اشترى لادا 2107ولالأ

[HADEDA]

انا عربيتى فيات 128وقررت ابيعها انشاء الله وعايز اجيب لادا زيرو بس ناس كتير مقلقانى وتقولى اوعى تجيب لادا دى عربيتك ال128افضل لانى مش هلاقى فرق كبير بين الاتنين وناس تقولى حرام تجيب لادا زيرو انا فعلا محتار ياريت لو حد يفيدنى مع العلم انا هاشتريها قسط والشكل عندى مش مهم المهم تكون عريية تستحمل الطرق الجميلة واعطالها قليلة وقطع غيار رخيصة وطبعا اجيب المصرى ولا الروسى

[fatla2]

اولا الف مبروك مقدما

الادا عربية ممتازة وتستحمل الطرق وقطع غيارها فى متناول الايدى

بالنسبة للنوع هات الروسى اوعى اوعى تجيب المصرى

ربنا يباركلك فيها ويكفيك شرها

[Abdm]

لكل عربية مميزات وعيوب مفيش عربية كاملة من مجميعة
أولا : العربية اللى معاك بعتها ولا لسة وهى موديل كام ولية عايز تبيعها
أنا بسئل دة كلة علشان أديك نصيحة لو العربية موديلها مش قديم قوى وحالتها كويسة قوى يبقى متفكرش تغيرها ألا لو تقدر تجيب حاجة أعلى من اللادا لآن أنا شايف الآتنين ما يفرقوش عن بعض كتيير و128 أنعم من اللادا , الا لو ناوى تجيب حاجة كورى أو أوروبى يبقى هقولك أتكل على الله

ثانيا : اللادا عايزة واحد يكون بيحبها قوى قبل ما يشتريها ويكون مقتنع بيها 100 فى 100 هى علربية قوية وتستحمل لكن ال 128 مش وحشة لو أتظبطت هتبقى أحسن من اللادا ودية ميزة موجودة معاك لكن لو حالتها كويسة وموديلها عالى ذى ما قولتلك

اللادا مش وحشة لكن فى بدائل تانية كتيير فى نفس سعرها لو عايز ذى
الماروتى - الآلتو - البيكانتو - i10 - اللانوس - الفرنا - اللوجان
دى كلها عربيات حسب المقدرة السعرية بتعتك . وفكر فى كل اللى قولتهولك . وحاول تقرا مواضيع اللادا هنا فى القسم وبعدان قرر
شوف عربيتك أولا ذى ما قولتلك وبعدان قرر

ثالتا: وهو الآهم صلى صلاة استخارة وأن شاء الله ربنا هيكرمك بالآفضل وبالتوفيق ان شاء الله .

[M.FOUAD]

لو كنت ناوي تجيب الادا المكيفة حاول تزود شوية و تجيب الاوجان الباسيك بنفس السعر تقريبا و يبقى ركبلها تكييف بعدين

[smsm061274]

لادا جامده يا مان وسيبك من كل اللى فات لانها عربيات من ورق وصيانتها وقطع غيارها نار
وطبعا الروسى هيكون احسن بكتير

[Mustafino]

السلام عليكم،،

أتفق جداً مع رأى الأستاذ عبد الحى مصطفى، و لو مكانك هأعمل بنصحيتة و أشد ال 128 و مفرقتش كتير عن اللادا... و عموما ربنا يوفقك إلى الصالح أن شاء اللة.
مصطفى

[HADEDA]

اولا شكرا للاهتمام
انا عربيتى موديل87وموضوع ان انا اشدها فكرت فيه وبالفعل عملتلها عمرة بس لقيت ان الواحد مهما يصرف عليا برضو تمنها فى السوق هو هو وبعدين لازم تكون ايدى فيها باستمرار فحسيت انى بصرف كتير عشان كده قولت اجيب زيرو بس حاجة تكون امتن واوسع واقوى ملقتش غير اللادا

[factorialx]

لو كنت ناوي تجيب الادا المكيفة حاول تزود شوية و تجيب الاوجان الباسيك بنفس السعر تقريبا و يبقى ركبلها تكييف بعدين

+11111111111

لادا زيرو سعرها كبير أوي عليها

[Ahmed_Emad]

انا معايا لادا وكنت باركب 128 نوفا بتاعت والدتي، ومع احترامي لكل الآراء اللى بتقول ال 128متفرقش اللادا انا شايف فرق السما من العمى بين الاتنين، اللادا أوسع بكتير، ماتورها أقوى بكتير، عفشتها أقوى بما لا يقاس، صحيح ال128 أنعم كدركسيون وفتيس
(نظرياً) لكن مهواش فرق مهول يعني يحسسك انها عربية زي بقية العربيات الحديثة، وصدق أو لا تصدق أنا شخصياً كنت باكره فتيس ال128 ده عمى وبارتاح لفتيس اللادا عنه بس معرفش للأمانة هل كان السبب عيب ما في فتيس عربية والدتي ولا لأ


الخلاصة عايز عربية محترمة وواسعة وعائلية وتعيش وتستحمل هات لادا روســــــي ووانت مغمض ومتجيبش المصري انشاله يحطوا فيها ديب فريزر مش تكييف، العيب الوحيد اللى هتلاقيه ان الدركسيون هيبقى تقيل معاك اول اسبوعين لحد التليين وبعد كده هيبقى معقول جداً، وعامة اللادا الجديدة بقت ناعمة اكتر
وواتحسنت عن لادا زمان (عن تجربة للادا 2105 موديل 94 كانت آلة تعذيب مش عربية)

المهم شوف سعرها كام لأني كنت جايبها من حوالي سنتين ب47 ألف ونص وكانت صفقة رابحة وقتها فعلاً، دلوقتي اسمع انها ب55! وساعتها مش هتفرق سوى آلاف قليلة عن موديلات كتير تانية حديثة وانت وميزانيتك بقى

والف مبروك مقدماً إن شاء الله

[ayad2007]

انا كنت في التوكيل الأسبوع الماضي وسألت عن لادا روسي موديل 2009 قالي ب49000 ج . و لما سألت عن موديل 2010 قالي لسة مانعرفش عن سعرها حاجه......

[aymansaad]

اللادا عربية محترمة واسال اصحاب التاكسيات انها حمالة اسيه

[medooo333]

هات لادا تعيش مطمن لا تخف منها روسيا بلد القوة و الامان و لا تغتر بالمظهر...........................