مطلوب معلومات من رجاله الادا

[yasoxp]

انا عايز اشترى لادا 2107 الروسى ووسامع انها الان 1600 انجيكشن مش 1500 زى اول موديل انجيكشن منها اه الصح فى الكلام ده

انا عايز اعرف لو حد معاه العربيه هى اه ظروفها معاه وعامله اه فى السفر يعنى لو هعمل كل يوم بيها 150 كم هتستحمل ولا هتبهدلنى مشاوير الشغل

ولو عمل اى تعديل لتحسين الاداء زى رفع كفائه الماتور بأى طريقه

وعلى فكره انا الحمد لله ممكن اجيب عربيه على احدث مستوى بس انا بحب العربيه دى بجنون ومحدش يسأل له النى مش عارف اجاوب على السؤال ده لما اصحابى بيسألونى

انا بقول كده علشان بلاحظ ان اى حد بيقول انو عايز يجيب العربيه جديده فى المنتدى بلاقى كم هجوم على العربيه بلا مبرر لدرجه انى بحس انى فى منتدى هيونداى او الكورى بشكل عام

على فكره انا كان معايا لادا 2107 بس المصرى 2008 وبعتها لظروف السفر وانا راجع مصر تانى ان شاء الله وبفكر فى العربيه تانى لانى بحبها

بالمناسبه يمكن الناس تقول عليا فقرى لما تعرف انى سقت السيراتو الجديده والاتيدا والهيونداى بأنوعها والصنى والافيو والابترا ومش هعدلكم لانى كنت بره بأجر عربيات وكنت بغير العربيه كل شهرين للتجربه وبالرغم من كده لسه عايز اجيب لادا وعايا امكانيات اجيب الاعلى بس انا بحب العربيه

انا طولت عليكم بس حبيت اوصل الصوره لاهل الادا يمكن حد يساعدنى ويفهمنى وشكرا

[Abdm]

العربية اللادا الروسى الزيرو 1500 cc
العربية من طبيعتها بتحب السفر موت موت موت.
بالعكس هى ما بتحبش الزحمة بس حضرتك لو من أسكندرية هى بتحب أوى جو أسكندرية لآنها بتحب تصيف على البحر والكورنيش طول السنة الجو بتاع أسكندرية جميل قوى وهى بتحبة وما بتسخنش خالص هناك
والتوكيل بتاع أسكندرية أحسن من مصر أقصد القاهرة

موتورها 10/10 ولا يجب اللعب فية
أذاى وهى زيرو وجديدة هتلعب فيها
أياك تيجى عندها . هى كدة حلوة قوى وزى الفل وما بتحبش العب الكتير الا فى أضيق الحدود
هى بتحب اللعب فى دورة التبريد للأحسن فقط زى تغيير الكربراتير لواحد نحاس ثلاتة ماسورة أو أربعة
مروحة عدد ريشة أكبر . تشيل الترموستات أو تغيرة

الحاجات دية اللى قولتلك عليها ما تتغيرش الا لو ظهلات أعراض السخونة عليها أما لو مظهرتش أعراض السخونة ما تغيرش حاجة

والله الموفق والمستعان

[yasoxp]

الف شكر Abdm

الف الف شكر بس انتا حيرتنى هيه كربيراتير ولا انجيكشن واه الاحسن

وبلين عليك من عشاق العروسه الاسكندريه ولعى فكره اظن ان دى اكتر محافظه فيها عربيات لادا فى مصر

على العموم انا منتظر معلومات اكتر من الاخوه الاعضاء وخصوصا لو تقرير من حد معاه العربيه وماشى بيها شويه

وشكرا مره اخرى على الرد

[Abdm]

يا باشا لمؤخذة نسيت أقولك ترجع بالسلامة

العربية الروسى أنجكشن .
والتقفيل المصرى كاربراتير .

لو لقيت روسى زيرو أو كسر زيرو كاربراتير يبقى أفضل علشان الصيانة بتاعتة أسهل شوية من الآنجكشن

بس للعلم علشان متقلقش الآنجكشن مظهرش منة مشاكل الى الآن الحمد لله

وبعدان أنت راجل كنت راكب لآدا قبل كدة يعنى راجل لاداوى قديم وخبرة أية أنت نسيت من كتر الماركات اللى ركبتها ولا أية

والله الموفق والمستعان

[yasoxp]

الف شكر ياباشا بس اللى الواحد اللى بيشوفو بره ينسى كل حاجه وانا بقالى فتره بره وسمعت كلام كتير وكنت عايز اعرف الواقع الان اه علشان اخذ قرار ارجع واحن للعربيه اللى بحبها ولا اسمع كلام المدام واخلينى فى المنظره والبرستيج
بس انا بفكر بعمليه اكتر وشايف انها صفقه رابحه بالاضافه الى حبى للعربيه

على فكره العربيه الاولى للاسف بعتها زيرو كانت ماشيه 3000 كم تقريبا عمر اربع شهور فقط ومحطتش فيها غير البنزين وصيانه الالف والفتره دى مخلتنيش اخذ خبره كافيه عن العربيه واكانت فرصه السفر الحمد لله كويسه

على فكره كل الموديلات اللى ركبتها لا تخلو من العيوب وعيوب تخليك تفكر الف مره قبل ما تدفع فيها المبالغ الكبيره المبالغ فيها فى مصر ولو عايزنى احكيلك على واحده واحده انا مستعد بس انتا تأمر

[a7madramadan]

غلطــــــــــــــــــان يا أستاذ انا معايا 2009 روسي 1600cc موش 1500 انا من الاسكندرية و موجودة في الأمل طبعا و كمان الشركة الهندسية "نصر" :)

[yasoxp]

مفيش حد يجماعه لسه جايب العربيه يفصل فى الموضوع ده ويقولنا اه اخر تفاصيل موديل 2010
انا سامع انو بينزل من بره بتكييف او بور مش بيركب بس فى مصر فى بتاع بلادو

نتمنى حد من الاسكندريه يزور لنا توكيل الامل ويجبلنا اخر الاخبار والاسعار

وشكرأ مقدما على المجهود

[timo_crosswind]

انا سمعت ان اللادا المصري بتكون جميع الكماليات والروسي بتكون فاضيه....ممكن بعد اذنكم حد يوضحلي:
1-الفرق بين اللادا المصري واللادا الروسي؟
2-ايه هيا الكماليات اللي موجوده في اللادا المصري؟
3-ليه الناس بتفضل الروسي مع ان الطبيعي ان المصري يكون فيها التعديلات اللي تخليها متسخنش زي الروسي وكمان البيض ميملصش زي الروسي؟
4- حد ليه تجربه حقيقيه مع اللادا المصري؟
5-البوار والتكييف اللي موجود في المصري فعال فعلا ولا مجرد مسميات؟
6-اللادا المصري علي بارات بردو ولا اسكترا؟؟؟

انا اسف انا عارف ان اسئلتي كتير بس ارجو منكم الاجابه
وشكرا

[yasoxp]

نتمنى من الخبراء الاجابه عن الاسئله بالتفصيل ونتمنى انها تكون عن تجارب شخصيه

[midomizo]

الصراحة مقدرش اقلك غير ان جودة المصرى مصرى وجودة الروسى روسى ولو عايز فرق بسيط بينهم المصرى كراسى بدون مسند راس كل الكرسى حتة واحدة اما الروسى حاجة اعلى شوية والكرسى حاجة بمسند راس ومتفصل بشكل كرسى عربية مش كرسى حتة واحدة

وانا مع رايك فى ان اللادا انسب عربية للشوارع المصرية بس متوقعهاش فى مطبات كتير ولا تقف بيها فى وسط الزحمة كتير

[yasoxp]

اه يارجاله مفيش حد معاه العربيه او يقدر يجمعلنا كل المعلومات المتوفره عن موديلات 2010

[Ahmed_Emad]

انا سمعت ان اللادا المصري بتكون جميع الكماليات والروسي بتكون فاضيه....ممكن بعد اذنكم حد يوضحلي:
1-الفرق بين اللادا المصري واللادا الروسي؟
2-ايه هيا الكماليات اللي موجوده في اللادا المصري؟
3-ليه الناس بتفضل الروسي مع ان الطبيعي ان المصري يكون فيها التعديلات اللي تخليها متسخنش زي الروسي وكمان البيض ميملصش زي الروسي؟
4- حد ليه تجربه حقيقيه مع اللادا المصري؟
5-البوار والتكييف اللي موجود في المصري فعال فعلا ولا مجرد مسميات؟
6-اللادا المصري علي بارات بردو ولا اسكترا؟؟؟

انا اسف انا عارف ان اسئلتي كتير بس ارجو منكم الاجابه
وشكرا

1- الفروق الشكلية: المصري مراياتها كبيرة شبه مرايات الشاهين، الإكصدام الأمامي والخلفي فيبر أو حاجة شبه البلاستيك كده بالإضافة للطاسات وشريط اللزق الأسود بتاع الجناب اللى عليه اسم لادا

الروسي مراياتها صغيرة والإكصدام حديد ومفيهاش الشريط اللزق ولا الطاسات

وعموماً وانت فى المعرض أو التوكيل إسألهم فين المصري وفين الروسي هيقولولك (بس طبعاً هيحاولوا يقنعوك إن المصري أحسن بكتير)

2- كاسيت وسماعتين وسنتر وباور وتكييف (مالوش لزمة فى العربية بحسب رأي كل اللى شفتهم جابوها مكيفة)

3- الحقيقة أعتقد إن الروسي فيها التعديل ده بالفعل من أول موديلات 2007، (والدي استبدل الراديداتير في عربيته الروسي موديل 2006، لكن أنا محتجتش أبدله والعربية مسخنتش مني ولا مرة الحمد لله طوال سنتين)، وبرضه مواجهتنيش مشكلة البيض اللى كل البشر بتقول عليها دي مع ملاحظة إني باهتم بتشحيم وتربيط العفشة كل 5 آلاف كيلو

4- شخصياً لأ، لكن عمري ما سمعت عنها كلام كويس أبداً، سواء من المعارف اللى جابوها أو من سواقين التاكسي الجديد أو الملاك اللى بيبقوا واقفين معايا فى طابور الصيانة

5- ماهتمتش الحقيقة أسأل عن الباور لأني أصلاً شايف إن الدركسيون وهو بحالته كده دلوقتي بقى دلع قوي عن زمان (عن تجربة ومعاناة مع لادا 2105 موديل 94)، هو بس متعب فى أول أسبوعين لحد ما تلين لكن بعد كده معقول

التكييف زي ما قلت فى النقطة 2 مالوش لازمة

6- ماليش فى الميكانيكا الحقيقة فامفهمتش السؤال

[Ahmed_Emad]

اه نسيت أضيف، أما هتدخل جوا المصري هتعرفها لأنك هتلاقي الكاسيت متركب، والروسي بتنزل من غير كاسيت

بالإضافة إلى إن الروسي ألوانها 4 فقط وكلها ألوان عادية الأبيض والنبيتي والبترولي والأزرق والمصري ألوانها متعددة وميتاليك

[medooo333]

فعلا المصرى مراياتها كبيرة -الاكصدام فيه شريط جلد من النصف- 1600 سى سى- بتنزل كاسيت وسنتر-لو عاوز تكييف تضيف 3000 ج و لو عاوز باور ضيف 2500 ج -الوانها ميتالك-صاجها ضعيف-محفور على الكبوت من الداخل حروف fsa+باقى الارقام التى تدل على الموديل-كاربيراتير---------
اما الروسى مرايات صغيرة-الاكصدام نيكل من فوق فقط(فى الموديلات الروسى الحديثة)-كانت بتنزل 1500 سى سى بس اعتقد انها حاليا 1600 سى سى انجكشن-بتنزل فاضية بلا كاسيت او سنتر-صاجها قوى -الوان عادية ليست ميتاليك-
....على فكرة الكراسى حتة واحدة فى موديل 2107 وتسمى كراسى طيارة-اما 2105 القديمة الكرسى له قطعة علوية للراس -----ارجوا ان اكون قد افدت -وانا عن نفسى ارشح اللادا الاى شخص عملى لا يحب المنظر فهى فى رايى بالنسبة لسعرها سيارة ممتازة-واللــــــــــــــــــه الموفـــــــــــــــــــــــــق..............

[medooo333]

على فكرة نسيت اقول ان التكييف فى اللادا مالوش لزمة وتقريبا بيسخن العربية و ياثر على سحبها كمان الباور فى الموديلات الحديثة مالوش لزمة برضة بيخليها تعوم مع السرعة كمان هو الدركسيون مش تقيل اوى و العملية عملية تعود على السيارة ...............thnx