماً هروح للميكانيكي يبصلي علي كهربة الماتور

[eslamspirit]

اظن ان الحكاية دي من الموبينة و للتاكد امشي بالعربية شوية حلين و بعدين شوف حرارة الموبينا لو عالية جدا يبقي العيب منها
و يا ريت لو وصلت لحاجة تبلغنا

[sherif_habeb]

العربيه بتسخن فى الزحمه شوف التبريد والمروحه والترموستات

[mohamedpay]

اخى العزيز/ معى سيارة فيورا وكانت بتعمل معى ذلك فى فصل الشتاء فقط وبعد 7 دوخات بين الكهرائى والميكانيكى غيرت البطارية لأن العيب كان منها- والله أعلم

[abdelhady83]

بص على كابل البطاريه ممكن يكون مش متحرق عليه

[ibrahimsaad]

اعتقد الموبينا هى السبب ممكن تركب لها كتاوت للتقويه

[e_amrawad]

1. غيرت طقم الكهرباء (بوجيهات وابلاتين وكوندنسر)
2. غيرت الموبينة
3. يرت كابلات البوجيهات

وانتو طبعاً عارفين اللي حصل - عملتها تاني امبارح

بس دلوقتي مبتبطلش وهي ماشية
اللي عملتة بالظبط امبارح قبل ماوصل البيت لقيت النور بتاع العدادات واطي أكنة مش شغال ونور الكشافات برضة وطي فجأه والكالكس ضعيف وبعد كدة فصل.
فصلت النور وقولت لما أوصل البيت اشوف العيب خوفت ابطل وانزل لحسن ماتدورش تاني.

وبالفعل أول ماوصلت وركنت (ركنة الاستعداد للزق) بطلت العربية وجيت ادور تاني مش رادية تدور (مش سامع صوت المارش يعني بتدي تكة)

الكلام دة كان بليل والصبح بدور دارت زي الفل.

ولسة مش عارف اية السبب

[e_amrawad]

أخيراً عرفت سبب العطل

طلع سبب العطل , الكتاوت الداخلي بتاع الدينامو لما بيسخن بيخرف

عشان كدة كت كل لما اروح للكهربائي يقوللي العربية تمام مفيهاش مشاكل عشان كانت العربية بتبقي باردة.

[kefafy]

الحمد لله انك عرفت السبب وهو بردة تجربة
ربنا يوفقك

[gamal2009]

بالنسبة للسيارة التى بطلت وهى ماشية فهذا العطل حصل معى فى صيف 2007 وذهبت إلى الميكانيكى ولم يجد شيئا وقال لى روح للكهربائى وحصل فقال لى غير فبرة الكنتاكت وبعد ما اشتريت الفبرة المزعومة لم يركبها وقال لى أذهب للميكانيكى فالفبرة القديمة سليمة وأخذت أذهب بين الميكانيكى والكهربائى أيام والسيارة تبطل أثنا السير فلما كانت بتبطل أديها الثانى وهى مازالت ماشية فيلقط الموتور وتدور المهم مع العلم أن عداد ال Rpm كان غير مستقر تماما فذهبت إلى التوكيل وحكيت القصة للميكانيكى فذهب إلى المخزن وصرف الآتى : أبلاتين ( الأسبراتير الكترونى ) صينية ووحة تغذية الأسبراتير وهى مركبة على جسم الأسبراتير وقام بالتقفيل ودارت السيارة حتى الأن والحمد لله
وتم إخراج أبلاتين الصينية الألكترونى القديم وقد تشققت الجلبة التى الخاصة به التى تدخل فى أكس الأسبراتير فاغالبا هذا العطل عندك أخى الكريم فى نفس العطلى اللى كان عندى وربنا يوفقك
والسلام عليكم

[danger75]

شوف وش السلندر