باركولى ....مش انا اتسرقت تانى النهارده

[midonbtc]

الحمدلله فى السراء والضراء ...النهارده وانا راكن العربيه تحت البيت بفتح شنطه العربيه وفوجئت بالمفاجاه المدويه

ملاقتش الاستبن ....للمره التانيه يا شباب للمره التانيه فى اقل من سنه تتفتح شنطه العربيه ( بدون اى اثار لاى كسر ) ويتاخد منها الاستبن والاستبن فقط يعنى لاقيت الكوريك ومفتاح العجل زى ما هما ...

انا بجد وبلا اندهاش قعدت اضحك يعنى انا بدفع لها اقساط لحد النهارده ..وبحاول اخلى بالى واحافظ عليها اتسرق كدا مرتين ورا بعض وبمنتهىالبساطه وبدون اى اثار كسر ...

رجاء بعد مواساتى افيدونى اعمل ايه قبل ما تبقى التالته تابته ...قولولى اعمل ايه عشان متسرقش تانى

[MOK3336]

الحمد لله انها جت علي قد كده في ناس العربية كلها بتتسرق تبقي خالي بالك

[Khaled_Nowaihy]

مرة كنت عند السمكرى وحكى لى ازاى بيفتحوا الشنطة الخلفية للادا وال 128 بسهولة
بضربة كف بزاوية معينة فى جانب باب الشنطة تلاقيها اتفتحت
والحل بتركيب صباعين فى باب الشنطة وعمل ثقبين أمامهم فى جسم العربية
ولما الشنطة تتقفل الصوابع بتعشق فى الخروم دى
حاول تشوف سمكرى ينفذ لك الفكرة دى

[midonbtc]

مرة كنت عند السمكرى وحكى لى ازاى بيفتحوا الشنطة الخلفية للادا وال 128 بسهولة
بضربة كف بزاوية معينة فى جانب باب الشنطة تلاقيها اتفتحت
والحل بتركيب صباعين فى باب الشنطة وعمل ثقبين أمامهم فى جسم العربية
ولما الشنطة تتقفل الصوابع بتعشق فى الخروم دى
حاول تشوف سمكرى ينفذ لك الفكرة دى

بارك الله فيك ..هيا فكره برضوا بس بتهياالى صعبه التنفيذ

يا جماعه لو حد عندوا حلول تانيه ياريت يقول الله يكرمكوا انا مرعوب انى اشترى استبن ويتسرق تانى

[midonbtc]

ايه ياجماعه هوا الموضوع بالنسبه ليكوا مر مرور الكرام ليه كدا ...فعلا محدش بيحس بالمشكله الا لما يعيش فيها ...عموما انا كان نفسى نوصل لحل لان اللى حصل معايا ممكن يحصل مع اى حد فيكوا

[Khaled_Nowaihy]

حل تانى ولو انه مش عملى قوى
انذار (بلدى) بيعملوه الكهربائية
يتوصل على الكلاكس ... لو الشنطة اتفتحت العربية تزمر

[beshomilan]

حل تانى ولو انه مش عملى قوى
انذار (بلدى) بيعملوه الكهربائية
يتوصل على الكلاكس ... لو الشنطة اتفتحت العربية تزمر

فعلا حل ممتاز ومفيش احسن منه ابدا واعمل للعربية كلها انذار مش الشنطة بس

[MOSHAKS]

احب اقولك ان معايا نيفا ومع خالى عربية لادا 2107 ولما بيجى عندنا بفتح العربية عنده بمفتاحى وبدورها كمان واحركها من مكانها واسهل حاجه مفتاح الشنطة . نصيحة منى الحم من جوه الشنطة جنب الاستين حلقة كده تعرف تربط فيها جنزير واربطه فى الاستبن وريح دماغك علشان لو عدى مرحلة الانذار يتصدم ان الاستبن مربوط
ومتسبش حاجه مهمة فى العربية واعمل مفتاح كهربا خفى يفصلك الكهربا لحسن يطمع فى العربية المرة اللى جايه وربنا يسترها

[SAMER_ENGINES]

حصلت معايا من 3 / 4 سنين كدة و برضه الاستبن فقط عدة العربية و مفتاح العجل و الكوريك كله زى ما هو و ربنا يكرمه الحرامى طلع ابن حلال و قفل لى الشنطة قبل ما يمشى..بس الهى ينقلب بفردة الكاوتش اللى اخدها كانت الاصلية بتاعة العربية و مداسها ملمسش الارض تلت اربع مرات على بعض و من ساعتها محصلش حاجة و الحمد لله بس انا بفكر اعمل انذار للعربية و الحمد لله بتيجى فى الحاجات دى مش فى العربية كلها و اهم شئ امن العربية كويس و حاول تركب انذار و يبقى للعربية كلها مش للشنطة و بس.

[M.Alaa92]

طب ممكن فى حل تانى كنت قريتو قبل كدة انك تعمل الشنطة تفتح بالكهرباء و تلغى المفتاح خالص مش عارف ممكن تنفع معاك ولا لأ

[mahgoup]

قدر الله وما شاء فعل

[mohamed2002]

قدر الله وما شاء فعل

[egyptiandiver]

الحمد لله انها جت علي قد كده

[إبراهيم المصرى]

ربنا يعوض عليك الموضوع ده فعلا شائع فى 2107 انا كنت اشتريت عربيه كسر زيرو وكان الاستبن مسروق منها وبرضه زى حضرتك الاستبن بس و الكريك وملف العجل مجاش جنبهم بس اول ما خدتها واشتريت استبن عملتلها انذار عند ادريان ب 170 ج بالتركيب ومعاه ريموت للسنتر وكان ممتاز جداً لحد مبعتها بيه

[AMOOOOOOOOOOR]

أفضل حل هو عمل مفتاح كهربائي للشنطة من الداخل وإلغاء المفتاح الخارجي اليدوي وكمان حاول تعمل للبطارية إطار من الحديد وتقفله بقفل لان فتح الكبوت كمان سهل ومش حقول إزاي لانها حصلت قبل كده مع واحد صاحبي .. ربنا يعوض عليك