نقاط مهمة جدا علشان ال 128 متحطش فيها مفك إلا كل فين

[strongxx]

انا بقول الكلام ده للناس إلي ناويه تشتري ال 128 أستعمال طبعا

أولا :
بالنسبه للموتور::
يتعمل له عمره نضيفه من ميكانيكي محترم وعارف هو بيعمل ايه
الموتور يتلين وهو واقف حوالي أسبوع
تركب لها بوجيهات 4 شمعة ألماني
تجيب سلك بوجيهات رياضي علشان تلاحق علي البوجيهات ال 4 شمعة
تروح تظبط تاكيهات علطول قبل ما تطلع وتمشي
متعديش سرعه ال 50 ك.م/س لمسافه 200 كيلو متر
وتغير الزيت علطول بعد ال 200 كيلو بزيت شل الاحمر

وبكده حتلاقي الموتور بيشتغل لوحده من قبل ما تدور المارش


بالنسبه للكاربراتير:
تجيب من الأخر كاربراتير جديد يوغوسلافي علطول لا تقولي تعمل عمره ولا تقولي اظبطة عند سيد كاربراتير ولا الفيلم الهندي ده

وبالنسبة للإسبراتير:
تجيبة أيطالي جديد أصلي كهربا علشان تريح نفسك من دوخه الأبلاتين والكوندنسر

بالنسبه للدينامو:
تجيبة جديد طبعا علشان تجيب من الأخر ولا شربون يتحرق ولا تلاقيه فصل شحن ولا الهبل ده. ولو مافيش جديد منه هاته نوع تاني جديد بس يوافق لل 128

بالنسبه للرادياتير:
أشتريه جديد بالمروحه بتاعته ويفضل يكون رادياتير اكبر شويه علشان تأمين تبريد قوي للموتور في عز الحر . بس بصراحه معرفش رادياتير أكبر يبقي نوعه ايه ؟ وتعمل له مفتاح يدوي داخل التابلوه عندك علشان لو المروحه وقفت تشغله علطول لحد ما تروح وتغير الثيرموستات ده لو باظ يعني ... ده لو

بالنسبة للبطاريه:
طبعا حتكون جافة لانك امنت الكهربا المظبوطه وحتريحك كتير جدا

مش حوصيك طبعا علي طرمبه الميه لو عايزه تتغير غيرها وده يرجع للميكانيكي في العمره هو يقولك

بالنسبة للجيربوكس:
تغير أسطوانه وديسك بجديد طبعا وتجيبه انضف حاجه وأوعي تسترخص فيه لانه حيريحك كتير والزيت بتاع الجير بوكس تجيبه تقيل وهو بتاع الزيوت حيفهم الكلام ده

بالنسبه للفرامل :
طبعا الخراطيم حتتاكد منها والماستر لو شاكك فيه واحد في المليون لازم تغيره بواحد تاني جديد لو عرفت تلاقي منه بس التغيير هدفه تأمين حياتك كمان وده لازم طبعا لان العمر مش بعزقه وتختبر قوه الكبس بتاعته علشان تعرف قوته ولو فيه تقصير تعرف منين


ولو انا منستش حاجه يبقي كده الموتور حيبقي معاك وحش متوحش ممكن تحصل بالعربيه ال 150 ويبقي زيك زي الياباني

انا كده بتكلم في قسم الميكانيكا بس علي فكره:b4_048::b4_048::b4_048:

[hamedo0]

[b]
متعديش سرعه ال 50 ك.م/س لمسافه 200 كيلو متر
وتغير الزيت علطول بعد ال 200 كيلو بزيت شل الاحمر

حضرتك تقصد 2000 كيلو مش 200 كليو

................................................
حضرتك بصراحه جبت من الاخر بس ده معناه ان اول ماجيب العربيه اقف بيها عند الميكانيكي عشان يعمل ده كله

[strongxx]

تقف بيها عند الميكانيكي وده لازم علشان تجرب العربيه وهيه شغاله علي الواقف المروحه بتقف الموتور فيه حاجه مش مظبوطه فيه أصوات طالعه من الموتور وكل ده يتعالج علطول اول بأول وتكون تحت ملاحظه الميكانيكي علشان بعد ما تخلص الأسبوع بلاش أسبوعين مش مهم المهم تكون مستلمها علي المفتاح وعلي فكره العربيه حتفضل شغاله حوالي 8 ساعات لا تقل عن كده علشان الشيميز والشنابر تتطبع كويس مع البساتم ومتهربش زيت

وبعدين العربيه كافيه جدا عليها 200 كيلو مائتان كيلو فقط لا غير لانه نص التليين خلص وهيه واقفه وتغير الزيت علطول علشان تصفر العداد وتبدأ بقه نقطه ومن اول السطر وتقول لها بسم الله الرحمن الرحيم وعادي بعد كده تغير لها كل 2000 او كل 3000 مش مشكله زي ما تحب عاملها عادي يعني زي أي عربيه المهم تبدأ وتبني صح في الاول :b4_048:

[linkin2008]

معلش يا جماعة محدش عارف تكلفة الحاجات دى كام؟
وتاخد مصنعية اد اية؟

[strongxx]

بص هو مصنعيه عمره الموتور بتاع ال 128 تقريبا كده علي حسب اخر سعر لاني مش كل يوم بعمل عمره كانت حوالي 200 جنيه

وده يرجع للميكانيكي مش كل ميكانيكي زي التاني وبعدين الأسعار اكيد اختلفت لاني بكلمك في السعر ده لما عملت العمره من حوالي 3 سنين

وبالنسبه لقطع الغيار طبعا مش حتبقي غاليه بالمقارنه بأسعار الياباني والألماني وخصوصا انك حتجيب جديد مش مستعمل أغلب موديلات الألماني او الياباني القديم إلي بعمر ال 128 حتلاقيها مستعمل صعب تلاقيها جديد ولو لقتها حتلاقيها غالية :k40:

[maka]

طاب ما اشترى عربية فاضية احسن و املاها

[ahmedsrs]

انت كده غيرت كل حاجة يعنى مصلحتش كانك جايب عربية زيرو هو على العموم اريح على المدى الطويل

[strongxx]

بالظبط كده يا ماكا

عندك حق

تعرف بقه تجيب لي عربيه فاضية....انا بتكلم بجد

انا من سكان أسكندريه

انا محتاج عربيه بودي بس لا موتور ولا فرش ولا حاجه من دي خالص

عايز أبنيها من اول وجديد واعملها علي أيدي علي رواقه بس يكون ليها ورق طبعا ومترخصة

[maka]

بالظبط كده يا ماكا

عندك حق

تعرف بقه تجيب لي عربيه فاضية....انا بتكلم بجد

انا من سكان أسكندريه

انا محتاج عربيه بودي بس لا موتور ولا فرش ولا حاجه من دي خالص

عايز أبنيها من اول وجديد واعملها علي أيدي علي رواقه بس يكون ليها ورق طبعا ومترخصة

فى حل احسن تجيب عربية واقعة خالص وتاسسها كلها جوه وبره من اول وجديد

[strongxx]

ما هو ده إلي انا عايزه يا ماكا

عايز عربيه واقعة ومش لاقي

ولما اجي أستنضف عربية ألاقي كل الواقع في سكتي سبحان الله

[polo61]

بجد شكرا لصاحب الموضوع معلومات جدا مفيدة
استاذنكم حد يقول لنا لو عايزين نعمل كده فى ال 127 موديل 83 بصراحة صعبان عليي ابيعها اصيلة جدا واشتريت جديدة ولكن عايزة اظبط القديمة وتبقى سواقتها امنة بالذات من ناحية الفرامل
يعنى تتكرموا وتقولوا لى الخطوات بالظبط وانا ان شاء الله هانفذ كل اللى تشوروا عليى بيه ولكم كل الشكر مقدما

[مواطن مصرى]

بالصدفه البحته الاسبوع اللى فات على طول ليا واحد زميلى فى الشغل معاه 128 و بيفكر يعمل لها عمره فدليته على ورشه فى عابدين تعاملت معها كذا مره و راح سال على اسعار و تكلفه حاجات و كان الناتج مرعب جدا

تعالى حضرتك نحسب مع بعض التكلفة

اجزاء المتور (طاقم شمبر و بساتم و شيميز ووصلات ) علشان عمرة الموتور = 700 جنيه

مصنعيه الميكانيكى لعمره الموتور = 300 على الاقل

بوجيهات بوش 4 شمعه = 120

سلك بوجيهات كربون/فحم من النوع الغالى = 100

كاربيراتير جديد سوليكس (ان لقيته) = 500

اسبيراتير اليكترونى صينى (مفيش ايطالى فى السوق) = 150

دينامو استيراد (مفيش الدينامو الفرنساوى الاصلى للعربيه فى السوق) = 150

راداتير نحاس المانى 3 ماسورة بالقميص و المروحه = 300

زرار اضافى للمروحه = 20

بطارية جافه فارتا = 750

طرمبه مياه = 50

طاقم دبرياج فاليو = 250

جوز طنابير فرامل = 100

تيل فرامل امامى و خلفى = 100

هذا بخلاف مصنعيه الكهربائى
و مصنعيه الميكانيكى لتغيير الفرامل و الدبرياج
و مصنعيه فنى الراداتير

الاجمالى كله = 3690 جنيه مصرى

[mahamedaraby]

انا دلوقتى بعمر ال128 حاليا بتاعتى وهبقى اعمل موضوع عنه

ادعولى تخلص على خير

[strongxx]

والله انا فعلا بشكرك علي الأسعار الجميله دي

فعلا كنت محتاج لحد يجيب لي الأسعار الجديدة لأني كنت بتكلم في أسعار قديمه وانت كده وضحت الصوره ليه اوي

عموما برضه مازالت العربية العبقريه دي صيانتها في متناول اليد

يعني تعالي جرب كده تغير عفشة الدايو حتاخد منك لوحدها 3000 جنيه أو عمره للموتور طبعا حتبقي قريبه جدا من السعر ده برضه ويمكن تزيد ونفس الكلام علي الهيونداي والشيفروليه

لكن انت جددت العربية دي من الألف للياء واخدت منك المبلغ ده بس

يبقي مين إلي يكسب في الاخر

الناس إلي بتقول بكره ال 128 علشان هيه معفنه وبتاع ويقعد يرص لك مليون عيب ما هو كل ده بسبب حضرتك لانك مش مهتم بيها وطبيعي تستندل معاك وتقل بأصلها وأي عربيه كده وخصوصا انها عضمه كبيره وعايزه شغل مظبوط

لكن لو ظبتها بنفس المعايير إلي قلنا عليها حتخليها زيرو زي الياباني بالظبط وكمان حتكلفك رخص التراب بالمقارنه بالعربيات التانيه

يبقي مين إلي يكسب البريمو ؟؟؟؟؟

يبقي من حق ناس كتير انها تعشق المعجزه الميكانيكيه دي

[ibrahimsaad]

موضوع هايل جدا

وبصراحه انا بفكر اعمل كده بس لولا ان العربيه معايا كويسه الان لكن لو قلت باصلها هاعمل كده على طول وانا شايف ان عمره كامله بهذا السعر مش كثير

انا باشوف فى العربيات الحديثه تغيير رفرف بس بيكون بالمبلغ ده