التعديلات المطلوبه إجراؤها على لادا 2017 روسى

[scientist9508]

بسم الله الرحمن الرحيم
أحمد الله و أثنى عليه ثم أما بعد
إننى قرأت آراء أصحاب الخبرات الكبيره فى السيارات فيما يخص المقارنه بين الماروتى و لادا و تقريبآ أجمعت الآراء على لادا
و قرأت أيضآ إجماع خبراء لادا على أن أفضل لادا هى 2107 روسى
لذلك أنا أحتاج مساعده من خبراء لادا 2107 روسى أن يساعدونى فى الآتى
1 - ما هى التعديلات المطلوب إجراؤها على لادا 2107روسى عقب شراؤها مباشره؟و كم تكلفتها؟و أين يكمننى عمل هذه التعديلات؟
2 - هل النيفا الروسى الجديده أفضل أم لادا 2107 روسى أفضل؟ و إن كانت النيفا أفضل فمن أين يمكننى شراؤها؟ و ما هى التعديلات التى يجب عملها فى هذه السياره فور شراؤها مباشره؟و كم تكلفتها؟و أين يكمننى عمل هذه التعديلات؟

أرجو المساعده من الخبراء لأننى أنتظر الرد حتى يمكننى إتخاذ قرار الشراء

و أشكركم على مساعدتكم و لكم من الله الثواب بإذن الله

[mrastra]

اخى الكريم
بعد التحية
العربية النيفا حاجة والـ 2107 حاجة تانية
يعنى ما ينفعش تكون محتار تجيب نيفا ولا 2107
مختصر الكلام لو حضرتك العربية لاسرة يبقى اكيد هاتجيب الـ 2107
اما لو حضرتك جايبها ليك شخصيا يبقى ممكن تفكر فى النيفا ومش عارف موجودة عند الامل ولا لا
لو جبت العربية واستلمتها هانتكلم عن الـ 2107 اول حاجة تصلى صلاة الشكر
وتحاول تزكى عنها حاجة كدة باربع رجول بس تعزمنا
اهم حاجة تستلم العربية صح ما تخلهمش يكروتوك
وبس ما تعملش فيها اى تعديلات وانما ممكن تعمل زجاج كهرباء وانزار
تحافظ على مواعيد الصيانة الدورية
وما تقرصش على العربية اثناء فترة التليين لغاية اما الموتور يتفتح
وربنا يوفقك

[waelfarid]

اربع رجول يعني فرختين هههههههههههه
لصاحب الموضوع خش علي السيارات الجديدة في كونتكت كار عالنت وشوف المواصفات والاسعار ونقي اللي يناسبك وممكن تاخد الروسي ويركبولها باور وتكييف في التوكيل حسبة 5ونص ستلاف جنيه
وركب لها اربع كارتيرات علشان طرطشة مية الشتا لوجاية من غير
ولو حابب تحطلها غاز ضروري تغير سوستها بسوست 132 وكاوتشات تعلية مرسيدس وربنا يحفظنا جميعا واسرنا وممتلكاتنا قادر يا كريم

[scientist9508]

بسم الله الرحمن الرحيم
أتقدم بالشكر للأخوه الكرام الذين أفادونى كثيرآ وذلك لأن معلوماتى عن السياره لادا ليست بالكثيره و أحتاج لمن ينصحنى

[Defender]

بالنسبة للتعديلات اللى عملتها هي
1- اشتريت ردياتير نحاس إستيراد ،
2- عملت مفتاح شد للمروحة الكهربائية يعني بتشغل مروحة تبريد الردياتير بزرار جنب زرار النور وتقدر تطفيها وتشغلها بيها فى حالة إذا الثرمستات مشغلش المروحة او عايز يتغير
3- وصلت مروحة التكيف مع المروحة الكهربائية بيشتغلوا مع بعض ويفصلوا مع بعض لضمان مستوي تبريد افضل

--
ممكن تبص على عربيتي للادا 2107 مو 2008 انا ببيعها وهي فى حالة الزيرو وشاريها بخمسين ألف وعملو ليا تخفيض ألف جنية
، وهي مصري مش روسي على العموم
لأن لما كنت بتشتريها من 3 سنيين قالوا التكيف والباور السنتر مش بيجي مع الروسي بيجي مع المصري ،
وربنا يكرمك بالخير إن شاء الله

http://www.nilemotors.net/Nile/229147-2107-2008-a.html#post3873610293

[a7madramadan]

انا كتبت المشاركة دي من زمان وكررتها بتاع 7 مرات و دي الثامنة للإخوة الي بيشتروا عربية لادا زيرو :

شهر 12 2009 جيبت لادا 2009 2107 من الآخر عربية 10/10 مافيش اي اعطال مريحة جدا بجد حاسس اني راكب عربية زيرو و نظيفه هي بس محتاجة في الاول شوية كماليات .... هات روسي انسى حاجة اسمها مصري .. عموما الكماليات الي انا ركبتها اول ما شريت العربية الآتي :

طقم جرايد....... ليه مكان على الباب
طقم دلايات موش فاكر كان جاي معاها دلايات يا امامي بس او خلفي بس كملتهم :)
عتب هيحميها من تحت شوية و شكله حلو فعلا
كوفرات للكاوتش علشان الطينة و البارومه فوق العجل
قزاز كهرباء امامي نصيحة ركبه و موش هتندم و ممكن تركب لل 4 لو هتركب العيلة كتييير هيريحك كتيييير قوي من القزاز اليدوي وده عن تجربه شخصية و تتأكد انه هيركبلك مقصات موش موتور للواير .. والموتور يكون استيراد من عربيات ياباني ده الأفضل
فرش جلد للكراسي علشان حماية للفابريكة القماش و كمان شكله هيبقى اجمل بس اعمله عند سروجي محترم و بلاش تسترخص و تجيب الجاهز
كاسيت سي دي و سماعات هات حاجة نظيفة و سيبك من الي هيقولك دي لادا انت الي هتسمع موش الناس
وحاجة مهمة كمان فرشت الارض و الشنطة جلد علشان الموكيت الاسود موش هيتحمل
و شوية رفائع اخرى بقى على زوقك انت

وموش لاقي اسبويلر خااااااااالص يتناسب مع شكلها


اول ما تاخدها من التوكيل او الموزع روح للتوكيل و خليهم يعملولها صيانة ال 1000 كيلو (ماتستغربش من الكلام انا باتكلم بجد ) علشان يغيرولك الزيت و زيت الكرونة و شوية حاجات كده و اتاكد ان العربية عالية من الخلف ولو واطية قولهم يحطولك علاية خلفية ... الزيت الي فيها سيء جدا جدا و زيت الكرونة أسوأ وأسوأ .. ودي نصيحة سمعتها من ناس كتيييرة قوي قوي قبل الاستلام وبعد الاستلام بيوم و استغربت منها بس ريحت دماغي وعملتها


هيه كده اللادا لازم تصرف عليها حبة في الاول و ماتستخسرش حاجة فيها و على طووووول خلي بالك لازم تشحم العفشة و تربطها شهريا و دائما روح اعمل صيانتك في التوكيل راااااحة غير عادية (الاسكندرية خدمة 10/10.... بس في ناس بيشكو حبتين من القاهرة)

لو عندك اي استفسارات تانية انا في الخدمة

[scientist9508]

بسم الله الرحمن الرحيم
أشكرك بحراره على إضافتك الرائعه التى كانت كلها بالنسبه لى جديده فأنا لم أكن أعلم شىء مما كتبته
و أنا أؤكد لحضرتك تكرار الشكاوى من توكيل لادا فى القاهره وهذا مما جعلنى أستعين بأصحاب الخبرات مثل حضرتك لأننى لو قدر الله لى وإشتريت لن أتعامل معه
إن كل ما أريده أن أعلم كيف أتلافى عيوب لادا لتبقى مميزاتها بلا أى منغصات
و لا أريد الإطاله و لكننى أريد تقييمك لهذه السياره بعد سنوات من الإستخدام و السفر لمسافات طويله و خاصه مشكله سخونه المحرك و التى يشكو منها كل مالكى لادا
و السلام عليكم و رحمة الله و بركاته

[mrastra]

بسم الله الرحمن الرحيم
أشكرك بحراره على إضافتك الرائعه التى كانت كلها بالنسبه لى جديده فأنا لم أكن أعلم شىء مما كتبته
و أنا أؤكد لحضرتك تكرار الشكاوى من توكيل لادا فى القاهره وهذا مما جعلنى أستعين بأصحاب الخبرات مثل حضرتك لأننى لو قدر الله لى وإشتريت لن أتعامل معه
إن كل ما أريده أن أعلم كيف أتلافى عيوب لادا لتبقى مميزاتها بلا أى منغصات
و لا أريد الإطاله و لكننى أريد تقييمك لهذه السياره بعد سنوات من الإستخدام و السفر لمسافات طويله و خاصه مشكله سخونه المحرك و التى يشكو منها كل مالكى لادا
و السلام عليكم و رحمة الله و بركاته

مين قال لحضرتك ان كل مالكى الادا بيشتكو من الحرارة الكلام دة مفتعل مش مظبوط
حاجة من اتنين
ممكن اول ما تستلم العربية تلغى ثرومستات كوعة المياة وتركب مكانة كاوتشة مطببة جاهزة
او تخلى كل حاجة زى ما هى واما الثرومستات يبوظ ما تغيرهوش ولكن تلغية كما بالخطوة السابقة

[a7madramadan]

الحرارة دي كلام فاضي وعاري من الصحة .... الناس الي بتلعب فالعربية يعني تعلي الإسبيراتير على الفاضي او تغير آلية المروحة ممكن تعاني من عدم اتزان الحرارة

والتقييم طبعا العربية لا غبار عليها .. تتحمل القسية .. بس هيه مش عربية رفاهيه .. يعني التكييف أي كلام خالص لإن العربية مافيهاش عزل حرارة للكاينة بشكل سليم ولو انت في حاجة حقيقية للتكييف أنصحك ماتشتريهاش ...

او انت ساكن في منطقة الطريق فيها مش معبد طريقة سليمة ومليان مطبات وحفر وخلافه .. ماتقلقش خالص على العربية كل الي هتحتاجة انك تربط العفشة بشكل دوري و طبعا مش معنى كلامي انك تمشي تهبد عربيتك على الفاضي والمليان ... وللمعلومة أي مشاكل في العفشة غالبيتها بتبقى نتيجه عن التقصير في الصيانة الدورية والتربيط والتشحيم وخلافه

ياريت كل شهر او شهر ونصف تروح تربط وتشحم العربية (العفشة تحديدا) و التقصير هوه الي هيخليك تشوف لا قدر الله المشاكل والعيوب ... انا اعرف سواق تاكسي معاه عربيته من اول 2008 شاريها زيرو للنهاردة مابيعملش يها غير صيانات دورية وتغيير زيوت و حاجات بسيطة أخرى .. أكبر حاجة عملها كانت تغيير إكصدامين لزوم النظافة علشان اتثنوا شوية من بعض الخطات السيطة و ترييح عض العربيات عليها بالضافة لتغيير الرادياتير نظافة حاجة زيادة بس جابه نحاس مش الومينيوم زي الأصل .... ومابيشكوش من اي شيء فالعربية خالص ..

ماتنساش الصيانة الدورية و تغيير الزيوت و خلافه دي حاجة مهمة جدا

انقل على طووول على 2.5 او 2500 لفة فالدقيقة ده المدى المتوسط للعربية عن عزم كويس واستهلاك بنزين معقول .. لو مستعجل حبة انقل على 3000-3200 بالكتيير أكتر من كده تبقى معدى أقصى عزم و تحرق بنزين على الفاضي ....

خلاصة الموضوع اهتم بالعربية هتعيش معاك وتريحك عالآخر ... عاملها همال وتخبيط على المطبات بلا داعي و حرق بنزين على الفاضي هتلاقي العربية عاملة معاك الواجب وزيادة عند الميكانيكية

[scientist9508]

بسم الله الرحمن الرحيم
سلام الرحمن على عباده
الأخوه الأفاضل الخبراء . . . لقد أسعدنى كثيرآ مشاركتم لى بخبراتكم مع السياره لادا. بعد القراءه و المطالعه و الإضطلاع على مختلف الآراء هذا ما وجدته.
عند شراء سياره لادا 2107 روسيه الصنع يفضل عمل الآتى.
1 - تغيير الردياتير الألومونيوم بآخر نحاسى مقاس 51 سم طول و 36 سم عرض ماركه دولفين مواصفان خليجى
2 - تغيير مروحه تبريد المحرك بمروحه تبريد فورد بقطر أكبر قليلآ
3 - إستبدال مروحه الثرموستات بمروحه ثرموستات دايو
4 - إلغاء وصله رجوع الياه بين الردياتير و المحرك و التى تساعد على تسخين السياره بسرعه فى الشتاء
5 - تركيب مروحه تبريد ثابته إضافيه على الردياتير و من ثم تركيب مفتاح تشغيلها فى التابلوه بجوار مفتاح النور حيث يتسنى تشغيلها عند الحاجه
6 - تغيير الإسبراتير بآخر إلكترونى
7 - تغيير كل سوست السياره بطقم سوست فيات 123 و كذلك كاوتش إرتكاز جميع السوست بطقم آخر
8 - تغيير زيت المحرك و الكورونا فور إستلام السياره
بعد إجراء كل ما سبق سأجد السياره هادئه و ناعمه جدآ و ستعمر ما أذن الله بذلك متى أخذت بالأسباب الآتيه
1 - المحافظه على تربيط العفشه شهريآ بإنتظام
2 - المحافظه على تغيير طقم الكهرباء شهريآ بإنتظام
3 - المحافظه على تغيير الزيت قبل الكيلومتر المحدد لذلك
أرجو من الساده خبراء لادا 2107 الروسى إضافه أو تصحيح من كتبته فأنا أثق بكم كثيرآ و آمل أن يهدينى الله لأرشد أمرى
و أختم بسلام الله على أنفع الناس

[a7madramadan]

انا معايا عربيتي بقالها سنة ونص ما غيرتش الرادياتير بس باحافظ عليه بماء أزرق بتاع الرادياتير بدل ما يبوظ مني و اضطر اغيره ويبوظ و اغيره تاني

وماغيرتش ولا مروحه فالعربية والعربية مش محتاجة تغيير مراوح آلية التبريد في العربيات الجديدة موديل 2008 + ممتازة و اطلع بيها مشاوير طويلة على الصحراوي بالثلاث ساعات و باشد مش بامشي بالراحة قوي يعني و عمرها ما سخنت ولا عدت نصف الحرارة و حقيقي بلااااااااااش لعب فالعربية كتير لإنها مش محتاجة التغييرات دي

ومش متأكد من موضوع الاسبيراتير الاليكتروني ده بس أعتقد ده بيتغير وقت لما عربيتك تقدم وتلاقي عندك مشاكل في الكهرباء و فالغالب بتبقى للعربيات الكاربيراتير مش الاينجيكشن و الروسي انجيكشن

لما تلاقي المروحة حصل فيها حاجة ابقى غيرها ولما تلاقي الرادياتيرحصل فيه حاجة لا قدر الله ابقى غيره

بالنسبة لموضوع السوست ده أكيد بيخلي العربية أنعم شوية على حد قول المجربين بس ما اعتقدش انك محتاج تغيرهم اول ما تجيب عربيتك زيرو ... بعد سنتين او ثلاثة لما تلاقي نفسك عاوز تعمل عمره للعفشة ابقى غيرهم

النسبة لوصله رجوع الهواء السخن أغتقد دي كانت مشكلة في العربية 2105 و في كل الــ 2107 مش موجودة اساسا والله أعلم و هتلاقي في زي خرطوم هواء معزول طالع على الشبك الأمامي أعتقد هوه ده الي كان بيبقى مفتوح على العربية زمان و ده كان معمول علشان العربية كانت مصنعة لروسيا و جوها برد فظيع


دي المعلومات الي عندي و متأكد منها و للإخوة الخبراء في المنتدى الإضافة

أتمنى اكون أفدتك ان شاء الله

[scientist9508]

بسم الله الرحمن الرحيم
أحمد الله أن لم يتخذ صاحبة ولا ولد

أشكرك شكر عميق على مشاركتك خبرتك معى فأنا كنت مشفق من أن تكون كل هذه التعديلات و التغييرات هى دليل على سوء صناعه السياره
و أكرر شكرى لك

و السلام عليكم ورحمة الله و بركاته

[a7madramadan]

العفو يــا أستاذ احنا هنا إخوة :)

و التعديلات دي بالظبط كده هيه تحسينات .... يعني حتى الي جايب عربيات من الفئة الأعلى نسبيا زي مثلا الكيا سيراتو بيجيله وقت بيحب يجدد فيها ... يركب Strut-Bar و فيلتر سبورت و Exhaust system و يغير الفرامل بأخرى أقوى و تغيير السوست لأخرى أقوى مثلا لو عاوز ثبات أعلى فالسرعات العالية او أطرى شوية لمزيد من الراحه على المطبات .....

ويسأل نفسه هل العربية كانت وحشة قبلها ؟ طبعا لأ بس في مساحة للتطوير و التحسين ولكل التحسينات ثمنها و مش طبيعي كل الي بيشتري عربية زي المثال السابق كيا سيراتو هيصرفله 15 ألف جنيه زيادة علشان العربية تثبت شوية و و تزيد تسارعها و قوة فرملتها أول ما يشتريها زيرو ...

أعتقد المثال ده هو أبسط مثال على الحاجات الي تم ذكرها من التعديلات الي شرحتها لحضرتك ... وهي شغاله كويس جدا بس زي ما تقول في مساحة للتطوير :)

موفق ان شاء الله في شراء عربيتك

[SYD]

خبرة 7 سنين لادا من الزيرو لحد 135000

اولا السلام عليكم ورحمة الله وبركاته
ثانيا اهلا بيك في هذا المنتدي الغني برواده
ثالثا ودة الأهم

انا كنت راكب لادا 2107 موديل 2005 1600 مصري
اشتريتها في شهر 9 سنة 2004

الادا مع الأسف عربية سفر مش عربية وسط البلد
لعدة أسباب منها علي سبيل المثال لا الحصر
1- العربية تقيلة (وزن ومشي) يعني الدريكسيون والعفشة والموتور
ازاي الكلام دة ؟؟
العربية دي تقيلة في طلعتها يعني لو طلعت بتبقي صعب توقفها بسرعة بعد الطلعة علي طوول ولو وقفت بيها هتحس انك بتكسر الدنيا
2- فعلا العربية عزلها وحش يعني لو ركبت تكييف او هي فيها تكييف مش هيديك الأداء العالي
3- الدريكسيون تقيل يعني في الأشارات والركن والكلام دة هتتعبك
4- مطبات مصرنا العزيزة والحفر بتهد في العربية لتقل وزنها واحتياجك لتربيط العفشة شبه شهريا

خلي بالك انا في منتهي الأمانة معاك والله وبقولك علي العيوب قبل التعديلات الممكنة لو قدر الله واشتريتها

العربية دي بجد حلوة جدا جدا جدا وليها ايام ومواقف معايا لا تنسي وحمالة الأسية وكانت شايلة عيلتي بالكامل نفر نفر وكل فرد في الأسرة استفاد منها لأقصي حد وانا شخصيا عيطت وانا ببيعها والله ودلوقتي وانا بكتب عيني اتملت بالدموع عليها وربنا يعلم بحبها قد ايه وحتي بعد ما بيعتها بدخل المنتدي بتاع لادا

حضرتك انشاء الله لما تجيبها هات الروسي مش المصري لسهولة اعادة البيع الله لا يقدر
او هات المصري تكييف وباور لو مش ناوي تبيع وهتخليها معاك فترة
بس نصيحتي مفيش عربية بتخلد مع الواحد واوعي تجيبها قسط

حضرتك مفيش اي مشاكل من الحرارة لا الردياتير ولا الكوعة ولا اي حاجة خالص
انا لحد سبع سنين ماشي بالردياتير الحديد مش الومنيوم وياريته الومنيوم علي الاقل هيسخن بسرعة ويبرد بسرعة بس هو بيبقي حديد ولونه اسود
انا لحد سبع سنين ماشي بنفس المروحة صحيح هي اتحرقت بسبب شورت او ماس كهربائي بس لما غيرتها جبت بردو بتاعتها ب 120 جنيه
ركبت مفتاح للمروحة بلمبة مبين عشان لما تدور ينور وينفع ادورها بنفسي لو حابب
غيرت الثرموستات بتاع الردياتير بواحد تاني بيشتغل علي 89 ويفصل علي 67 ودة هيخلي المروحة تشتغل فترة اطول

للأسف غيرت الكوعة بتاعة المياة بواحدة تانية من غير ثرموستات
ودي ليها قصة
الكوعة دي ليها بوابة علي ثرموستات، لما المياة داخل الموتور توصل لدرجة حرارة معينة (مصمم عليها الموتور) البوابة تقفل وتحتفظ بالمياة داخل الموتور علي حرارته ولما درجة الحرارة تزيد عن الحد المسموح ترجع البوابة تفتح فتسمح بمرور المياة من تاني عشان تروح تبرد من الردياتير ولما تسخن للدرجة المطلوبة ترجع تقفل وهكذا تقفل للحفاظ علي درجة حرارة الموتور وتفتح لما تزيد عن الحد ولما المياة توصل للدرجة المطلوبة تقفل

ودي في غاية الأهمية
الزيت ليه درجة حرارة معينة للقيام بوظائفه من تزييت وتليين لأجزاء المحرك والتبريد وازالة الشوائب
ولما حضرتك بتلغي الكوعة بتبرد الموتور اكتر من اللازم وبالتالي الزيت بيفقد خواصه ومن ثم لن يستطيع القيام بوظائفه المذكورة سالفا

بالنسبة للسوست حضرتك ممكن تغيرها بعد 3 سنين او اكتر حسب مشيك بسستت اخري اسباني بس بتوع الادا
حضرتك ممكن تعليها شوية من ورا بجلبة تعلية بحوالي 8 جنيه بتوع 124

حضرتك ممكن تركب كارتيرات للعجل بس خلي بالك ممكن تعمل بارومة لو بتغسل العربية كتير لأنها بتحوش المياة

حضرتك لازم تغير الزيوت كلها بعد اول 1000
الزيوت كالتالي
1- زيت الماتور (شل الأحمر) hx3 اوعي تجيب التقيل، بيبقي مكتوب علي العلبة زيت تقيل، هات العادي ودة حضرتك هتمشي عليه لحد 10,000 ودة لسبب : العربية دي موتورها بيفضل يطلع رايش لحد ال10,000 فحضرتك هتجيب الزيت دة وتغيره كل 1000 او 1500 بالفلتر، وبعد ال10,000 الأولي ممكن تجيب بعد كدة (شل الأصفر) hx5 ودة بيمشي 5000 كم او اي زيت تخليقي بيمشي 10,000 كم
يجب الأهتمام بالزيوت وتغيرها بأنتظام والفلتر
2- زيت الفتيس والكرونة يجب التغير بزيت 80W/90 اول لما تجيب العربية ودة بيتغير كل 30,000 ودة غالبا مش موجود غير عند اسو او مصر امارات والأحسن حضرتك تجيب الزيت عبوات كيلو وتغيرهم بنفسك عند اي حد بتاع زيوت
اوعي تروح المحطة وتقولوا غيرلي الزيت، هيحط زيت 140 ودة تقيل جدا علي الفتيس والكرونة وخصوصا انهم لسة جداد
3- تغير زيت الفرامل، بردو بيتغير كل 30,000 او سنتين ايهما أقرب وممكن تجيب Dot3 او Dot4 من محطة شل او تجيب زيت بندكس عبوة صفيح لونها ابيض في اسود بخط أحمر (مالهاش علاقة بعلم مصر)
4- كل حوالي 5000 كم تروح تشد الكاتينة او تغير بلية الشداد
5- تغير البوجييهات كل 15000
6- تغير طقم الكهرباء كل 15000
7- الكشف الدوري علي التيل الفرامل والسيور والعفشة والزوايا

لكن لو حضرتك بتمشي في البلد كتير وامكانياتك حوالي 45,000 جنيه وعايز عربية عملية وجميلة جدا فوق الوصف ممكن حضرتك تركب بولو 2001 او ابيزا 2001 تكييف وباور ومرايات كهرباء وزجاج كهرباء والماني واعتمادية وثابتة وسريعة وخفيفة وقطع غيارها بتعيش

انا ليه بقارن بين اللادا والفولكس ؟؟؟؟
لأني ركبت دي وركبت دي

الادا مفيش ميكانيكي متخصص لادا ولو في هتلاقيه واخدها بالدراع عن طريق الخبرة والفهلوة
لكن الفولكس (سواء بولو او ابيزا) الميكانيكي بتاعها بيكون شغال في التوكيل بناء علي كتالوجات واسس علمية

يعني من الأخر الادا مالهاش مرجع ترجع ليه في الأعطال والتشخيص
لكن الفولكس ليها كتالوجات وميكانيكي بيفهم في موتورها وليها كمبيوتر تشخيص اعطال وكمبيوتر تصحيح اخطاء

والرأي في النهاية لحضرتك

اسف علي الأطالة لكن حبيت اعرض الموضوع من جميع جوانبه

والله المستعان
،
،