سؤال مهم لخبراء المنتدى عامة والأستاذ / حازم خضر خاصة

[TAMER LOTFY]

سؤال مهم لخبراء المنتدى عامة والأستاذ / حازم خضر خاصة
أمامي سيارتين هما
1- فيات 132 موديل 1981 موتور 2000 سي سي بكماليات ( تكييف + باور + سنتر لوك + زجاج كهرباء ) موتور 2 كامة عامل عمرة جديدة وصوته مش موجود ( ناعم جدا" ) حالتها نضبفة عفشة ممتازة مفيهاش برومة طبقا" للناس اللي شافوها ( الصنايعية ) ومعروضة بسعر 25000 جنية .
2- دوجان موديل 1992 موتور 1600 سي سي بنفس الكماليات السابق ذكرها وحالتها تعتبر نضيفة بإستثناء المساعدين عاوزين يتغيروا والدهان الخارجي فيه شوية تقشيط ومعروضة بسعر 35000 جنية .
أنا سؤالي هو أي السيارتين أحسن من حيث الموتور والصاج وقوة التحمل ؟
وهل الدوجان أفضل علشان موديل أحدث بصرف النظر عن أنها أقل من الفيات 132 من حيث القوة والصاج أي لمجرد الموديل ؟
علما" بأن السعر مش مهم عندي ، وأنا مش بجري بالعربية يعني آخري 100 كيلو فى الساعة
وأن الطرق ريفية ومطبات يعني مش كلها طرق سريعة
وأرجو الإهتمام بالرد وشكرا" مقدما"

[a4_n]

انا من رائىيا استاذ تامر ال 132 احسن من حيث الموتور 2000 سى سى مش عاوز كلام اما من ناحية الصاج فهى تتحمل كمان احسن من الدوجان وهيه كانت معانا يعنى فى الريف برضه وكان ادائها كويس لغاية ما بعناها ب30000وهيه اداؤها حلةو على السريع وفى الطرق الترابية برضه

[a4_n]

اه بس برضه شوف راي الاستاذ حازم هوه يعرف احسن منى اكيد فى الفيات بوجه عام

[ahmedsrs]

شوف ياسيدى انا مجرب العربيتين دول الدوجان و 125 الأيطالى والموتور بتاعها ذى موتور 132 العربيتين كويسين والصاج بتاعهم جامد العربيتين دفع خلفى ودموتور الدوجان اقل فى استهلاك البنزين من موتور 132 قطع غيار موتور الدوجان متوفرة فى بعض قطع غيار الموتور 2 كامة 132 غير متوفرة بسهولة الدوجان شكله احسن ودى مسئلة اذواق بنسبة لكرونة العربيات الدفع الخلفى فهى من الأجزاء المهمة ولو الكرونة بايظة فى 132 هتحتاج تتغير كلها لكن كرونة الدوجان ممكن تجيب لها طقم تروس فى النهاية انا شايف ان الدوجان احسن من 132

[hazem_khidr]

اولا شكرا ليك يا تامر باشا علي ثقتك فيا و يا رب اكون عند حسن ظنك :)
بالنسبه لسؤالك فهو محير جدا جدا بالنسبالي لاني من عشاق ال 132 و ال 2000 بوجه التحديد ف لو انا مكانك حختار ال 132 لو نضيفه من غير كلام لكن نيجي لكلام العقل:
ال 132 عربيه بقت قديمه و في قطع غيار منها بقت نادره زي الابواب مثلا و الحاجات المستعمله بقت قليله اوي ف دي حتواجهك صعوبه انك تلاقيها و لو لقيتها حتبقي اسعارها مبالغ فيها جدا جدا .
الدوجان ميزتها ان قطع غيارها متوافره و بسهوله و مكيفه كمان من المصنع يعني اكيد تكييفها حتي لو م شغال حيبقي تصليحه سهل و استهلاك بنزينها قليل بالنسبه لل 132 لكن موترها تقنيته اقدم من ال 132(كامه سفليه لحد موديل 96) .
العربيتين حيستحملو الطرق و الجري و ازيد من 100 كيلو كمان و من غير مشاكل .
لكن تكلفه صيانه الدوجان حتبقي ارخص بالنسبالك و علي المدي الطويل حتعرف تبيعها بسهوله عن ال 132
بص اللينك دا فيه كل حاجه عن ال 132 و ازاي تعرف اذا كانت كويسه ولا لاء و لو عاوز اي مساعده انا تحت امرك

http://www.nilemotors.net/Forum/viewtopic.php?t=222

و لو ال 132 دي صحيح الصنايعيه اللي بيقولو عليها نضيفه ما تصدقهمش غير لما تشوفها و لو عاوزني اجي اشوفهالك مفيش مانع

[yahyanaabil]

حضرتك ليا ابن خالتى كان معاه 132 ودخل بيها ىف عمود ولما جه يصلحها طلعت عينه لان قطع غيارها غاليه جدا بالنسبه لموديل العربيه الكلام ده لو لاقيتها فبلاش منها احسند
اما بالنسبه للدوجان كانت معانا عربيه شاهين موديل 93 بس مكانش فيها لا باور اوسنتر اوحتى زجاج كهربا وبيعناها ب35 الف فاناشايف لو الدوجان حالتها كويسه خودها بالسعر ده ولو عرفت تنزل الف جنيه كمان يبقى تظبيط
على فكره لما بيعنا عربيتنا كانت معديه 200000 كيلو وموتورها كان لسه بحاله الفابريكه ومتفكش فيه مسمار

[TAMER LOTFY]

يا جماعة والله ألف شكر على الإهتمام
وبشكر خاصة الأستاذ / حازم خضر وأنا كان سؤالي ليه بصفه شخصية
علشان عارف أنه خبرة كبيرة فى السيارات عموما" والفيات 132 خاصة
وأنه بيحب العربية دي جدا"
وأن بعد الردود دي الواحد فعلا" لازم يفكر بالعقل
علشان موضوع الصيانة وقطع الغيار دي روح العربية وكمان إعادة البيع
وألف ألف شكر يا جماعة
ويجعلوا عامر
وأنا مخليك يا أستاذ / حازم للشديد القوي وألف شكر مرة تانية

[hazem_khidr]

يا جماعة والله ألف شكر على الإهتمام
وبشكر خاصة الأستاذ / حازم خضر وأنا كان سؤالي ليه بصفه شخصية
علشان عارف أنه خبرة كبيرة فى السيارات عموما" والفيات 132 خاصة
وأنه بيحب العربية دي جدا"
وأن بعد الردود دي الواحد فعلا" لازم يفكر بالعقل
علشان موضوع الصيانة وقطع الغيار دي روح العربية وكمان إعادة البيع
وألف ألف شكر يا جماعة
ويجعلوا عامر
وأنا مخليك يا أستاذ / حازم للشديد القوي وألف شكر مرة تانية

العفو علي يه بس يا تامر باشا انا معملتش حاجه.
انا فعلا بحب ال 132 جدا و حفظها بالمسمار (في العيله كان عندنا 6 او 7 عربيات 132 )
و انا بقولك لو مكانك كنت حاخدها لكن العقل بيقول الدوجان هيا اللي سوقها ماشي الا بقي لو حاله ال 132 فابريكه و انا اشك بالنسبه للتمن دا.