أرجو المساعدة فى نصر فلوريدا

[eng_mkhalaf]

يا جماعة أنا عندى عربية نصر فلوريدا 1400 سىسى وبصراحة أنا مش شابف فيها أى مشكلة ومريحانى وصيانتها سهلة بأذن اللة على الرغم من انا بعتيبرها من العربيات الرديئة الصنع إلى حد ما ولكن على رأى المثل على قد لحافك مد رجلبك :lol:
بس المشكلة الحقيقية هى قطع الغيار مش متوفرة ولو لقيت حاجة فى التوكيل هتلاقيها غالية يعنى سعرها مبالغ فية :( . بس أنا بعرف أظبط قطع الغيار الميكانيكية لأنها عبارة عن خليط من العربيات الفيات زى 128 و التمبرا بالأضافة للادا لكن الصداع الرئيسى هو قطع الغيار الخارجية زى الفوانيس والصاج والأكصدامات مش لاقيهم.
أنا رحت التوكيل بتاع شركة النصر قلولى مفيش حاجة وأحنا أضحك علينا من شركة يوجو مصر ودباسنا فى العربية دية :shock:
فرحت توكيل مصريات لقيت الفانوس اللى ورا شمال بالعافية ومفيش غيرة فى الفوانيس كلها وكان كان سعرة غريب عارفبن كام 341.25 جنية :shock: يعنى أستهبال علنى وأية كمان توكيل مصريات هيقفل وهيتباع فعملين يصفو كل حاجة يعنى مش هيبقى فى توكيل صيانة خالص لزوبة (عربيتى الموقرة) :D
وكل دة وتوكيل يوجو ودن من طين و ودن من عجين
أسف يا جماعة للأطالة ولكن أنا حبيت أشرح الموضوع بكل تفاصيلة.
ممكن تساعدونى يا جماعة فى أى حد عندة قطع الغيار حتى ولو أستيراد أقدر أتعامل معاة لأنى بصراحة بحب العربية دية ومش عايز أبيعها . شكرا

[Nader]

صعب اوي انك تلاقي اي حاجة للفلوريدا استيراد، دة لة لقيتها في التوكيل اصلاً بغض النظر عن الاسعار.

انا شايف للاسف انك تبعها وتجيب عربية تانية في نفس الرانج بتعها ولتكن شاهين مثلاً وبعدين تحاول تحبها علر راحتك خلصاً انك هتلاقي قطع غيارها في كل مكان ورخيصة وفي منها الجديد والاستيراد.

[PAYOO]

أنت كده ربنا يعينك وهاسألك في الحرفيين ولو لقيت أي حاجه هاقولك على طول

[hazem_khidr]

راي من راي نادر برضه انك مش حتلاقي قطع غيار و الاحسن بيعها و هات عربيه ليك و للسوق بمعني عربيه تشتريها و نا تتعبش في صيانتها و تبيعها باقل مجهود و ما تخسرش فيها.انما الفلوريدا ما اعتقدش انها عربيه مجزيه لانك تصرف عليها من غير امل.
حاول تشوف قطع غيارها عند الكيلاني اللي في وسط البلد كده عنده كل حاجات الفيات

[eng_mkhalaf]

ممكن يا حازم عنوان الكيلانى بالضبط

[hazem_khidr]

هو مشهور اوي يا mkhalaf في شارع شامبليون اللي ورا ماجد ولطفي بتاع توكيل مازدا القديم.
روح المنطقه دي عند ابو طارق بتاع الكشري هو قريب منه اوي

[eng_mkhalaf]

أنا هعدى علية يوم الخميس ويا رب ألقى عندة حل

[eng_mkhalaf]

ويا ريت كذا عنوان لأى حد ممكن نلاقى عندة قطع الغيار علشان قرار البيع دة أنا مخلية أخر حل ممكن أعملة

[tandeshaker]

بيع واتكل على الله

[eng_mkhalaf]

خلاص أنا ببيع دلوقتى بس لما أبيع أن شاء اللة تنصحنى أجيب أية علشان مقعش فى المطب دة تانى

[Nader]

على حسب رغباتك وفلوسك، يعني لو عاوز عربية دفع خلفي تستحمل طرق مكسرة ومدقات يبقى هات شاهين او لادا 2107 ودول قطع غيارهم مرمية في كل حتة ورخيصة جداً. اما لو عاوز عربية ناعمة وحديثة يبقى تجيب لانوس في نفس السعر تقريباً بالنسبة للمستعمل او فيرنا اغلى شوية.

[eng_mkhalaf]

يبعنى يا باشا لو حتة شاهين أستعمال خفيف تعمل كام - وهل يمكن تكون مكيفة لأن التكييف مهم أقوى دلوقتى وكمان فى واحد صاحبة بيقلى على جولف 3 موديل 92 تكون فى حدود 52000 إلف ودة أخرى بصراحة على العموم أنا تحركاتى مش كتير أوى بالعربية ولما بتحرك بيها غالبا بيبقى سفر وكمان أنا مش غاوى أروح للميكانيكى كتير

[Mina W]

ممكن السوزوكى التو فى رانج السعر ده و بتكون مكييفة، لو اعلى فى الشاريد و البيكانتو و انا اقدر اقول ان البيكانتو هتكون عربية حلوة جدا و مناسبة للطلبك عن تجربة

[eng_mkhalaf]

بس التوكيل فية مشاكل كتير -- مش عايز أوجع دماغى تانى وكمان أنت قصدك زيرو ولا مستعمل

[Nader]

الجلف عربية ممتازة طبعاً ومحدش يقدر يقول في حقها حاجة, بس بما انك مش بتحب تروح للميكانيكي كتير يبقي متجبش حاجة من 92 لانها في الغالب هتبقى فاتحة بقها. بالمبلغ اللي معاك دة تقدر تشتري شاهين 1400 زيرو "بدون تكيف بس ممكن تركب عليها تكيف بمعرفتك" او لو مستعمل السعر دة يجبلك فيرنا او لانوس بحالة ممتازة وفي النهاية الاختيار يرجع لك ولنوعية استخدامك زي ما قلت لك.