حد يعرف مصاريف ترخيص الأونو ؟

[amrbakly]

و الله يا جماعة لو حد يتبرع و يقولي الطريقة اساسا و بعدها يقول الفلوس يبقي عمل واجب كبير معايا

علما بأن العربية مسجلة في الشهر العقاري بإسمي لكني منقلتش ملكية في المرور و مفروض المرة دية عندي فحص

يعني انا لحد دلوقتي مش فاهم اي حاجة غير اني مفروض الأول أجيب شهادة مخالفات من المرور بتاعي، و بعدها بقي مش عارف مفروض اعمل اية

كمان عايز اعرف الترخيص في السنة شامل التأمين و كلة كلة بسلاطاتة بباغنوجة يعمل كام.

العربية أونو موديل 98

[abosharbat]

هتروح المرور
تشترى نماذج وورق فحص وتجديد رخصة
وتشوف اى شركة بتاعت تامين وتدفع تامين للعربية
وبالنسبة اونو فى حدود 75 للسنة الواحدة ولو عاوز تدفع 3 انت حر
وبعد كدة تدفع الضريبة برضوا 1 او 3 سنوات وهى فى حدود 160 ج للسنة
وتروح لمهندس الفحص وتغمزوا كدة فى حدود 50 ج
وبعد كدة تطلع تقدم الورق فى الشباك وتنزل تانى تفك نمر العربية وتسلمها طبعا دها لو قديمة وتشترى الجديدة ب 115 ج
بس وتستنى النمر وتاخذها مع الواد اللى بيركب وكمان 10 ج
وبكدة يبقى الموضوع بخ يا معلم
اه وكمان تبقى تروح تختم الطفاية من بتاعوا الطفايات انها شغالة وما تنساش تاخذ المثلث وشنطة الاسعافات وطبعا هيقول ليكى مفبش دلوقتى تعالى بعد اسبوع او شهر واسال عنها
وربنا يكون فى عونك
بيقى يوم زى الزفت