تكييف التمبرا : رحلة عذاب لتظبيطه

[ZALABANY]

انا عربيتي تمبرا 94 الإيطالي التكييف بتاعي شغال وتمام بس كان محتاج شحن المهم رحت لواحد بتاع تكييف قالي هو محتاج شحن فريون ومحتاج فاكيوم بتاع الكاربيراتير عشان الفاكيوم اللي فيها بايظ
المهم دخت عشان الاقي الفاكيوم ده ما لقيتهوش خالص سالت محمد يوسف قالي ب 600 جنيه ومش موجود وسالت عند الكيلاني قالي 350 ومش موجود ولفيت التوفيقيه كلها مش موجود المهم نزلت على الوكاله لفيت عليه ما بيتباعش لوحده بيتباع كاربيراتير كامل على بعضه استيراد المهم في الاخر قلت مش مشكله اشتري كاربيراتير كامل ومش هايخسر اخدته من الراجل ب350 جنيه وطلعت على بتاع التكييف في الهرم قالي ده بتاع الانجيكشن ومافيهوش فاكيوم رجت الوكاله دي تاني مره جابلي العادي وقالي ده ب 500 جنيه لأنه بيركب على الشاهين المهم خدته ب 425 ورحت للراجل قالي الفاكيوم بتاعه ماسوره واحده بس هي اللي شغاله
رحت رجعته وفي الآخر اشتريت الفاكيوم بس من واحد في العمرانيه في الهرم اشتريته ب 100 جنيه استيراد بس ماسوره واحده لانه بتاع التمبرا اللي مش مكيفه المهم وديته لبتاع التكييف ركبه وقالي هاتشغل التكييف لكن مش هاتشغل الشفاط الوتوماتيك قلتله مش مشكله

المهم بدأ بتاع التكييف شغل ركب الفاكيوم وشحن تمام
ولكنه اكتشف اكتشاف هام ان كل العلاقه التي بين التكييف ومروحة الرادياتير مقطوعه وقالي ان المفروض ان المروحه تشتغل على السرعه البطيئة طول ما التكييف شغال ده عن طريق مقاومة المروحة ولو العربيه سخنت بتشتغل على السرعه العاليه المهم ركبلي كتاوت وظبط الدايره بتاعة التكييف وبقت شغاله مع المروحه تمام كده خلاص ظهرت مشكله تانيه لما ابطل العربيه مروحة التكييف بتشتغل يعني لما تحط ايدك على فتحات التكييف تلاقيها بتجيب هوا المهم الولد الصنايعي والمهندي قالولي هانقلب الكهربا بتاعتها المهم المهندس قالي ان كده في الغالب في مشكله في الفبره بتاعة الكونتاكت هي اللي بتعمل كده او في الكنترول بتاع التكييف فقاموا وصلوه دايركت على الكونتاكت انا بصراحه مش فاهم بالظبط ايه اللي حصل بس المشكله اتحلت وبقيت ابطل العربيه المروحة ما تشتغلش بس لمبة زرار off بتنور والعربيه مبطله ولما اجي ادور التكييف يشتغل للحظة مسافة ما بدور العربية وبعد كده يفصل انا مش عارف هو كده صح ولا غلط

ملاحظة الولد بتاع التكييف قالي ممكن فاكيوم الشاهين يركب عليها بس مش عارف ده صح ولا لا
التكلفه الكليه للقصه دي 180 جنيه شحن
120 جنيه مصنعية
100 جنيه الفاكيوم
وطبعا تفويلة بنزين عشان 3 مشاوير من الهرم لوكالة البلح رايح جاي
معلش انا طولت عليكم بس عايز رأيكم
ولتعم فائدة التجربة للجميع
شكرا

[abdelmessih67]

أهلا يا أخ زلباني

الله يكون في عونك أنا لو منك كنت مشيت بالعربية من غير تكييف .

بالمناسبة أنا رايح أشحن التكييف بتاع التمبرا بتاعتي عند الراجل اللي شرحت لك مكانه في شارع ترسا فهل هو نفس الشخص اللي صلحت عنده و الا واحد ثاني ؟؟؟؟

بالمناسبة أنا لي عدة استفسارات ؟

1 - أنا عندي التكييف يعمل فقط عندما ترتفع حرارة المحرك أكثر من 70 درجة
يعني بأسخن العربية و بأمشي بيها مسافة و أحيانا لو الشارع فاضي بأمشي مسافة كبيرة علبال ما الحرارة تعدي الخمسين درجة لهذا عندما جربت التكييف لاول مرة و لم يعمل أتخضيت قلت مش شغال و بعدين وقفت في اشارة 5 دقائق رفعت حرارة الموتور ل 70 درجة قلت أشغله لقيته اشتغل لكن هواء عادي لانه محتاج شحن من الركنة فهل هذا الامر فيه خطأ من التكييف أم لا ؟؟؟؟؟

2 - ما هو الفاكيوم هذا و ما دوره ؟؟؟؟؟

3 - فين الراجل بتاع العمرانية اللي جبت من عنده الفاكيوم ده ( اللي انا مش عارف هو ايه أصلا ) ب 100 جنيه ؟؟؟؟؟ علشان أحتياطي لو أطلب مني نفس الشئ .

[ZALABANY]

بص يا باشا الراجل ده موجود في شارع ترسا لو انت جاي من ناحية المريوطيه هايبقى على يمينك بعد التوحيد والنور الورشه إسمها آل سعيد لتبريد وتكييف السيارات الناس هناك فاهمه كويس على فكره وابن صاحب الورشه مهندس تكييف وتبريد والولد الصنايعي اللي بيشتغل أستاذ
بالنسبه لموضوع تشغيل التكييف بعد ارتفاع درجة الحراره المفروض ان التكييف مالوش علاقة بدرجة حرارة الموتور وكده ممكن يكون في حاجه مش مظبوطه في الدايره عامة هما هايكشفوا عليه وهايظبطهولك
وبالنسبه لانه ما بيطلعش هواء ساقع فده لأنه من الركنه الفريون بيتسرب ويبقى اللي موجود هواء عادي عشان كده مش بيسقع
بالنسبه بأه للفاكيوم بعد رحلة عذاب وشراء 2 كاربيراتير استيراد والبحث عنه جديد ثم شراء فاكيوم سياره تمبرا عاده وتركيبه استيراد برده
الفاكيوم ده جزء صغير كده بيبقى راكب على الكاربيراتير طالع منه ماسورتين بالنسبه للعربيات المكيفة وماسوره واحده للعربيات الغير مكيفه وظيفته حاجتين رفع معدل البنزين لما بتشغل التكييف كأنك دايس سنه بنزين والحاجه التانيه تسخين السياره في الصباح بشكل أوتوماتيكي عشان كده العربيه المكيفه ليها ماسورتين واحده للتكييف وواحده للسخان انا مالقيتش غير اللي بماسوه واحده وركبتها على التكييف المفروض الماسوره دي لما بتشفط الهواء منها في دراع بيتحرك اذا الدراع ده ما اتحركش يبقى بايظ

الراجل اللي جبته منه في شارع الثلاتيني
عنوانه 12 ش السلام من شارع الثلاتيني العمرانيه الغربيه هاتلاقي على الناصيه فكهاني وجزاره اسمها جزارة ابو الغيط وفي وش الشارع برج جديد بيتبني
تليفونه0101317839 واسمه محمد عمر
يارب أكون أفدتك
صحيح في حاجه مهمه نسيتها وياريت الأخوه يصلحولنا المعلومه لو حد عنده علم
بتاع التكييف قالي كان ممكن الفاكيوم بتاع الشاهين يركب على كاربيراتير التمبرا بس انا مش عارف هل ممكن ولا لا لأنه لو ينفع أكيد فاكيوم الشاهين موجود وارخص من التمبرا كمان

[ZALABANY]

إيه يا رجالة التمبرا إنتو نايمين ولا ايه الموضوع من امبارح مافيش غير واحد بس اللي علق عايز اراءكم عشان هاروح لبتاع التكييف تاني يشوف لو في مشكله يظبطها

[galilio_mad]

معلش يا عم زلابانى
ممكن تصورلى الكربراتير و اللى حواليه صور واضحه لو سمحت

وواضح ان فى مشكله فى التوصيلات و الصنايعيه بيقفلوها اى حاجه المهم تشتغل وخلاص

مع احترامى الشديد , كتير قوى اللى انت عملته ده
لو على ماسورة الفاكيوم التانيه كنت تجيب مشترك ب 3 جنيه يحللك القصه انما انك تجيب كربراتير دى بعيده شويه

[ZALABANY]

ما هو المشكله اني ما فهمتش القصه الا متأخر وبتاع التكييف قالي الوصله الثلاثه ماسوره دي ما بتشتغلش كويس بس انا برده مش مقتنع بالكلام ده

[abdelmessih67]

أهلا بالاخ زلباني

بص يا باشا الراجل ده موجود في شارع ترسا لو انت جاي من ناحية المريوطيه هايبقى على يمينك بعد التوحيد والنور الورشه إسمها آل سعيد لتبريد وتكييف السيارات

هو تقريبا نفس الشخص او ورشة قدامه لان الثاني على ناصية شارع اسمه شارع العمدة و أنت جاي من المريوطية برضه .

وبالنسبه لانه ما بيطلعش هواء ساقع فده لأنه من الركنه الفريون بيتسرب ويبقى اللي موجود هواء عادي عشان كده مش بيسقع

أنا توقعت كده برضه لكن ليه الفريون يتسرب من الركنة هو مش المفروض أن دايرة الفريون محكمة أم ان هناك احتمال لوجود تسريب في السربنتينة .

الفاكيوم ده جزء صغير كده بيبقى راكب على الكاربيراتير طالع منه ماسورتين بالنسبه للعربيات المكيفة وماسوره واحده للعربيات الغير مكيفه وظيفته حاجتين رفع معدل البنزين لما بتشغل التكييف كأنك دايس سنه بنزين والحاجه التانيه تسخين السياره في الصباح بشكل أوتوماتيكي عشان كده العربيه المكيفه

أنا يهيئ لي أن عندي شغال و كذا وحدة الرفع لان لما شغلت التكييف بعد زيادة سخونة المحرك كما قلت لك كنت واقف في الاشارة و لقيت بدال البنزين بينزل لوحده حاجة بسيطة و لقيت صوت الموتور بيعلى و عموما شكرا للافادة
و ربنا يستر و تكون العملية عندي شحن فقط

[muhmado_furp]

السلام عليكم
استاذ زلاباني
اولا مبروك ياجميل علي تشغيل التكيف بس انا هقولك علي حاجه كانت معايا وفضلت تحصل لغاية لما بدأت اشتغل في العربيه
اول حاجه كان التكيف عندي لما بطفي العربيه خالص تفضل لمبة الاوف
منوره ومكنتش عارف السبب
وبعد كده التكيف كان بيشتغل لوحده
المهم كل ده اتحل لما غيرت وحده التكييف الي هيا في صدر العربيه وهيا دي
الي بتظبطت المروحه مع تشغيل التكيف بالسرعات الي انت بتقول عليها

دلوقت عندي التكيف بيشتغل اتوماتيك مع الكونتاك بس ده بعد ماغسلت حوض العربيه بالميه
ونسيت اغطي وحده التكيف فلو جه عليها ميه بتعمل مشاكل

وبعد فترة رجعت لطبيعتها
وبعدين لما بفصل البطاريه وارجع اركبها تاني تعمل نفس الموضوع

حخلاصة الموضوع
ان ممكن وحدة التكيف تكون فيها مشكلة عندك والله اعلم

[ZALABANY]

السلام عليكم
استاذ زلاباني
اولا مبروك ياجميل علي تشغيل التكيف بس انا هقولك علي حاجه كانت معايا وفضلت تحصل لغاية لما بدأت اشتغل في العربيه
اول حاجه كان التكيف عندي لما بطفي العربيه خالص تفضل لمبة الاوف
منوره ومكنتش عارف السبب
وبعد كده التكيف كان بيشتغل لوحده
المهم كل ده اتحل لما غيرت وحده التكييف الي هيا في صدر العربيه وهيا دي
الي بتظبطت المروحه مع تشغيل التكيف بالسرعات الي انت بتقول عليها

دلوقت عندي التكيف بيشتغل اتوماتيك مع الكونتاك بس ده بعد ماغسلت حوض العربيه بالميه
ونسيت اغطي وحده التكيف فلو جه عليها ميه بتعمل مشاكل

وبعد فترة رجعت لطبيعتها
وبعدين لما بفصل البطاريه وارجع اركبها تاني تعمل نفس الموضوع

حخلاصة الموضوع
ان ممكن وحدة التكيف تكون فيها مشكلة عندك والله اعلم

كأنك بتكلم على عربيتي انت تقصد الوحده اللي فيها فيوزات التكييف اللي قدام علي اليمين ورا الكشاف
عامة انا رجعت للراجل النهارده لأن الفاكيوم كان بيعلق والعربيه بتبطل حطلي ليه تخشينه وقالي الافضل انك تجيب الاصلي بتاعها
وبالنسبه لموضوع الكهربا والوصله اللي عملها قالي انه لما فتح لقى في شغل معمول وحد راشش اسبراي تنضيف جه على فبرة الكونتاكت وهي السبب في القصه دي ولو غيرناها الدنيا هاتبقى تمام

يؤال رفيع هو ان لمبة الأوف تنور والعربية طافيه ده طبيعي ولا لا
حد يقولي مكان اجيب منه الفاكيوم الأصلي بتاع العربيه الاتنين ماسوره او لو في اي فاكيوم تاني ممكن يركب مكانه الشاهين مثلا
وفبرة الكونتاكت دي تتجاب جديده ولا استيراد وتمنها حوالي كام

[ZALABANY]

يا شباب بدور على فاكيوم تمبرا جديد استيراد ياريت لو حد يعرف حد بيبعه يقولي في اي حته حتى لو في بورسعيد هابعت اجيبه

[galilio_mad]

يا شباب بدور على فاكيوم تمبرا جديد استيراد ياريت لو حد يعرف حد بيبعه يقولي في اي حته حتى لو في بورسعيد هابعت اجيبه

يا عم الحاج مفيش حاجه اسمها عايز فاكيوم

الفاكيوم Vacuum بيتولد نتيجة عمليه شفط الهوا من خلال المانيفولد بتاع الموتور , و استخدامه الاساسى تشغيل سيرفو الفرامل

اللى انت عايزه ( سويتش / سولنويد / وحدة ) اللى بتعلى الموتور مع تشغيل التكييف
دى صوره قريبه من بتاع التمبرا

http://www.allproducts.com/ee/gwoyng/Product-200879164047-s.jpg

[ZALABANY]

لا يا جليليو مش دي الحته اللي أنا محتاجها الجز اللي بايظ بلاش ياعم فاكيوم مع ان بتوع التكييف بيقولو عليه كده هما بيقولو عليه جفرنر أو كفرنر الميكانيكيه و وبتوع التكييف بيسموه كده وهو عباره عن مكعب طالع منه ماسورتبن بيتركب فيهم خراطيم الهواء والناحيه التانيه دراع واصل على الكاربيراتير بيعليه وده في الكاربيراتير العادي فقط الإنجيكشن مش موجود فيه القطعه دي أصلا والوحده دي ما بتتوصلش بأي حاجه كهربا هي بتبقى جزء من الكاربيراتير

[ZALABANY]

http://www.fiatforum.com/attachment.php?attachmentid=37763&d=1202103611

القطعة المطلوبة هي القطعة رقم 4 بس 2 ماسورة اللي في الصورة ماسوره واحده