حساسات البونتو

[SmartMega]

السلام عليكم
طبعا اي حد يقرأ العنوان يستغرب .. يعني إيه حساسات البونتو وهو أصلا البونتو ليها حساسات أصلا ...أنا مسمعتش عن الكلام ده غير في الابيزا
علي العموم هو ده اللي أنا عايز أعرفه
امبارح الصبح كنت رايح الشغل ( المفروض اني كنت رايح بالعربيه ) وفعلا نزلت الساعه 6.30 صباحا علشان شغلي في 6 أكتوبر وأنا ساكن قبل حلوان بشويه المهم نزلت ودورت العربيه لحد ما سخنت ( الميه تمام .. والزيت لسه متغير .... والتانك مليان )
وجبت الأول وطلعت بالعربيه ( كل شيئ تمام ) جبت التاني ( كويس) .. بدوس بقي دبرياج وبنقل علي التالت فلحظتها العربيه فصلت خالص .. أنا أستغربت كل حاجه تمام المهم آجي بقي أدور العربيه تاني ... أنها تدور ...أبدااا ( سبحان الله ) لاقيت نافسي هتأخر علي الشغل قمت راكنها ومشيت لحد محطه المترو وواخدها مواصلات وقولت لما أرجع أبقي أشوف حكايتها إيه .... المهم أنا أصلا الميكانيكي بتاعي في أمبابه وانا في حلوان قولت قبل ما أكلمه أجيب واحد ميكانيكي جنبي يبصلي عليها قولت هي أكيد قاطعه كهرباء ... المهم جيه الأفندي وقعد يتشقلب شويه ويبص فوق ويبص تحت ويلعب في الفيوزات ويفك فيوز فيوز ويبص فيه ويركبه تاني .... والظريف بقي لاقيته بيطلع الجهاز بتاع الأنذار وبيبصله كدا بأستغراب وعايز يفكه لولا اني كنت واقف جنبه ولحقته قولتله دا الأنذار ياباشا قالي والله ؟ المهم علشان مطولش عليكو بعد ما قعد يعك ويفك ولاقيته مش عارف قولتله شكرا هاتصرف أنا ومشيته
المهم بقي أنا أتصلت بالميكانيكي بتاعي وحاكيتله علي القصه .. قالي ياباشا الموضوع بسيط جدا .. حساس الكرانك يتغير والعربيه هاتدور علطول هابعتلك واحد من عندي يجيبهولك ويركبوا علطول .... المهم بسأله علي الحساس ده بكام قالي في حدود 250 او 300 جنيه ( بصراحه معيش فلوس حاليا ) فقلتله اوك هابقي أكلمك تاني وزقيت العربيه لحد البيت وغطتها
بصراحه مش عارف أعمل إيه لو حد عنده خلفيه عن الموضوع ده يفدني وعلي العموم انا أتصلت بالكيلاني بس محدش رد عليا تقريبا هم بيبقوا قافلين يوم الحد

[SmartMega]

إيه ياجماعه محدش عارف يفيدني في الموضوع ده ولا إيه

[zeyad1810]

البونتو فيها حساسات طبعا بس هو انت عربيتك موديل كام ؟
النهاردة الاحد مش هتلاقى حد بتاع قطع غيار ابقى اسال بكرة وقولنا سعرة اية ؟
بس الاول ماينفعش الميكانيكى يحكم على العربية بالتليفون فياريت ماتشتريش حاجة غير لما تتاكد ان حساس الكرنك هو اللى عاوز يتغير الاول
انت لما بتشغل الكونتكت نور التابلوة بينور معاك هو ولمبة البطارية وباقى اللمب وللا قاطعة كهربا خالص وبتلف المفتاح ومفيش اى حاجة ؟

[SmartMega]

كل حاجه بتشتغل كاسيت ونور والزجاج كهربا برده بيشتغل
العربيه موديل 2000 ولما بلف المفتاح العربيه بتفضل تعمل الصوت زي ما تكون هاتدور بس مبتدورش

[SmartMega]

سألت الكيلاني قالي ان حساس الكرانك عنده ب 160 جنيه للبونتو 2

[amirhamed]

اللي اعرفه ان الفيات فيه حساس للكرنك وانه فعلا بيعمل اللي حصل معاك بالضبط.
والكلا م دا حصل في عربيه سيينا 2003.
فممكن فعلا ان البونتو فيها الحساس دا.
وياريت الاول الميكانيكي يشفلك حساس قديم لو عنده يجربه الاول قبل ما تشتري .

[zeyad1810]

سألت الكيلاني قالي ان حساس الكرانك عنده ب 160 جنيه للبونتو 2

دة كدة بنص تمن اللى الميكانيكى قالك علية
يبقى اشترية انت وخلى تالميكانيكى يركبة بس
دة تليفون محل اسمة الموجى فى الحرفين هو جنب محل مشهور هناك اسمة الطيار بتاع مسامير ودة رقمة 0226974394 اسال على الحساس ممكن يكون عندة ارخص لانى كنت بجيب من عندة ارخص من الكيلانى
وكمان انت ممكن تنزل الحرفين وتخلى اى ميكانيكى يركبهولك علشان تتطمن ان المشكلة اتحلت ولو ماطلعش العيب منة ترجعة للمحل تانى انا دايما بعمل كدة وهما ناس كويسة