محتار مع الريجاتا

[semsem7777]

السلام عليكم ورحمة الله وبركاته
اخواني انا اخيرا قررت اشتري سيارة ومعايا 20000 بالظبط ما يزيدوش بس ياريت يقلوا
دي حتبقى تاني سيارة في حياتي بعد السيات ال 133 اللي بعتها من 4 سنين وودعت السيارات
معروض عليا ريجاتا مو 88 بيقولوا بحالة ممتازة بتاعت اخو صاحبي
مش عارف الريجاتا اخبار قطع غيارها وصاجها وباقي شغلها ايه
عاوز اعرف منكم
اخد مين يفحصها سمكري ولا عفشجي ولا ميكانيكي وايه الحاجات اللي يبص ويدور عليها
هي العربية 1300 ولا 1500
الموتور كامة ولا اتنين
انا مشاويري قليلة يعني مش حسافر بيها وانا اسكندراني واسكندرية صغيرة
هل اخد الريجاتا ولا اجيب لادا
على فكرة صاحبي قالي ان اخوه عاوز فيها 20000 بالظبط والعربية مرفوعه من 5 شهور لسفر اخوه للعمل في الخارج
عاوزكم تنصحوني بامانة لحسن مش مستحمل صدمات
وجزاكم الله كل خير

[ahmedzizo131]

الريجاتا عربية جميل جدا نعمة و مريحة و احسن و اخف من الادا
بس حاول تنزل من السعر شوية

[semsem7777]

مشكور لاهتمامك
انزل اد ايه هوه بيقول حالتها اكتر من ممتازة وانا حروح اشوفها يوم التلات مع ميكانيكي واقولكايه الحالة وايه نوعية الشغل

[Ahmed_Ramadan]

مشكور لاهتمامك
انزل اد ايه هوه بيقول حالتها اكتر من ممتازة وانا حروح اشوفها يوم التلات مع ميكانيكي واقولكايه الحالة وايه نوعية الشغل

هى مكيفة و لا فاضية ....ازاز كهرباء و لا عادى.....85s , 75s, 100s ؟؟

[semsem7777]

ان شاء الله حشوفها يوم الثلاثاء واجي اقولكم كل المعلومات بس هيا ازاز كهربا

[Ahmed_Ramadan]

ان شاء الله حشوفها يوم الثلاثاء واجي اقولكم كل المعلومات بس هيا ازاز كهربا

انشاء الله خير......طيب أهم حاجة بص على الرفارف ورا العجل قدام و ورا و أسفل العتب (علشان البارومة)
تكبس الموتور و تشوف ايه حالته
الحالة العامة للسيارة من دهان خارجى و الفرش الأصلى للعربية
حالة التابلوه مكسر و لا سليم
كمبيوتر الأعطال شغال و لا بايظ
لو فى تكييف شغال و لا لأه.....لو مش شغال خدة و روح عند حد بتاع تكييف كويس يقولك فيها ايه و هتتكلف كام و يتخصم من تمن العربية لة فيه حاجة

دى حاجات عامة لازم تبص عليها فى الريجاتا .......و انشاء الله لو العربية من نصيبك هتستريح معاها جامد (سيارة عائلية و اعتمادية جدا و مناسبة للطرق المصرية(عالية))

و أى أسئلة متتكسفش ....كلنا اخوات هنا

[sab3aawy]

قطع غيار الريجاتا 90% منها مشترك مع ال 128 والشاهين وحتى ال10% الباقية موجودة ومتوافرة عند هشام لطيهة وعند الكيلانى فى التوفيقية وكثير غيرهم ، واللى مفيش منه جديد فيه استيراد فى عزبة شلبى بالهبل، قطع الغيار لا تمثل ادنى مشكلة للريجاتا

العربية كامة واحدة، 8 صباب، 82 حصان، السرعة القصوى الللى ممكن تجييبها السيارات اللى بحالة جيدة حالة فى حدود 140-150 كم/س

لو بتقارن بين ريجاتا ولادا انسى اللادا تماما، اللادا هى النموذج الروسى للفيات 124 التى توقفت فيات عن انتاجها فى اوائل السبعينات لكى تحل محلها ال 131 التى اوقفتها فيات سنة 83 لكى تحل محلها الريجاتا، يعنى الريجاتا متطورة عن اللادا بجيلين وحوالى 20 سنة من الخبرة، وده واضح جدا فى اتساع الصالون والفخامة الداخلية والثبات على الأرض ونعومة المحرك وتسارع السيارة وقدرة المناورة وحجم الشنطة، اللادا لا توجد لها نقطة تفوق واحدة امام الريجاتا لو بنقارن عربيتين بنفس الحالة


زى ما قالولك الاخوة هنا فيما بتعلق بالكشف على الحالة العامة للسيارة واحب اؤيد وأوكد موضوع الكشف على التابلوه، تابلوه الريجات ضعيف ومبيتصلحش بالإضافة الى انه غالى جدا، مش بيقل عن 700 جنيه من عزبة شلبى

لذللك لو لقيت التابلوه مكسر اخصمه من تمن السيارة

[semsem7777]

ربنا يخليكم وكتر الف خيركم للمساعده باذن الله بكره حشوفها واخد معايا ميكانيكي واقولكم ايه النظام

[ahmedzizo131]

نصيحة مهمه جدا جدا
لما تروح تكشف على العربية ( لاذم يكون بالنهار فى نور ربنا )
مش باليلي .

[amro1965]

السلام عليكم ورحمه الله وبركاته
الحمد لله بعد بحث حوالى اكثر من شهر ومقارنه بين الريجاتا والادا ومشاوره الاخوة الاعضاء الذين لم يبخلو على بالنصيحه اتوفقت باذن الله تعالى على سيارة موديل 90 لكن مش بالسعر اللى حضرتك قولت عليها انا خلصت فيها بسعر 25000 جنيه لان حالته فابريقة دواخل والاعضاء اقترحوا على مش هتفرق الف زياده بشرط تقتنى سيارة حالته كويسه بالاضافه ان صاحبها قال لى انها محتاجه شحن تكيف فقط
اما بخصوص الاسعار الريجاتا الحاليه النظيف منها غالى جدا
ومثل ماقال لك الاعضاء خلى بالك من الاشياء المهمه مثل طابلوه السيارة نظيف ومش مكسر لانه ضعيف والكل اجمع انه مفيش منه جديد
وبص على الرفارف والشنطه علشان البارومه
لكن لو مثل ماقال لك اخيك حالتها ممتازة وبعد ماتاخذ مع الميكانيكى وقال العربيه جيده جدا حتى لو مفياش تكيف اصلا لو نزلتها الى 19 او 19ونصف مش غاليه عليها لانى لفيت ونزلت وشوفت السوق الخاص بالريجاتا
ربنا يكرمك ويرزقك بسيارة التى تريح بالك

[semsem7777]

اجدع شباب انا امبارح اخدت ميكانيكي وشوفت العربية وملاحظاتنا :
1-العربية بقالها 6 شهور مركونة والبطارية كانت نايمة عشان الانذار كان شغال ومادارتش الا بوضع بنزين في الكربراتير تقريبا وتوصيل بطارية تانية
2- العربية حالة صاجها كويسة جدا باستثناء الحتت اللي تحت جناب الفيبر اللي ورا اطرافها مصدية
3- الفرش محتاج يتفور والكرسي بتاع السواق متقلقل في مكانه
4- الموتور كويس وسحب العربية حلو
5- الكوتش جديد وبحالته من غير جنوط
6- التابلوه مقبول بس مش مكسر
7- الكمبيوتر بتاع الاعطال منور 3 لمبات حمرا مفهمتش بتوع ايه ولا الميكانيكي وقالي يمكن مخرف
8- التكييف لا يعمل ومش عارف شحن ولا لأ
9- الحوض بتاع الموتور والصدر مرشوشين بوية
10- الكوبلم بيطأ طأ في الكسر والحودات الضيقة
11- العفشة بتخبط في المطبات
12- شوفت في الشنطة مساعد وسوسته محطوطين
بس ادي كل اللي لاحظته والميكانيكي قال عاوزالها 2000 جنيه وتبقى تمام وقالي نزلهم من تمنها وكده لو خلصت على 18 الف يبقى كويس ليا
انا حاخدها لعفشجي واشوف الدنيا فيها ايه وكهربائي عشان الكمبيوتر
وكمان محتاج اعرف الكبالم بتاعتها في حدود كام دلوقتي
ممكن تدوني رأيكم الله يخليكم ؟

[semsem7777]

ايه يا شباب شدوا حيلكم معايا شوية