استشارة فى اول عربية ليا ،، قدامى فيات 125 و عاوز الآراء

[Ladawy]

السلام عليكم و رحمة الله و بركاته

ترددت كتير فى اول عربية هاشتريها ، شوية ازود الميزانية و شوية اقللها
فكرت فى 128 و بيجو 205 و لادا 2105 و سمارا لحد ما وصلت بالتفكير ل فيات اونو .. بس كدا الميزانية فتحت
الاغلب نصح انى ابدأ بحاجة رخيصة الاول و اتعلم معاها السواقة

و معروض قدامى فيات 125 المفروض حالتها حلوة ، موديل التمانينات
كانت استعمال خفيف و اتباعت لواحد استعملها 3 سنين و سافر ، و مركونة عند قريب ليه بقالها سنتين مثلا

انا لسه هاشوفها بس من الكلام انها مش متهانة ،، ممكن تحتاج مصاريف تغيير حاجات من الركنة لكن غير كدا هى كويسة

ايه رأيكم فى ال 125 مبدأيا ؟؟
الاعتماد و الشغل - الصيانات و قطع الغيار - استهلاك البنزين - اعادة البيع

انا مشاويرى للشغل ( 25ك رايح و 25 جاى ) و مشاوير الشغل نفسها (داخل البلد )


و ايه الحاجات اللى اسأل عليها أو ادقق عليها و انا بشوف العربية ؟

فى انتظار اادتكم على احر من الجمر ،
لإنى كنت عاوز اروح اشوفها النهاردة ... لكن قولت استشيركم الاول و اعمل المشوار ده بكرة .

[Ahmed Tarek 00]

خليك ف فيات 132 جامدة جدا وقوية اوووى

[Ladawy]

ايوة بس دى ضعف دى فى التمن :)

[hugan]

هاتخلص ال25 علي كام




فعلا شوف 31 او 32 افضل
ال 25 كانت معايا من 15 سنه
هي واسعه جدا
لكنها عربيه مخلعه
وقوايمها بتتكسر
وكارونتها بتون
البولنيز افضل الف مره منها
لو لادا سمارا افضل طبعا منها عربيه حديثه وشكل ونعومه
راءي اصرف نظر عنها
خلاص زمانها راح وانتهي
25 و24 و1300 و1100
وهايحصلهم قريب لكن لسه فيهم الرمق
31و32وبيجو 504 ولادا صندوق
الحق بقي واحده من الموديلات السابقه قبل ما يخرجوا معاش

[Ladawy]

وصلتنى الفكرة ،،
بس انا بتكلم على اساس انها استخدام خفيف جدا ( على كلام اللى وصلنى انها بتتباع ) ، فبالتالى تعتبر حالة حلوة

هى آه كموديل اتكتبتله شهادة وفاة من سنين ، بس دى كانت فى الفريزر فى فترة من حياتها ، ف تعيشلها كمان 5 سنين اكون اتعلمت عليها و معاها الميكانيكا و السواقة

+ ان ليا قريب كان هدفه الاول و الاخير و هو بيدورلى على عربية انها تكون مالك أول أو تانى ( ما اتنقّلتش كتير ) و تكون حاجة شاذة و بتاع
صحيح كان بيدورلى على حاجة مارشتش برة ولا جوة ( و كنا بنتكلم فى موديلات التمانينات ) علشان كدا لحد الآن مالقيناش حاجة :d
بينما دى رشة برة و جوة :d ( الله اعلم ليه لسه هاعرف من المعاينة ) .. بس لو دواخل يساعدوا فـ فكرتى ان الواحد يضغط على نفسه شوية و يستحمل المتعب علشان بعد كدا يحس لما يجيب الاعلى منه .

--------
الفكرة معايا ان حالة العربية هى اللى رشحتها فقط لا غير ،، الصديق اللى بيقولى عليها انا وقتها ماكنتش اعرف تطلع ايه الـ 125 دى اساسا ... بس هو متحمس ليها خصوصا انى قولتله على كل حاجة انا كنت مخطط ليها ( ف هو عارف دماغى فيها ايه و عارف طلبى )

--------
لو بكام اجيبها ولا لو اغلى اصرف نظر ؟؟

هو الراجل طالب 13 ، بس صاحبى قالى انها تخلص على 9 ،، توصل ل 10 لو انت عاوزها اوى

[محمود السيد]

هو الراجل طالب 13 ، بس صاحبى قالى انها تخلص على 9 ،، توصل ل 10 لو انت عاوزها اوى
9 حلو لو الحالة كويسة
و125 عربية قوية كانت معايا لمدة 4 سنين كنت بسافر بيها كتير راس سدر ومرة سافرت بيها شرم الشيخ هى عربية عضمة قوية بس المشكلة انها قديمة لا اكثر والشيا المميز الى منت بحبه فيها ان كاتينة الموتور جنزير

[ahmedsrs]

بلاش العربية دي شوف حاجة احدث

[Ladawy]

عقدتونى منها يا جماعة خلاص :d

طيب اشترى ازاى طيب !؟؟

انا اللى بلاقيه حالته مغرية قدامى بروح عليه ( و دا ماحصلش إلا مرة واحدة و كانت سماعى بس - العربية الـ 125 دى- )

و لما قولت لصاحبى انى هاخدها من الراجل اوديها لميكانيكى و اجربها ، قالى لأ هات الميكانيكى و شوفوها و هى عند الراجل !!
قلقت من الحكاية دى و قولت بناقص


طيب الاقى اونو فى رينج 25 ؟؟
ولا ادوس و ادور على لادا 2105 أو 2017 على طول

و فى اى الاحوال ،، اشترى ازاى ؟؟
لا انا بفهم فى الميكانيكا ، و لا هاشحطط ميكانيكى معايا فى كل مشوار اشوف فيه عربية
ولا عاوز اجيب عربية مضحوك عليا فى حالتها ، أو سعرها

[hugan]

عقدتونى منها يا جماعة خلاص :d

طيب اشترى ازاى طيب !؟؟

انا اللى بلاقيه حالته مغرية قدامى بروح عليه ( و دا ماحصلش إلا مرة واحدة و كانت سماعى بس - العربية الـ 125 دى- )

و لما قولت لصاحبى انى هاخدها من الراجل اوديها لميكانيكى و اجربها ، قالى لأ هات الميكانيكى و شوفوها و هى عند الراجل !!
قلقت من الحكاية دى و قولت بناقص


طيب الاقى اونو فى رينج 25 ؟؟
ولا ادوس و ادور على لادا 2105 أو 2017 على طول

و فى اى الاحوال ،، اشترى ازاى ؟؟
لا انا بفهم فى الميكانيكا ، و لا هاشحطط ميكانيكى معايا فى كل مشوار اشوف فيه عربية
ولا عاوز اجيب عربية مضحوك عليا فى حالتها ، أو سعرها

طالما اول عربيه ليك
لازم هاتقع في عربيه تعبانه تتعلم عليها كل حاجه واصول الصنعه وقرف وسرقه الصنايعيه
بعد كده ربنا يكرمك تشتري انت بنفسك
لو ال25 نضيفه زي ما بتقول وسعرها كويس
خلص فيها

[ahmedsrs]

شوف شاهين او دوجان اهى تعتبر احدث شوية ومتشتريش عربية راشة خوارج وانت متتخمش حتى لو معاكش حد بيفهم