سؤال بخصوص حرارة الشاهين ؟؟ مشكلة محيرة ؟؟

[tamer44442002]

السلام عليكم
انا عندى سيارة شاهين 1400 مو 2005 ظهرت بها مشكلة محيرة بالنسبة لى
السيارة عند تشغلها بتسخن منى الى 110 ثم تبدا المروحة تشتغل بس مش بتبرد كويس
وتفضل شغالة الى ان تصل الى 90 ثم تفصل المروحة
ذهبت الى التوكيل فقام بالمعاينة وغير لى الthemostat الخاصة بالمروحة ولم يتحسن الوضع
فقال لى المهندس ان هناك sensore على الكوع الخاص بطلمبة الميه يقوم بفصل دورة المياه عن الرداتير فى حالة ان تكون الحرارة باردة ( فى الشتاء عندما تكون السيارة باردة يساعد فى تسخين السيارة بسهولة عند استعمالها ) وهو ده اللى عامل المشكلة دى عندى
فقلت له خلاص بلاش منه وشيلوه خالص قال لى لا بلاش علشان تساعدك فى الشتاء
- طب غيروه
- لا هو سليم بس فى الصيف بتبقى دورة المياه مش مظبوطه
- طب الحل ايه يا باشمهندس
- ححاول اوسع الفتحة بتاعة الكوع علشان يمر مياه اكتر
- تمام
وبعد ساعتين استلمت العربية لقيتها زى ما هى
ومش عارف اعمل ايه ؟؟؟؟
على فكرة السنة اللى فاتت فى نفس شهر اغسطس حصلت المشكلة دى بس ما كونتش فاهم ايه المشكلة دى فودتها التوكيل وسبتها واستلمتها بس كانت كويسة
ولما قولت الكلام ده للمهندس قال لى ايوه يبقى احنا زودنا الفتحة بتاعة الكوع وان شاء الله حتبقى تمام مع الوقت
يا ريت حد يساعدنى ويقولى على حل مناسب علشان انا مش عارف اعمل ايه
اخوكم تعبان ياجدعان
افيدوناااااااااااااااااااااااااااااااااااااااااااا ا

[فادى]

لا أعتقد أن السيارة بتسخن لحد 110 فهذه الحرارة لا يحتملها المحرك و أعتقد أن المشكلة فى عداد الحرارة و السبب انو ملمس مع سلك البطارية.
فمادامت دورة التبريد قادرة على خفض درجة الحرارة الى 90 درجة فهذا معناه أن دورة التبريد تعمل بكفاءة. أنا أعتقد ان المشكلة فى أمبير الحرارة و يمكنك التأكد من ذلك بواسطة تشغيل الأنوار و ايقافها و ملاحظة تغير الأمبير فاذا لاحظت أن الأمبير يزيد مع تشغيل الاضاءة اذن المشكلة فى الأمبير و فى هذه الحالة لا تقلق لأن السيارة فى الحقيقة لا تسخن بل الأمبير هو الذى بعطيك قراءة خاطئة. و أى كهربائى ممكن يعملك القصة دى.
الاحتمال الثانى انو يكون الثرموستات بايظ اما الثرموستات الأساسى أو ثرموستات الشتا و فى هذه الحالة كل ما عليك هو تغييره عند أى كهربائى أو شيل ثرموستات الشتا و عربيات كتير بتمشى من غيره ملوش لازمة لانه معمول عشان البلاد الى فيها تلج.

[فادى]

المشكلة نفسها كان بيعانى منها واحد صاحبى معاه بلونيز و برضه الميكانيكى قالو ده ثرموستات و غيرلها الثرموستات مرتين و فى الأخر طلعت المشكلة أمبير الحرارة

[ahmed1981]

من عرضك للمشكلة توصلت للآتي:(معندكش مشكلة)
طالما المروحة بتشتغل والحرارة بتنزل وبعدين المروحة بتفصل وبما أن مية الرادياتير كويسة

لو كده يبقى كله تمام ومتقلقش نفسك ومتفتحش عربيتك ومتخليش حد يلعبلك فيها

[sab3aawy]

بص،

اللى انت بتتكلم عليه ده يشبه كثير اعراض ردياتير مسدود

لو عايز رأييى فى القصة دى اقترح عليك تسلك الردياتير الاول قبل ما تفكر تعمل اى حاجة تانية

وبعد ما تسلك الردياتير استعمل مياه خضرء (يجب ان تتاكد انها تحتوى على الإيثيلين جليكول)

ولو عايز تتاكد ان ال110 دى حرارة الميه فعلا ولا تهييس من العداد فهناك طريقة لكن تحتاج لحذر شديد جدا، إفتح غطاء الردياتير نص فتحة بمنتهى الحذر وواحدة واحدة وانت واقف بعيد عنه وماسك الغطاء بفوطة اثناء ما يكون الموتور شغال والعداد قارى 110، لو الردياتير ضرب بخار ميه يبقى فعلا 110، لو ملقيتش الردياتير ضرب بخار تبقى الحرارة اقل من 100

لو ده مجابش معاك نتيجة نفكر فى الخطوة التالية، حاليا مش هقوللك ان الخطوة التالية هى مرجعة ظبط التاكيهات علشان مسببلكش لخبطة :lol: :lol: :lol:

[ahmed1981]

يا جماعة لاحظوا الراجل بيقول المروحة بتشتغل على 110 وبعدين الحرارة تنزل 90 والمروحة تفصل
أنتم فاهمين طبعا إن المروحة بتشتغل على الثيرموستات اللي هو غيره وملهاش علاقة بالأمبير
وطالما المروحة بتشتغل وبعدين الحرارة تنزل والمروحة تفصل
يبقى الأمبير مش دقيق (طالما المشكله حصلت ولما غير الثرموستات لم يحدث تغيير)

[شريف]

ذهبت الى التوكيل فقام بالمعاينة وغير لى الthemostat الخاصة بالمروحة ولم يتحسن الوضع

فى نوعين نوع بيشتغل عند درجة حراره قليلة (يشتغل عند 85 و يفصل عند 65 ) و نوع تانى بيشتغل عند درجة حراره اعلى
جرب البيشتغل عند درجة حراره قليلة (التركى ب 15 جنية)

[sab3aawy]

يا جماعة لاحظوا الراجل بيقول المروحة بتشتغل على 110 وبعدين الحرارة تنزل 90 والمروحة تفصل
أنتم فاهمين طبعا إن المروحة بتشتغل على الثيرموستات اللي هو غيره وملهاش علاقة بالأمبير
وطالما المروحة بتشتغل وبعدين الحرارة تنزل والمروحة تفصل
يبقى الأمبير مش دقيق (طالما المشكله حصلت ولما غير الثرموستات لم يحدث تغيير)

مش شرط ان ده يكون تهييس من الثرموستات

لو الميه قليلة فى الدورة (بسبب انها ناقصة او الدورة فيها هواء وا فيه سدد فى مكان ما فى الردياتير) نفس المشكلة دى هاتحصل

لأن لما تكون المية قليلة فمعنى ذلك انها هتسخن جدا فى المحرك لقلتها فتسبب قراية مرتفعة جدا لعداد الحرارة الموجود فى وش السلندر اكثر نقاط مياه المحرك سخونة، وفى نفس الوقت هاتبرد جدا فى الردياتير برضه نظرا لقلتها فتطل لثرموستات المروحة الموجود فى قاع الردياتير ابرد نقطة فى الدورة وقد بردت تماما فلا يعمل ثرموستات المروحة، إلا عندما تسخن المياه بصورة عالية جدا تجعل حرارتها فى ابرد نقطة فى قاع الردياتير كافية لتلقيط ثرموستات المروحة وتشغيله،

ولذلك فانا اول حاجة اقترحتها عليه انه يسلك الردياتير حتى تعمل الدورة بكامل كفائتها وبكامل سعتها من الماء

[ahmed1981]

الله ينور عليك يا باشمهندس sab3aawy

[محمد علي]

من الاخر

الشاهين بتولع وخصوصا في الطرق السريعة زي الصحراوي ولكك الحلول الممكنة طالما ان العربية لسه جديدة ومفيش صنيعي مخرب مد ايده فيها

غير ردياتير بواحد الماني يكون 4 ماسورة وان كان مفيش يبقى خليه 3 ماسورة

غير ترموستات الحرارة بتاعة الردياتير وركب واحد بس يكون نظيف مش مغشوش يبدا الشغر من درجة منخفضة

اخلع الترموستات اللي في الكوع وابقى اصبر عليها في الشتاء شوية الصبح عشان خاطر تسخن

[ymoniem]

السلام عليكم انا عندي شاهين 2005 و بشتكي من نفس المشكله
الحراره 110 و كمان بتزيد عند تشغيل الانوار في الليل

و كنت جربت الاتي عشان تريح نفسك
1- ثرموستسات الحراره بنوع جيد و لكن نفس درجه التشغيل
2- حساس الحراره اللي ف الموتور
3-الغاء ثرموستات اللي ف الكوع
4- تسليك الردياتير تم الفك و تنظيفه بسيخ حديد
5- غيرت سلك الارضي بتاع العربيه
6- غيرت ماء الردياتير باخر مستورد

المهم ف النهايه الموضوع زي ماهو بس اللي مطمني الاتي
1- الميه اللي بتنقص م الردياتير طبيعيه (حاجه بسيطه خالص )
2-مفيش زيت بينقص او يتبخر علي الموتور الا الطبيعي

ولذا اعتقد ان الموضوع كهربائي 100%
ياريت لو هاتجرب تبدأ من بعد هذه الخطوات و انسي موضوع التوكيل و جرب كهربائي كويس و اعمل حسابي معاك

[bmwx5]

بس انا عندى شاهين بس انا كان عندى نفس المشكلة تقريبا بس ان الثرموثتات ماكنتش بتستحمل حاجة واحد سواق قلى على فكرة بيعملوها اصحاب التاكسى نغير المروحة بمروحة بتركن على البطرية على طول يعنى بتشتغل مع تشغيل الماتور على طول والحمد الله انا مركبها من 3سنوات و العربية ماسخنتش ولا مرة من خالص مع العلم انى كان عندى مشكلة فى الطرنبة كنت بتنقط المياة فى خلال ساعتين وكنت بامشى بيها طول اليوم من غير ما تسخن بس فى الشتاء حتحتاج تسخن العربية كويس قبل ما تطلع بيها