عايز اظبط لادا موديل 1981

[dandorman2010]

السلام عليكم ورحمه الله
دلوقتي يا جماعه انا عندي لادا موديل 1981 بس بعافيه شويه
اولا العربيه مش هاينفع تتباع لانها بتاعه والدي الله يرحمه بس المشكله انها اتركنت 14 سنه من بعد ما اتوفي
المهم انا دلوقتي عايز اظبطها وهاقولكو الحاجات اللي فيها وياريت تساعدوني

اولا لما جيت ادورها بعد 14 سنه ركنه كل اللي عملته اني حطيتلها بنزين طبعا بعد تنضيف التانك وجبتلها بطاريه ولقيتها دارت
ساعتها عرفت انها عربيه اصيله قوي مع انها دلوقتي بتعمل حركات قله كتير
المهم انا غيرتلها
1) علبه الشكمان غيرتها ب 90 جنيه
2)غيرت طقم الكهرباء ب 45 جنيه
3)ظبط الفرامل وعدلت نقطه الفصل في الدبرياج

المشاكل اللي فيها
1)الريداتير مصدي جدا وهاغيره وروحت لواحد بتاع ريداتيرات قالي يتغير ب ريداتير نحاس ب 300 جنيه مش عرف اذا سعره كده فعلا ولا لا
2)دلوقتي العربيه مابتدورش اصلا يعني المفتاح في الكوناكت بدل ما يدور العربيه الاقيه بيهمل صوت تكه والعربيه مابتنطقش
3)بالنسبه لسمكره العربيه روحت لسمكري قالي هايغير الشنطه والكبوت علشان كده عايز اعرف هما بكام وهل ينفع اركبلها كبوت لادا الجديده
4)بتاع الدوكو قالي هايتكلف رشها فرن 1200 جنيه بالمواد بتاعه الدهان ده صح ولا غلط ولو هاعمل ميتاليك تاسعر هايزيد ولا لا
5)طابلوه العربيه بايظ اخر حاجه ومشقق اقوي من الشمس فعايز اعرف لو هايتركب جديد هايعمل كام

ياريت يا جماعه اي حد يعرف اي حاجه من الحاجات دي يرد عليا ضروري لاني محتاس

[engaass]

المشاكل اللي فيها
1)الريداتير مصدي جدا وهاغيره وروحت لواحد بتاع ريداتيرات قالي يتغير ب ريداتير نحاس ب 300 جنيه مش عرف اذا سعره كده فعلا ولا لا
سعره كده فعلا بس اتاكد انه 3 ماسورة
2)دلوقتي العربيه مابتدورش اصلا يعني المفتاح في الكوناكت بدل ما يدور العربيه الاقيه بيهمل صوت تكه والعربيه مابتنطقش
متهيألى بص على المارش و سلوك الكهرباء بين الاسبراتير والبوجيهات
3)بالنسبه لسمكره العربيه روحت لسمكري قالي هايغير الشنطه والكبوت علشان كده عايز اعرف هما بكام وهل ينفع اركبلها كبوت لادا الجديده
هاتغير ليه وبعدين هيه لو 4 فانوس يبقى مينفعش
4)بتاع الدوكو قالي هايتكلف رشها فرن 1200 جنيه بالمواد بتاعه الدهان ده صح ولا غلط ولو هاعمل ميتاليك تاسعر هايزيد ولا لا
اعتقد السعر معقول بس هى مش ممكن تتلمع وخلاص
5)طابلوه العربيه بايظ اخر حاجه ومشقق اقوي من الشمس فعايز اعرف لو هايتركب جديد هايعمل كام
ممكن تروح لواحد سروجى يكسية جلد واعتقد ده افضل حل

ياريت يا جماعه اي حد يعرف اي حاجه من الحاجات دي يرد عليا ضروري لاني محتاس

نصيحة اخويا
متصرفش كتير عليها لان فى حالة اعادة بيعها مش هاتجيب اللى اتصرف عليها

[dandorman2010]

الف شكر يا باشا بس انا كده كده ماكنتش ناوي اصرف اكتر من 3000 جنيه لان ماعييش غيرهم وفعلا انا روحت لكهربائي فعلا المارش طلع طالع عين اللي خلفوه وغيرلي المخدات لانها كانت محروقه زي الفحم بالظبط وبالنسبه للسمكره انا قررت اني مش هاغير الكبوت والشنطه هاخليهم واصلحهم وبالنسبه للرش لازم تترش لان لونها الاصلي كان احمر من الوقفه في الشمس بقت بمبي غامق يعني شكلها زباله اوي وانا ان شاء الله هاروح للسروجي بكره اساال علي الكسوه الجلد دي علي فكره انا بردو من حلوان والكهربائي اللي عمللي المارش اسمو ياسر اللي في شارع عبد الرحمن هو شغلو نضيف بس حراق شويه