سعرتغيير الايرباج فى اللينيا ....... هام جدا

[abohalmos]

طبعا يا جماعة كله هايقول بعد الشر

هوا احنا لسة استلمنا العربية و لا العربية عملت مشاوير و لا حوداث لا قدر الله

عشان تسال سؤال زى ده ؟؟؟؟؟؟؟؟؟

هاقولكم السبب اولا اللينيا كلها فيها يا اما 2 ايرباج ياما 6 ايرباج فى الفئات التربو ........ صح ؟؟؟؟؟
طيب هل حد سأل نفسه تكلفة تصليح او تغيير الايرباج فى التوكيل هاتكلف كام ؟؟؟؟؟؟

و السؤال التانى هل اللينيا فيها خاصية تعطيل الايرباج عند الحاجة و لا لا ؟؟؟؟؟؟ و الموضوع ده مهم جدا جدا .......ليه بقى

النهاردة فى قسم تويوتا واحد معاه ياريس عمل حادثة من الامام و هوا ماشى على كاااااااااام 50 كم بس يا جماعة ........ الاتنين ايرباج فتحوا مع انه محدش كان راكب جنبه اساسا

طبعا غير الخساير فى العربية زى الاكصدام و الرادياتير و سربنتينة التكييف و الكلام ده ....... الراجل لقى تكلفة تصليح الايرباج كااااااااااااااااااااااااااام .......... 25 الف جنيه يا جماعة ...... ده غير التصليح بتاع العربية يا جماعة ...... ربنا يكون فى عونه

انا واحد كونت من المعجبين اوى بالياريس .......... طبعا بعد الموضوع ده ......غيرت رأيى و طلقتها بالتلاتة .........

و انا معجب اوى باللينيا العادة اللى هيا باكدج 2 .....فعاوز اعرف تكلفة تصليح 2 ايرباج فى اللينيا كام يا جماعة ...... عشان لو الرقم ده برضه هاتبقى حاجة تخض الصراحة و لا ايه ؟؟؟؟؟؟؟؟ :POINTI~2[2]:

و السؤال الاهم ..........هل فى اللينيا خاصية امكانية تعطيل عمل الايرباج ......... عشان لما تكون فى المدينة و تشغله فى السفر و لا لا

ياريت يا جماعة لو حد يعرف يقولنا ........ الموضوع مهم اوى و الله

[yoko]

كل العربيات الإيرباج تمنة غالي جدا جداجدا وعشان كده التأمين لو الإيرباج فتح بيعتبرها total lose وده في كل العربيات من الtata للبوجاتي

[Dr. Halawa]

البونتو فيها خاصية تعطيل ايرباج الراكب بس السائق لأ فأكيد ها تبقى موجودة فى اللينيا

[Ahmed.Ali]

البونتو فيها خاصية تعطيل ايرباج الراكب بس السائق لأ فأكيد ها تبقى موجودة فى اللينيا

موجوده في اللينيا

[Ahmed R08]

موجوده في اللينيا

+1

[abohalmos]

موجوده في اللينيا

طب يا جماعة تمن بتاعة السواق كام و اللراكب اللى قدام كام ؟؟؟؟؟؟؟؟؟

مهم اوى نعرف و الله ؟؟؟؟؟؟

و التأمين دى اكبر خدعة انا واحد صاحبى عمل حادثة و العربية بتاعته توتال لوس و لغاية دلوقتى بقاله 6 شهور مش عارف ياخد حاجة من شركة التامين

[Dr. Halawa]

هاهااها يا عم انت خلاص جبت العربية و خيشتها و بتسأل كمان على تمن الايرباج غالية طحننننننننننن هاتها يا عم و ربنا يسترها معاك

[Ghost2]

لو شايف ان 100 الف جنيه قيمتهم اكتر من قيمة حياة حد في العربية تبقى حساباتك غريبة .. اما بالنسبة لسعر الايرباج للسائق فا كل اللي بتعمله انك بتغير الطارة .. وفي الاوكتافيا على ما اتذكر كانت الطارة عاملة 8 الاف جنيه

[Ahmed Selim]

ممكن كمان مش تلبس حزام الأمان بتاعك و ساعتها لو فى حادثة لا قدر الله الأيرباج مش هتفتح..........بس متنساش تكتب الوصية :)


بعد الشر عليك بس أنا بهزر.......فى داهية الفلوس....انت الأهم.

عموماً لو فى أيرباج فتحت و رحت غيرت الطارة مثلاً برضه لمبة الأيرباج هتفضل منورة و الأيرباج مش هتشتغل تانى عشان الكنترول بتاعها بيبقى فيه حاجة لازم تتغير ( و طبعاً فى التوكيل محدش بيغير حاجة......بيجيب جديد على طول )

الكلام ده قالهولى واحد زميلنا شغال فى مجال الكنترول يونت بتاع العربيات و سوفت وير العربيات ( أسمه farahat )

[placebo]

اللينيا فيها خاصية غلق الايرباج وبيتعملها disable من المنيو عادى . وعلى ما اذكر كانت تكلفة تغييره 3000 جنيه للواحد .. يعنى 6000 للاثنين الاماميين بخلاف الدركسيون والتابلوه الجانبى

[abohalmos]

متشكر جدا يا جماعة لردودكم الحلوة و كمان دمها خفيف بجد

انا يا جماعة مش بقول انه الايرباج مش مهمة و لا ملهاش لازمة بالعكس انا حاسس باهميتها جدا جدا و محدش يقدر يقول غير كده ....... و غير كده برضه لازم تبقى عارف انه دى كلها اسباب و الموت واحد انت ممكن تكون راكب عربية فيها 12 ايرباج و عندك ايرباج فى السقف و تموت فى حادثة من الخضة صح ؟؟؟؟؟؟؟؟؟ و لا ازمة قلبية ........ مش كده ؟؟؟؟؟؟؟؟؟؟

انا و الله كل قصدى انى انى اعرف الايرباج ممكن توقف عملها فى اللينيا و لا لا على الاقل بتاعة الراكب الامامى و انت جوة البلد و شوارع زحمة وانا سواقتى كمان هادية جدا ....... لانى جربت و عملت يعنى ايه حادثة و يعنى ايه تخيييييييييييييش بجد ........و يعنى ايه كل الناس اول ماتعمل حادثة تبقى عاوزة تكسب فيك ..... ربنا يكفينا جميعا شر الحوادث ....

كمان قصدى انه اعرف تكلفة تصليح او تغيير الايرباج الواحدة او الاتنين فى اللينيا كام بالظبط ؟؟؟؟؟؟ و ده معناه انه مقتنع باهمية الايرباج وانه حتى لو عملت حادثة لازم تتصلح ........انا بتكلم عن اى حد معاه العربية مش ضرورى انا شخصيا و السبب فى الموضوع ده اساسا واحد من ملاك الياريس عمل حادثة بيها و هوا على 50 كم بس و محدش جنبه ........ لقى الاتنين ايرباج فتحوا .......... و لما راح يصلحهم فى التوكيل قالوا 25 الف جنيه ..... بس الايرباج من غير باقى اصلاحات العربية ........ يعى هاتخش فى حوالى 35 الى 40 الف جنيه عشان حادثة ممكن تحصل لاى حد فينا بمنتهى السهولة و بتحصل كل يوم تقريبا فى شوارع المحروسة

ياريت يا جماعة تكونوا فهمتوا قصدى ....... انا واحد من الناس كنت معجب بالياريس قبل ما اعرف اللينيا و بعد موضوع تكاليف الايرباج وانها مفهاش تعطيل الايرباج بتاع الراكب الامامى ......... طلقتها بالتلاتة ........ فكونت عاوز انبه الناس للموضوع ده و اعرف اللينيا زى كده و لا لا

الاخ العزيز اللى بيقول يعنى انت خلاص جبت العربية و خيشتها و جاى تسأل ......... هاقول متشكر لرد حضرتك ..... بس المنتدى ده معمول عشان ننفع بعضنا سواء معانا عربيات و لا لا........ و اعتقد فى ناس هنا بتكتب تقارير و مواضيع زى الفل ........ و هما معهمش عربيات اساسا........

و على العموم يا سيدى انا و الله بكمل فى المقدم و عاوز اكمله 40 الف عشان اريح القسط ان شاء الله ...... و ان شاء الله يا سيدى ناوى عليها فى شهر يناير باذن الله .....و اول ما اجيب ان شاء الله هاعزمك يا باشا على العربية

و اسف يا جماعة لو الموضوع ضايق حد او نرفزه ..........

انا قصدى خير و الله العظيم

[kareemhisham]

ملحوظة : العربيات البيبقى فيها اكتر من اتنين ايرباجز بيبقى فيها حساسات فى الجنب للاصطدام الجانبى .. يعنى لو العربية فيها 20 ايرباج و العربية خبطت من قدام الاتنين القدام بس هما الهيفتحوا .. و هكذا

[Haitham10]

ربنا يباركلك فيها بإذن الله
هي فيها فعلا التحكم في قفل او تشغيل الايرباج وهتلاقيها في التقرير بتاع اللينيا لزميلنا في المنتدى بالصور

[Dr. Halawa]

هاههاها يا عم انل مش قصدى انا قصدى انك بتقاطع يعنى ربنا يكرمك إن شاء الله