سؤال الى الاخوة مالكى سيارات لادا 2105

[dOoM3]

لدى استفسار ارجو من الاخوة الاعزاء اعضاء المنتدى الرد عليه
هل توجد سيارة 2105 بدون بيض المقصات ؟
السبب فى ذلك السؤال صديق لدى كان يمتلك لادا 2105 يقول انها روسى موديل سنة 93 ويقول بأنها بدون بيض.

[thegoodhacker]

لا اعتقد ان الكلام ده صحيح.......اللادا ال2105 و 2107 طول عمرها علي بيض
اللي مافيهاش بيض هي اللادا السمارا و الموديلات الحديثة زي الكالينا و ال2110

[dOoM3]

مشكور اخى العزيز وجعله الله فى ميزان حسناتك

اللى هو قالهولى هو انه دخل بنزينة علشان يغير زيت فقال بالمرة للعامل انه يبص على الكرونة ويشوف الزيت بتاعها و بالمرة شحم البيض فكان رد العامل عليه ان العربية مفيهاش بيض. المشكلة ان صاحبى باع العربيه(مقعدتش معاه شهر).
الحقيقة انا نويت اشترى لادا بس موضوع البيض ده قالقنى ولما صاحبى قالى كده تخيلت ان فيه حل للموضوع ده.
وشكرا لك مرة اخرى.

[thegoodhacker]

بص لو انت متردد انك تشتري اللادا علشان موضوع البيض يبقي مالوش لازمة التردد ده خالص و توكل علي الله و اشتريها و مش حتندم ان شاء الله ........
اهم حاجة انك اول ما تسمع صوت البيض في المطبات لازم تروح للميكانيكي و تغيرهم ببيض اصلي و طبعا مع المتابعة و تشحيم البيض ده كل فترة و ده بيتم عند الميكانيكي مش في البنزينة !!
غالبا البيض مش حيملص مرة واحدة غير لما تكون فعلا حالة البيض دي تعبانة و انت اهملتها

[hamedo0]

ممكن يكون اقصده مشاحم البيض ممكن لاهمش

[dOoM3]

الف شكر لكم على هذه المعلومات المفيده
وجعله الله فى ميزان حسناتكم

[zalkadery]

يا جماعة الخير انا شارى 2105 روسى موديل 95 من شهرين فقط وكنت فرحان بيها جدا ولكن لقيتها بتسخن والمؤشر بييجى على النص لما اكون ماشى فى زحمة شوية غيرت الراداتير الى نحاس 3 ماسورة ما حسيت بفرق نفس الحرارة هل عدت على حد المشكلة دى مع الشكر لحسن انا ناوى ابيعها لو ما لقيت حل مع جزيل الشكر

[medo1442002]

مشكلة الحرارة في اللادا هي فصل الترمستوتات يعني مياة التبريد هتدور حول المحرك باستمرار فتمنع سخونته المشكلة بقا في البرودة لازم قبل ما تمشي بالعربية تسخن شوية لان البرودة بتخلي العربية تقطع

[dOoM3]

مشكورين ايها الاخوة على المرور ولى سؤال للأخ zalkadery
انا عايز اشترى 2105 او 2107 بس معرفش ازاى لانى مبفهمش فيهم يعنى الواحد يبص على ايه او ياخد باله من ايه زائد ازاى يعرف يقيم ثمن السيارة
وهل ممكن تقولى انت اشتريت سيارتك بكام

[masrawy1441]

السلام عليكم انا كانت عندى نفس مشكله الحراره فى العربية كنت لما بمشى حوالى 15 كيلو بس الاقى الحرارة وصلت للنصف
والمشكلة دى بصراحه كانت مكرهانى فى العربية
لما رحت للميكانيكى قالى المشكلة بسيطة وغيرلى المروحة بتاعة الريداتير كانت 4 ريشه خليتها 8 ريشه وركبت سير اصغر من اللى كان راكب وغيرت البوبينه اللى بيركب عليها السير
بصراحه بقيت اسافر بيها اى مكان والحراره مش بتزيد عن الربع

[nab!l]

يا جماعة عادى يعنى موضوع السخونة انا كان معايا الادا كانت بتوصل للنص عادى مش مشكلة وكنت بمشى بيها تمااااااااااام ايه يعنى توصل للنص!!!!!!
وبعدين اساسا هى لما بتسخن وتوصل للنص مبيغيرش من اداءها بالعكس ده بيحسن الاداء
والفكره فى ان هى بتسخن كده سمعت انها عشان روسى وعندهم تلج طول السنة فبيحتاجو انها تسخن بسرعة
وشكرا ليكو

[minaf2000]

اخواني الاعزاء
لازم نفرق بين امرين
اولا هل المروحة بتعمل مع تشغيل الموتور وده في الموديلات القديمة وفي هذه الحالة السيارة بتكون مصممة ان مؤشر الحرارة لا يصل للنص وانما بيكون عادتا في الثلث الاول.
ثانيا لو المروحة بتعمل علي ترموستات وده في الموديلات الحديثة بيكون طبيعي ان الحرارة تصل للمنتصف حتي تعمل المروحة.
وكثير من سائقي التاكسي يقوم بعمل تعديل للموديل الحديث ليعمل مثل القديم مع تشغيل الموتور ولكن هذا الامر يؤثر في ان السيارة تستهلك بنزين اعلي من الطبيعي

تحياتي

[a_sabeq]

بص يا باشا.. موضوع الحرارة، في مسار في كوع المية بتاع الموتور بيرجع الميةالسخنة تاني للمحرك بدون المرور على الريداتير، إنما بيعدي على ثرموستات.. وده بيلغوه بدون ما يلغوا المسار بتاعه فتلاقي جزء من المية السخنة يرجع تاني للموتور، وجزء يروح للريداتير.. بعض الميكانيكية بيسدوه بغطا جركن أو خشبة أو كاوتش داخلي عجلة مربوط، بس ساعات مبيقفلش كويس المسار بتاع الثرموستات.. اتأكد من النقطة دي.. كمان في حالات الزحام، مروحة الريداتير الكهربية أفضل مناللي على سير لأن سرعتها ثابتة، أما المروحة اللي على سير سرعتها بتقل وتزيد مع الموتور..

بالنسبة للبيض، في بيض مقصات مقفول مبيتشحمش، إنما اللي أفضل منه بيض المقصات الروسي أبو مشاحم، خاصة لما تركبله كمان بنوز تشحيم تشتريها من عند بتوع المسامير والحدادة عشان تحمي الشحم من التراب، ومينشفش ويجبس في خرم التشحيم، وكمان عشان ميخرش من الحر.. وطول مانت موظب على التشحيم شهريا، مفيش حاجة هتحصل للبيض، وهو عمره لو انت محافظ عليه حوالي سنة ونص ممكن أكتر كمان.. وفي بعض الناس في المشاحم ميعرفوش أصلا إيه اللي بيتشحم في العربيات اللادا، وده موقف أنا اتعرضت له قبل كده، واضطريت انزل مع الراجل تحت العربية واركب معاه المشحمة لأني اتحرجت اسيبه وأمشي.. وكمان كرسي النص بتاع عمود الكردان في بعض اللادا بيكون فيه ثقب بيتشحم..

[M.FOUAD]

بص يا باشا.. موضوع الحرارة، في مسار في كوع المية بتاع الموتور بيرجع الميةالسخنة تاني للمحرك بدون المرور على الريداتير، إنما بيعدي على ثرموستات.. وده بيلغوه بدون ما يلغوا المسار بتاعه فتلاقي جزء من المية السخنة يرجع تاني للموتور، وجزء يروح للريداتير.. بعض الميكانيكية بيسدوه بغطا جركن أو خشبة أو كاوتش داخلي عجلة مربوط، بس ساعات مبيقفلش كويس المسار بتاع الثرموستات.. اتأكد من النقطة دي.. كمان في حالات الزحام، مروحة الريداتير الكهربية أفضل مناللي على سير لأن سرعتها ثابتة، أما المروحة اللي على سير سرعتها بتقل وتزيد مع الموتور..

بالنسبة للبيض، في بيض مقصات مقفول مبيتشحمش، إنما اللي أفضل منه بيض المقصات الروسي أبو مشاحم، خاصة لما تركبله كمان بنوز تشحيم تشتريها من عند بتوع المسامير والحدادة عشان تحمي الشحم من التراب، ومينشفش ويجبس في خرم التشحيم، وكمان عشان ميخرش من الحر.. وطول مانت موظب على التشحيم شهريا، مفيش حاجة هتحصل للبيض، وهو عمره لو انت محافظ عليه حوالي سنة ونص ممكن أكتر كمان.. وفي بعض الناس في المشاحم ميعرفوش أصلا إيه اللي بيتشحم في العربيات اللادا، وده موقف أنا اتعرضت له قبل كده، واضطريت انزل مع الراجل تحت العربية واركب معاه المشحمة لأني اتحرجت اسيبه وأمشي.. وكمان كرسي النص بتاع عمود الكردان في بعض اللادا بيكون فيه ثقب بيتشحم..

انا بحييك انك بتفتح و تدور في المواضيع القديمة لكن انا ليا تعليق على موضوع البيض
اولا بيض الادا اللي بينزل في العربية الاصلي المفروض بيتشحمش اعتقد التشحيم دة حاجة اخترعها المصريين عشان ينعموا الدركسيون شوية لكن بميطولش عمر البيض
البيض اللي انت تقصد علية بمشاحم دة بتاع 124 بيركب على الادا بالصدفة انعم بكثير في السواقة لكن انا بحب الحاجة الاصلية بتاع العربية
البيض ملوش عمر مش شرط يتغير كل سنة و نص كل ما يبوظ تغيروا و دة حسب طريقة سواقتك بالراحة في الحفر و البلاعات و المطبات و متخبطش في الرصيف هتلاقي البيض يعيش معاك انا اعرف واحد راكب لادا 95 عامل بيها 110 الف كيلو و لسة ببيض الفابرقة بتاع بلادها

[H.ibrahim]

السلام عليكم ورحمة الله وبركاته
العبد لله معايا لادا 2105 موديل 1994 و بصراحة انا مبسوط من العربية من سنة ولحد لما عملت العمرة للموتور الاسبوعين اللى فاتوا كانت العربية زى الساعة بالنسبة للحرارة و دلوقتى انا فى فترة التليين و مشكلة الحرارة انها بتوصل للنص فى مسافة 4 او 5 كم بالكتير مع العلم انى خلال العمرة قمت بنظافة دورة التبريد بالكامل و المروحة عندى 8 ريشة و مش لاقى حل لمشكلة الحرارة بعد العمرة حتى الان و قبل العمرة كانت الحرارة فى عز الحر و زحمة المرور و الموشر لايتعدى الثلث الاول باى حال من الاحوال و اتمنى ايجاد حل لهذه المشكلة عند خبرا اللادا .
و اشكركم جميعا على مجهودكم