نصيحة خالصة لوجه الله؟؟؟!!!

[mohmonkha]

انا شايف ان كل الاخوة اللى فى المنتدى مش عاجبهم العربية اللادا مع انهم بيركبوا اللادا، وانتوا حيرتونى بع ما كنت هشترة لادا 2107 مصرى مكيفة 2006 برجع فى كلامى تانى ، حد يقول كلمة منصفة لوجه الله
مشكوروووووون

[fahd_628]

بص يا باشا الادا عربية شغل من الأخر يعنى لو ساكن فى حتة مكسرة او بتمشى فى حتت مكسرة كتيير او بتهلك العربية الادا مبتقولش لأ بس من ناحية النعومة و الراحة انسىىىىىى

شوف بقى احتياجاتك اية

و صدقنى مش بهظر لو عاوز تركبها شوف تاكسى لادا جديد و وقفة و قولة اى مشوار و اركبة و شوف اية اخبارها لو عجبتك توكل على الله لو معجبتكش شوف حاجة تانية

[sab3aawy]

بص، اللادا هتخدمك لكن مش هتريحك

يعنى هى مش هتشتكى من مشاكل الطرق فى مصر (باستثناءء المشكلة الأزلية الأبدية بتاعة ملص بيض المقصات بتاعتها) ، واللى هيركبها معاك هيكون مبسوط جدا لأن شاسيهها مريح جدا، لكن مشاكلها كلها تتعلق بمنظومة التحكم فيها، يعنى الديريكسيون تقيل، والفتيس تقيل، والبنزين تقيل، والفرامل تقيلة، والدبرياج تقيل، وزاوية دورانها معدومة ومحاولة الركنه بها نوع من انواع الجهاد، يعنى من الآخر تصنع منك بطل رياضى، كما انها عاملة زى الزوجة البلهاء، طول الوقت ليها طلبات بس طلبات عبيطة وغير مكلفة، لكن لو سهيت عن طلباتها تنكد عليك ، يعنى مرة بليه دينامو بعشرة جنيه، مرة حشوة طرمبة مية بعشرين جنيه، كدة يعنى، لكن من اول يوم تجيبها لازم تتابعها وتكون بتتعامل مع ميكانيكى كويس، لكن فى مسألة التحمل وعمر السيارة الطويل هى تضاهى السيارات من اعرق الماركات، كما ان ليها ميزة اخرى هى ان الناس بتخاف منك فى الشارع وبتوسع لك

[gomha]

أنا شخصيا بحترم الادا جدا عربية عملية صيانة سهلة قطع غيار متوفرة خارج التوكيل اسعارها تعتبر ارخص قطع غيار فى السوق رغم انها استهلاكية فى قطع الغيار ولكن انصحك بالروسى لان الجميع اشتكى من المصرى والعيوب الموجودة فيه مع ميزة ان الروسى الماكينة بخاخ يعنى توفير فى البنزين واداء اعلى لانة نتاج التعاون مع شركة شفورلية الشريك الاساىى لشركة الادا وعلى العموم انت واختيارك يرجع لك وانا شخصيا قررت ان اترك الادا ليس لشىء غير حب التغير واذا تحب تعرف اختيارى الجديد فسوف يكون هايلوكس 2كابينة مواصفات خليجية لانى افضل السيارات الخدمية العملية المرتفعه عن الارض خصوصا ان مصرنا الحبيبة كلها مطبات صناعية من المرور طبيعية من الحى و الكهرباء والمياة وانا الان اسئل عن موضوع الضرائب عن السيارت النقل حتى استطيع اعمل حسابى سعر السيارة 135 ألف جنية تحياتى لك والتوفيق فى الاختيار

[eng_mkhalaf]

عربية سيئة والشاهين برقبتها وبس

[gomha]

انا اسف انا ضد الشاهين بكل تاكيد وعن تجربة عضلات ضعيفة صالون غير مريح شغل مصرى اى كلام بودى يتاكل من نفسة سعر مبالغ فيه رؤية جانبية غير مريحة لا أثق فى الشاهين للسفر مسافات طويلة بكل تاكيد لا انصح بها ابدا

[sab3aawy]

وانا الان اسئل عن موضوع الضرائب عن السيارت النقل حتى استطيع اعمل حسابى سعر السيارة 135 ألف جنية تحياتى لك والتوفيق فى الاختيار

لو هترخصها نقل الجمارك هتكون قليلة جدا لكن لازيم يكون لها تأمين سواق وبتدفع مؤسسة سنويا، لكن لو هترخصها ملاكى جماركها اعتقد هكتون اكثر من 100% من تمنها

[thegoodhacker]

يا سيدي الفاضل توكل علي الله واشتري اللادا بس جيب الروسي وانت حتبقي مبسوط بيها اوي لان اللادا المصري ناس كتير اوي بتشتكي منها ان فيها عيوب تصنيع كتير.......
صدقني اللي يركب اللادا ويتعود عليها صعب جدا يغيرها معظم الناس اللي اشترت لادا قبل كده بتقعد معاهم مش اقل من خمس او ست سنوات علشان يفكروا يغيروها ......
عربية اعتمادية لاقصي الحدود و ان شاء الله مش حتعطل منك الا نادرا و موضوع ملص البيض ده كانه مش موجود اهم حاجة تفحص العفشة كل ستة شهور و تشحم البيض و لو احتجت تغيره غيره بنوع اصلي .......
وهي عربية عائلية و صاجها قوي يتحمل البلاوي اللي بتحصل في الشارع و صالونها واسع غير الشاهين اللي صالونها ضيق جدا كانك راكب عربية صغيرة عكس شكلها الخارج .......

[hamadaalo2002]

كلام الاستاذ سبعاوي ممتاز جدا جدا جداااا

انا شايف انها هية اللي تصلح لشوارعنا ولكن ماذا عن تركيب الباور في ال 2105؟؟؟

[ehab08]

السلام عليكم ورحمة الله وبركاته

كلام الأستاذ سبعاوى خير الخلاصه
العبد لله استخدم الادا روسى موديل 1976 لما كانت مع والدى رحمه الله
ومره تانيه موديل 2003 مصرى بصراحه كان تقفيل الروسى برقبة المصرى
بس للأمانه معرفش ايه اخبار الروسى حاليا
المهم ان الادا حمالة آسيه ومطبات وواسعه جدا من جوه
وعشان تتغلب شويه على مشكلة ثقل الدريكسيون كون حريص على تظبيط الكاوتش على الأقل مره اسبوعيا ولو حتجيبها زيرو إن شاء الله وتحافظ على تغيير الزيت وصيانتها كل شهر عند ميكانيكى ثقه ممكن تستمتع بيها لمدة 4 سنوات بدون مشاكل إن شاء الله

[emadno1]

اللادا عربيه زى الفل لو يهمك الشكليات و كلام من دة كبر دماغك منها و لكن كعربيه حماله اسيه و مرمته فهى عربيه ممتازه اهم حاجه تتابع صيانتها و بس

[mohmonkha]

شكرا لجميع الردود ، وانا جديد فى المنتدى وماكنتش اتوقع الفائدة دى ، وان شاء الله هشترى لادا روسى اخذا بمشورتكم ، مشكورررووووووون

[mohmonkha]

بص يا باشا فى موقع انا دخلت عليه اسمه سيارات مصر او نيل اتو هتقدر تحسب اى ضرائب ومصروفات مرور من عليهم ، وشكرا

[firstknight216]

بص يا باشمهندس اللادا عربية اللي عايز يركب اي عربية وخلاص لأنها رخيصة في الثمن وقطع الغيار
لكن كلها عيوب وديه كلمة لوجه الله لو في فرصة انك تشتري اي عربية تانية غير الصيني طبعا اتوكل على الله لكن اللادا لو الدنيا زنقت معاك وعايز تجيب عربية وخلاص روح واشتري لكن هي عربية لا تعليق عليها

[H.ibrahim]

كده تمام اوى و ضحت الصورة

اعتقد كده وضحت الصورة بالنسبة للادا فهى عربية حمالة اسية و مصاريف قطع الغيار و الاكسسورات رخيصة و سهولة الصيانة عند الميكانيكى و لايعيبها الا ثقل الدركسيون و الخشونة والصوت العالى وكده باذن الله تعالى سوف اتوكل على الله و اشترى لادا ( مستعملة ) و لكن يبقى سوال هل 2105 افضل ام 2107 ؟ مع الشكر لجميع من ساهم بوقته ومجهوده وخبرته فى توضيح الصورة لنا و جزاكم الله خيرا .:):D:):D