استفسار بخصوص حاجة اسمها .... برافا و العياذ بالله

[MEDO84EG]

السلام عليكم و رحمة الله و بركاته
علشان مطولش عليكم مطلوب من اصحاب الخبرة المساعدة في امرين
1- التسعير
2- ابداء الراي في العموم في السيارة برافا موديل 1998 كاملة مانيوال

المواصفات
فبريكا دواخل فيها خبطتين بسيطة من الخارج الدهان شكله متوسط
العفشة محتاجة مبدئيا لجوز مساعدين امامي
الصالون مهمل شوية
الموتور كبسة نص نص يعني لما بزود اوي بيبدأ يبقي في دخانه ابيض علي بسيط
تقريبا فيها ايدل لانها اول ما بتدور بيبقي صوتها عالي و بعدين بتهدي لوحدها
1600 سي سي
التكييف محتاج شحن ( او صيانه و شحن )
باور - سنتر - مرايات كهربا - 4 زجاج كهربا
جنوط اسبور 14
هل قطع غيارها الاقيها عند بتوع الفيات الحديث و لا لازم انزل عزبة شلبي و التوفيقية و الحرفيين و الحوارات دي
هل موتور ال 1600 ده معقد و فيه حساسات و بلاوي زي بتاع السيينا ال 1600
انا عارف ان العربية دي تعتبر محتاجة اصلاحات بالهبل كده لكن لو هاخدها بسعر حلو يبقي كام و هل هيا كعربية اساسا لو صرفت عليها و ظبطها هتبسط بيها و لا اساسا موديل فاشل
و شكرا ليكم

[A7medelfe2y]

معرفش السعر فمش هفتي فيه
بس الي واثق منه اني اشتري واحده حالتها كويسه افضل 1000 مره من اني اجيب واحده شقيانه واصرف عليها

[MEDO84EG]

تسلم ايدك يا اخي معاك حق
يا ريت اسمع باقي الاراء

[samyyousef]

كان عندي برافا 2001 و كل اللي اقدر افيدك فيه أن العربية ممتازة لكن متشتريهاش بالحالة اللي وصفتها

العربيات الاوروبي بصفة عامة و البرافا بصفة خاصة ماتشتريهاش متبهدلة

[AlphaCharlie]

هيا فين العربية بقى؟
دا علي الكلام دا حضرتك حتقضي حوالي شهرين بين ميكانيكي وعفشجي وكهربائي وبتاع تكييف. وطبعا لازم يطلع حاجات تانيا.
والله رأيي الفيات من العربيات الي صيانتها صعبة زي السيينا والبترا والبرافا.....
فلو اشتريها متهانة حتتعب كتير.

[ashky5141]

السلام عليكم
عندي برافا 2001 1300 لو حابب التواصل