استفسار من ملاك فيات بونتو

[Kirolos Edward]

اهلاً يا جماعة لو سمحت, كنت عاوز اشتري فيات بونتو موديل من 2000 ل 2003 و غالباً 2000 لان قدامي واحدة 2000
المهم دلوقتي ايه عيوبها المشهورة بعد اول 100,000 كيلو
ايه المشكلة لو رشة حزام من غير سقف؟
ايه انسب سعر للموديل ده -مو2000 و 100,000 كيلو
ازاي اكشف عليها كويس بنفسي او الحاجات الي الاحظها و كدا كدا اكيد هاخدها لميكانيكي لو هشتريها خلاص

معلش طولت عليكم !
و منتظر الرد :)

[Ahmed.MT911]

اهلاً يا جماعة لو سمحت, كنت عاوز اشتري فيات بونتو موديل من 2000 ل 2003 و غالباً 2000 لان قدامي واحدة 2000
المهم دلوقتي ايه عيوبها المشهورة بعد اول 100,000 كيلو
ايه المشكلة لو رشة حزام من غير سقف؟
ايه انسب سعر للموديل ده -مو2000 و 100,000 كيلو
ازاي اكشف عليها كويس بنفسي او الحاجات الي الاحظها و كدا كدا اكيد هاخدها لميكانيكي لو هشتريها خلاص

معلش طولت عليكم !
و منتظر الرد :)

طيب بما اني معايا نفس الموديل اللي حضرتك بتتكلم عليه هنقل ليك الرد اللي كتبته امبارح لانسة كانت بتسال نفس السوال بتاعك تقريبا واسف طبعا علي صغية المؤنث اللي موجودة في الرد ...

بصي يا فندم العربية البونتو دي تحديدا بتكون محتاجة حد حنين في التعامل مع العربية علشان تعيش معاه كويس من غير مشاكل يعني العربية مش بتاعت قرص وجري وكده ،،،،

تاني حاجة لازم لما تشتري العربية دي تبقي عارفة انك مش هتتعامل فيها مع اي ميكانيكي وخلاص زلام يكون مكانيكي متخصص في الفيات وتحديد الحديث منه ، لان لو العربية دي اشتغل فيها ميكانيكي من بتوع الكوري والياباني يبقي عليه العوض في العربية (وعنواين المكانيكية المتخصصين دول موجودة هنا في المنتدي بكثرة ) ، والنقطة التانية انك لازم تبقي عارفة برضه ان قطع الغيار الاصلية بتاعتها موجودة في وسط البلد وشارع شامبيلون تحديد (الكلايني ) والدقي وشارع فيضل ومستعمل في الوكالة وكل حاجة موجودة سواء جديد او مستعمل ،،، وقطع الغيار اللي هتركبيها غالبا مش هترجعي تغييرها تاني لانها معمرة

بأستثناء كده العربية ممتازة في كل حاجة سواء في استهلاك البنزين او التقفيل او التكييف اوالعزل ولو حضرتك بتركبي كوري وغيرتي للاوربي هتشوفي الفرق في التقفيل والامان والثبات علي الطريق كمان

موضوع وحدة التحكم اللي حضرتك سالتي عليه ده بيكون نصيب في الاول والاخر يعني ممكن يعمر مع واحد ويبوظ من التاني وهو المفروض ان العربية في الكاتلوج بتاعها يتغير بعد 100.000 كيلو ، وزي ما بقولك هي نصيب يعني انا معايا العربية عاملة 140.000 والحمد لله ماشية زي الفل ،،، وعلشان تحافظي عليه اوعي اوعي اوعي تغسلي الموتور بالمياه ابدااااااا او تسبيبي حد يغسل بمحلول او كميائي او اي حاجة من العك بتاع البنزينات وكده ، وطبعا الافضل تجيبي عربية ماشية كليو متر قليل علشان تستمعي بالعربية

موضوع السخونة اللي حضرتك بتتكلمي عليه مش عيب شائع في العربية البونتو ،،، ممكن تكون عربية مش مظبوطة او فيها مشكلة في دورة التبريد انما الفيات الحديث عموما مش بتسخن ، وحتي القديم لو مظبوطة مش هتسخن .. انا معايا بونتو موديل 2000 والحمد لله العربية علشان محافظ عليها مش بتسخن سواء في السفر او جوه القاهرة حتي

عموما دوري علي حاجة تكون ماشية كليو متر قليل وان شاء الله ربنا يوفقك


مفيش مشكلة لو العربية راشة حزام من غير سقف ده دليل علي ان العربية الحمد لله مش مقلوبة في حادث قبل كده ...

طبعا لازم تتأكد تماما تماما ان الدواخل سليمة ومفيش فيها خبط في الدواخل خالص

مفيش عيوب تذكر للموديل ده وفي الاول والاخر العربية ده نصيب ورزق من عند ربنا

افضل حاجة تعملها انك تخدها لميكانيكي متخصص في الفيات الحديث وهو اللي يكشف عليها بنفسه وهما موجوين كتير في القاهرة

وسعرها ممكن نقول من 38.000 لحد 45.000 حسب الحالة طبعا والاوبشن اللي فيها لانها فيها اكتر من تصنيف باور وسيتي باور وسنتر وهكذا ،،،،،

شوف لو عندك اي استفسار تاني انا معاك وربنا يوفقك ان شاء الله ويختار ليك الصالح

[Kirolos Edward]

شكراً يا باشا ردك فرق معايا, طيب تقدر تجيبلي لينك فيه عناوين بميكانيكية فيات بونتو لو متجمعين في موضوع؟

[Ahmed.MT911]

شكراً يا باشا ردك فرق معايا, طيب تقدر تجيبلي لينك فيه عناوين بميكانيكية فيات بونتو لو متجمعين في موضوع؟

قولي حضرتك ساكن فين وانا احاول اقولك علي اقرب حد ليك

انا عن نفسي بتعامل مع واحد في فيصل شارع المطبعة من سنتين والحمد لله العربية اداءها ممتاز علي ايده بصراحة