ايهما افضل كيا بريد - فيات اونو - هونداي اكسل - اسكودا فليشيا -دايهاتسو شاريد

[meeidoo]

بسم الله الرحمن الرحيم

باين من العنوان اني غارق في المقارنات والتفضيلات
اولا معيا 128 عاوز اغير ولي معايير في الاختيار
-السعر من 25000 الي 30000 الحد الاقصي
- الكلام علي موديل بين ال 1990-1999
- اقتصادية في البنزبن وتعمل ببنزين 80 وبقول واكرار بنزين 80
-قطع الغيار اعتماديه متوفرة جديد او مستعمل (وبسعر معقول) يعني مش رخيصة وتبوظ بسرعة ومش غالية تكسر ظهري
-والميكانيكه سهل غير معقده
-مريحه في السوقة والكل فاهم يعني ايه سواقة 128 .عاوز طارة اسهل في الملفات والركن قريبة للبور شوية مش اوي
-مناسبة للمطباة الموجوده في كل شوارع مصر ومتجمعه عندنا عشان مش كل شوية اروح اغير عفشة او علبة دركسيون
وانحصر اختياري علي بعض المركات
---الاوربي----
فيات اونو - اسكودا فليشيا
----اسيوي ياباني و كوري ----
كيا بريد
هونداي اكسل
دايهاتسو شاريد

ارجو الرد مع ذكر السبب في الاختيار
افيدونا ياهل الخبره في الاختيار الصعب
ايهما افضل كيا بريد - فيات اونو - هونداي اكسل - اسكودا فليشيا -دايهاتسو شاريد

[bluemail]

الاكسيل افضل
قطع غيار متوفره - بنزين 80 - اي صنايعي شغال فيها - تكييف وباور - قطع غيار رخيصه نسبيا
الفليشا كانت مع ابن عمي وباعها لانها مصايفها كتير وقطع غيار غاليه حسب كلامه
ممكن تشوف الاونو بس الاول تسئل علي قطع الغيار وهل اي ميكانيكي شغال فيها او لا
وبالتوفيق ان شاء الله

[abdo7000]

الاكسيل سيارة عملية واقتصادية جداا

[mif]

اكسل
كيا برايد
اونو

[meeidoo]

شكرا لكل الناس المساهمه في الموضوع ولكن من 6 اختيارات اتبقي 3 ممكن تقولو اختيار 1 بس او 2 بالكتير ممكن المساعده

[abou-yahia]

لو عاوز عربيه عائليه تبقي اكسيل

عايز متعه سواقه هات بونتو

[bluemail]

لو عاوز عربيه عائليه تبقي اكسيل

عايز متعه سواقه هات بونتو

طيب معلش سؤال , حضرتك قطع غيار البونتو اخبارها ايه ؟
2004 و2009 و2011
وهل فيها عيوب معينه؟

[abou-yahia]

طيب معلش سؤال , حضرتك قطع غيار البونتو اخبارها ايه ؟
2004 و2009 و2011
وهل فيها عيوب معينه؟

البونتو من 99 الي 2011 مبتفرقش تقريبا غير شكل الفوانيس

وشايف ان قطع غيارها عاديه جدا جديد واستيراد

عيبها من وجهه نظري حاجتين

هي عربيه لشخصين او اسره صغيره جدا

كهربتها مش بتستحمل لعب

يعني بلاش تركب وحده رفع او تركب لمبات وات عالي

لاكن هي عربيه اداء عالي وموفره جدا في البنزين

[tasaka]

اكسل من غير ما تفكر بشرط الحاله ( بص على الركبه الاماميه للمساعد يمين داخل الحوض .. ممكن يكون فيه عيب .. لسوء الاستعمال ) .. و ال95 و 96 ممتازه

اشترى ال 1500 الكامله او عايز ارخص و اقل فى الكماليات يبقى هونداى هاتشباك او البرايد

السبب للاختيار : كانت معى من الزيرو و قعدت معى 14 سنه موديل 95 اول نسخه مصرى .. على كبالنها الاصليه حتى وقت البيع على 180 الف كم ( انا موش بأهدى فى المطبات الا لو كان جامد جدا ) .. بدون اى اعطال نهائى لمده 100 الف .. بعدها اعطال خفيفه فى الكهرباء فقط .. و لم اغير فيها اى شيى رئيسى للكهرباء ( دنامو او مارش ) حتى بعتها عامله 180 الف .. المكيف استعمال مستمر يومى و سليم حتى وقت البيع .. نفس الشيى للبور ( لم ينقص 1 سم نهائيا ) و غيرت زيت الباور بعد 7 سنوات بدون سبب فقط قلت كفايه كده

تغيير البطاريه بعد 7 سنين ( لسه كانت بتدورنى ) ..

تغيير البوجيهات بعد 4 او 5 سنين ( كل ما اقول للميكانيكى غير .. يكشف و يقول لى لسه كويسين ) .. و بعدين غيرتهم زهق و هم لسه شغالين كويس .. استعملت بوجيهات 4 شمعه

تغيير المساعدين بعد 5 سنين و فى التوكيل قال لى كويسين .. قلت له غير .. قال لى خد القدام معاك لسه شغالين كويس .. و اخذتهم

لم اعطل بها مره واحده فى الشارع طوال ال 14 سنه

فى السفر 315 كم \ للصفيحه .. بنزين 80 سيجعل السياره تسك ( انا كنت باستعمل 90 )

الشيئ الوحيد الذى انصح به هو تغيير الكاونش ان كان مصرى بكاوتش عريض .. جبت مشلان 185\60 او 65 موش فاكر .. العربيه بتبقى حاجه تانيه خالص فى المطبات و فى الثبات ( اول ما اشتريتها كنت سابيعها بسبب عدم العربيه كانت بتعوم .. و بعدين لما غيرت الكاوتش عرفت ان العيب كان من الكاوتش المصرى و ليس السياره ) .. و اعتقد و الله اعلم ان سبب شرخ ركبه المساعد عند بعض الناس هو الكاوتش المصرى .. انا بعتها سليمه )

كانت اصيله و بعتها و انا حزين عليها كأنى فقدت عزيز .. و لكن كان معى عربيتين غيرها و كنت مرضت و لا استطيع قياده الفتيس المانوال

اخترت راجل محترم ( لانى كنت عايز ابيعها لواحد يستاهلها ) و ريحته فى السعر علشان يأخذها مستريح

تحياتى