شفت حادث غريب انهرده لل 127

[memononos]

السلام عليكم ورحمه الله

انهرده وانا ماشى فى دوران شبرا شفت حادث غريب لعربيه 127 ..
المهم انا كنت راكب مينى باص من بتوع الحكومه الاخضر والطريق كان فاضى قدامنا ومفيش غير عربيه واحده الى قدامنا 127 لونها لابنى بتبعد عننا حوالى 100 متر او اقل وكانت مسرعه وكانت جايه من ورانا واخده غورزه من المينى باص وطلعت قدام وخدت الحاره الى فى اقصى شمال الطريق وطبعا احنا كنا على اقصى اليمين علشان المحطات المهم فجاه كده ربنا يحفظنا جميعا العربيه قامت واخده الطريق بالعرض متجه الى الحاره اليمين بزويه ميل حاده جدا ومره تانى قامت رده شمال بنفس الطريقه وطبعا قامت لبست فى الرصيف وقامت معدياه ودغلت على الطريق العكسى والعجله الشمال قامت طارت والعربيه قامت واخده شقلباظ فى الهوا وقامت مقلوبه المهم نزلنا كلنا جرى من الباص وعدلنا العربيه لقينا جواها واحده ست منهاره من شده الخضه بس حمدا لله كانت كدماتها بسيطه ومكنش فى عربيات من حسن الحظ جايه فى المقابل
بس طبعا العربيه 127 الموتور طلع منها خالص وبقى فى الارض بالفتيس والسقف اطبق هو الجنب الشمال
المهم بنبصى كده على الدريكسون اتضح ان عمود الدريكسيون انفصل من العجلات وكان بيلف على الفاضى فى ايد الست الى كانت سايقه وهى من كتير الخضه معرفتش تعمل ايه
وانا صراحه مقدرتش اصور الى حصل ده من الخضه

[aymansaad]

الحمدلله انها طلعت سليمة وربنا يرزقها باحسن منها

[bishoy02010]

الحمدلله انها طلعت سليمة وربنا يرزقها باحسن منها

+111111111

[ASKAFRAWY]

قدر الله و ماشاء فعل
ربنا يستر
موقف صعب اوى

[eg_falcon]

حد يعمل غرز بالـ 127 على العموم قدر الله و ما شاء فعل

[x_gomgom]

استرها يا رب....
سؤال بجد انا اعرف ازاي ان عندي الدركسيون عمود الاداره بتاعه خلاص هيفصل و مين يكشف عليه؟؟؟
انا عندي بوللونيز 1990 فيها صوت تخبيط في العمود بالفعل بس ساعات بتزاول و يتهيألى انها الفبر البلاستيك اللي تحت الدركسيون .. عايزز اكشف عليهم...
الحمد لله انها جت سليمه و اللي كان سايق بخير الصاج يتعوض اما الانسان عمر ما كنوز الارض تعوض عنه

[maka]

قدر الله وما شاء فعل و الحمد الله على نجاتها

وربنا يسترها مع الجميع

[abosharbat]

قدر الله وماشاء فعل
الحمد الله

[caysersosaih]

ربنا يستر

[zee]

الحمد لله انها طلعت سليمه
لقد حدث نفس الشى مع زوجتى يوم 7-9-2009 بفيورا وهى الان شبه فاقده للابصار ونقوم بعمليات لها لاعاده ولو جزء منه وذلك لانفخار العينين نتيجه دخول الزجاج الامامى بهما
ونصيحه ياريت الكل يتاكد ان الزجاج الامامى تريبلكس وليس عاده
والله يحفظ الكل من شر الطريق

[M.Mekawy]

الحمد لله انها سليمة
لكن دا مش بيأكد ضرورة احلال السيارات القديمة أكثر ؟ و أكثر خصوصا انها كان ممكن تاخد فى سكتها حد ملوش ذنب
الحمد لله ربنا ستر

[sab3aawy]

انا مش شايف حاجة غريبة الصراحة فى الحادث
كون ال127 تنقلب دى مسالة عادية جدا، الغير عادى هو انها تكمل مشوار من غير ما تتقلب

انا اتقلبت بيها من 12 سنة ، وكل اصدقائى اللى اشتروها فى تلك الفترة انقلبوا بيها، وكل اقاربى اللى اعرفهم انقلبوا بيها، لدرجة ان كان عندى جار فى الشارع كان معاه عربية بيتلز، استلف مرة عربية عمته ال 127 يقضى بيها مشوار، وصل بيها لحد اول الشارع واتقلب

والحادثة اللى انت بتوصفها دى تكاد تكون هى الحادثة التى تكررت بالمللى معايا ومع كل اللى اعرفهم اتقلبوا بال 127 : مناورة مفاجئة، العربية تعوم من ورا، العربية تعرض، العربية تنقلب

ربنا يسترها علينا جميعا وعلى ركاب ال 127

[NaderNabil]

انا مش شايف حاجة غريبة الصراحة فى الحادث
كون ال127 تنقلب دى مسالة عادية جدا، الغير عادى هو انها تكمل مشوار من غير ما تتقلب

انا اتقلبت بيها من 12 سنة ، وكل اصدقائى اللى اشتروها فى تلك الفترة انقلبوا بيها، وكل اقاربى اللى اعرفهم انقلبوا بيها، لدرجة ان كان عندى جار فى الشارع كان معاه عربية بيتلز، استلف مرة عربية عمته ال 127 يقضى بيها مشوار، وصل بيها لحد اول الشارع واتقلب

والحادثة اللى انت بتوصفها دى تكاد تكون هى الحادثة التى تكررت بالمللى معايا ومع كل اللى اعرفهم اتقلبوا بال 127 : مناورة مفاجئة، العربية تعوم من ورا، العربية تعرض، العربية تنقلب

ربنا يسترها علينا جميعا وعلى ركاب ال 127

تحياتي ليك يا باشمهندس...
بس انا ماوجهتش الموضوع ده خالص في ال 127....كنت مرضية جداً بالنسبة لي...و على مختلف السرعات...و كذا مره الموضوع كان بيوصل ان العربية تعرض على سرعات فوق ال 90 من غباء أحد سائقي الميكروباص أو النقل...لكن كانت بتتلم و بترجع لطريقها تاني...

مع العلم ان طريقي اليومي أوتوستراد و دائري متوسط السرعة 100...و أوقات 140 و على طريق العين السخنة 160 مرة واحدة :) بس ده كان إنتحار...خصوصاً انه كان بالكاوتش القديم ال135 :)

[YaSSerwIN]

غريبة دة عربيا قاليبا بقا
مش قادر أقولك انا كنت بعمل اية فى 127 وليا زميل بردك معاه 127 توب والعربية بعد التسقيط والجنط فرق تانى خالص
وعلى فكرة ال 127 ثابتة عن عربيات زيرو كتير ركبتها

[YaSSerwIN]

مع العلم ان طريقي اليومي أوتوستراد و دائري متوسط السرعة 100...و أوقات 140 و على طريق العين السخنة 160 مرة واحدة :) بس ده كان إنتحار...خصوصاً انه كان بالكاوتش القديم ال135 :)

نادر اشك فى سرعة 160 فى ال 127

علشان فى كل العربيات الى 127 بمواتيرها العادية اقصى حاجة جيبتها بيها 145 وكانت بطلع فى الروح

فى عربيتى كانت بتجيب 140 وتفصل