رجاء الافاده بخصوص النيفا

[sherif0333]

قدامى نيفا 83 بماتور 31 1 الماني حالة ممتازة 1600cc الشكمان بيعرق مية صالون مجدد بالكامل من يومين فرش جلد في قطيفة وعمرة عفشة كاملة وعلبة دركسيون جديدة وكاوتش تيوبلس عريض وعمرة كهربة كاملة والعدادات شغالة كلها والانوار جميعها شغالة والسيارة رشة برة وجوة ولا تحتاج اي مصاريف سمكرة ودوكو جديد مطلوب فيها 14000
هل تغيير الموتور يعالج مشكله سرعتها لانى بحب اسافر على سرعات عاليه 160 و 170 وانا اسمع ان النيفا مش بتوصل للكلام ده ارجو الافاده سريعا وهل ال 128 مو 82 او 83 افضل

[monzer_500]

السلام عليكم ورحمة الله وبركاته .. النيفا عربية قويه جدا جدا فوق ما تتخيل وعربيه المهام الصعبة تقدر تمشي بيها في اى طرق ومن غير ما تخاف والكل يعمل لك حساب .. بالنسبه لمسألة السرعه فانا ما انصحكش انك تجري بالعربية لانها خطر لان العربية طبعا ً زي ما نت عارف عاليه ومحورها ضيق ودا بيزيد نسبه الخطورة مع السرعات العالية .. وارجع واقولك في التاني السلامة .. اما لو عايز طبعا تجري زي ما بتقول هتغير العفشه عشان تالها للسرعات وهتعرض الكاوتش وتقلل حجمه يعني يكون 14 مثلا .....منذر

[elpasha1]

السلام عليكم ورحمة الله وبركاته .. النيفا عربية قويه جدا جدا فوق ما تتخيل وعربيه المهام الصعبة تقدر تمشي بيها في اى طرق ومن غير ما تخاف والكل يعمل لك حساب .. بالنسبه لمسألة السرعه فانا ما انصحكش انك تجري بالعربية لانها خطر لان العربية طبعا ً زي ما نت عارف عاليه ومحورها ضيق ودا بيزيد نسبه الخطورة مع السرعات العالية .. وارجع واقولك في التاني السلامة .. اما لو عايز طبعا تجري زي ما بتقول هتغير العفشه عشان تالها للسرعات وهتعرض الكاوتش وتقلل حجمه يعني يكون 14 مثلا .....منذر

كلام 100/100

[إبراهيم المصرى]

عفوا السرعات اللى بتتكلم عليها حضرتك 160 170 دى عايزه عربيات جديده ويستحسن تكون اوروبى علشان تكون فيها مواصفات امان واستبلتى وفرامل كويسه اما النيفا ليها استخدامات اخرى ولو موتور 131 هيجيب السرعه الكبيره ديه يبقى متعملش انت كده وانا لا اعتقد انها توصل للكلام ده علشان الكرونا والفتيس مش هيساعدوا وبالتوفيق ان شاء الله

[sherif0333]

الف شكر على الردود يعنى تنصحونى بيها ولا 128 وسعرها كده اخباره ايه

[MOSHAKS]

انا هكلمك عن النيفا اللى معايا انا لسه راجع بيها من راس البر امبارح وده يعتبر اول مشوار طويل حوالى 300 كم اختبرها فيه من العاشر من رمضان حتى راس البر رايح جاى ده غير اللف فى المدينة 7 ايام
والصراحة مخذلتنيش سرعتى كان بين 80 و100 كم والصراحة كنت مرتاح جدا ومبسوط منها اوى خصوصا فى المطبات والمشى فى الطرق النص ممهدة مش بقلق وكفاية انك راكب عربية عالية وديه لوحدها متعة.
النيفا لو رايقة ومفهاش مشكلة فى الالات الجر هتاخد منها احلى شغل وسيبك من موضوع رشة جوه ده لان ده للاسف فكر ناس تعبانة ومش شرط علشان رشة تكون عاملة حادثة . يعنى تحب تشترى عربية رشة ولا تحب يكون فيها برومة سارحة فى العربية كلها ومش رشة
وموتور 131 مش وحش كويس بس اعمل حسابك هى مش بتاعت جرى يعنى لو ناوى بعد 120 كم منصحكش بيها
انما لو بتمشى طبيعى يبئا توكل على الله. وربنا يكرمك بالخير ان شاء الله

[monzer_500]

صلي استخارة .. اما انا عن نفسي بحب النيفا جدا

[sherif0333]

برده ياجماعه محدش قاللى السعر اخباره ايه وهى ولا 128 واستهلاك بنزينها

[sherif0333]

مش مهم السرعات همشي على المعقول يعنى مش هزود عن 120

[MOSHAKS]

برده ياجماعه محدش قاللى السعر اخباره ايه وهى ولا 128 واستهلاك بنزينها

انا هقولك مش علشان انا معايا نيفا لا علشان الفكرة نفسها. بالنسبة 128 تتميز فى حاجتين من وجهة نظرى اولا استهلاك اقل فى البنزين نسبيا وثانيا انها 4 ابواب مش 2 زى النيفا
النيفا بئا تتميز بانها قوية فى الاداء مفيش حاجة اسمها تحك فى المطبات بتمشى وانت مطمأن لانها عالية ومحدش ممكن يفكر يرخم عليك فى الطريق لان هزارها تقيل ولو باست حد هتخليه يعيط.
والنيفا مبتسخنش لان حوض الماتور واسع بيعبى هوا ودفع خلفى وديه لوحدها ميزة بعكس 128 دفع امامى على كبالن والنيفا بتحمل حمولة رهيبة ومتحسش انها شايلة حاجة وكمان ترحب ببنزين 80

فحضرتك لو تقدر تتغاضى عن موضوع الباب الواحد واللى عايز يركب ورا ينزل اللى اعد ادام وتتحمل نشوفيتها شوية فى العفشة وتعيش روح المغامرة معاها وانك راكب عربية عالية ليها احترامها فى الطريق توكل على الله
لو بتفكر فى عربية عائلية 4 ابواب سيدان واستهلاك اقل نسبيا فى البنزين يبئا شوف 128
واهم شئ الحذر من السرعات العالية والملفات خصوصا انها عالية
واستخير ربنا وان شاء الله يهديك للخير

وسعر النيفا كويس والماتور 131 ناعم واستهلاكه اقل من ماتور النيفا الاصلى
لو العربية زى موصفتها واذا ربنا كرمك وعرفت تنزل فى السعر فبردوا افضل لان اكيد فى حاجات هتظهر فتحسبا لاى طارق ومتنساش تشوف الكرونة فيها ونة هى والفتيس وفى ترشيح زيت ولا لا والله الموفق والاخوة هنا ممكن يضيفوا ليك معلومات اكتر

[monzer_500]

ولو عايز تتعرف اكتر علي النيفا لما تيجي تشتريها انا كنت ضتيف رد كده في موضوع اسمه الينفا وما لها وما عليها هتلاقيه باسمي لو حبيت تتعرف اكتر علي شويه نقاط بالنسبه للنيفا

[monzer_500]

طيب صلي علي النبي انا هقولك علي شويه حاجت تقدر تحدد بيها مدي كفائة العربية نيفا كويس هنقسمهم 3 اجزاء
1- الجسم الخارجي للعربية
2- العفشة
3- الموتور
4- الكارونه
اولاً : الجسم الخارجي للسيارة :-
*بص للعربية من جميع الجهات كويس وشوف حالة الدهان في العرية ايه . وطبعا مافيش عربيه نيفا موديل 80 مثلا مش هتكون رشت بره الا طبعا حالات نادرة .. شوف البرومه الي في العربية ومدي تأثيرها علي الصاج من برة ومن جوه .. وخد بالك دايما دايما دايما بتلاقي برومه تحت العتب بتاع العربية وفوق العجل بالظبط وفي الدواسات بص بعينك كده او مد ايدك في الصاج من جوه عشان تتاكد بعد كده قوم واقف جنب العربية وبص لجنابها وشوف في اى فروق بين الباب و والرفرف من ورا او قدام وكلك سطح العربية شوف اى تموجات غريبه مش طبيعيه في شكل جسم العربية او كميات معجون بكثافة في مناطق معينه كده ودي تقيسها بمغناطيس . ده بالنسبه للصاج وجسم العربية . بعد كده انزل تحت العربية بنفسك او ارفعها هتلاقي في قايمين ماسكين من اول العربيه لاخرها بص يهم كويس اوي اوي او ودقق لان عاده بيكون فيهم شروخ وده مش كويس ابداًً لو لاقيت كدا سيبك منها علي طول . وبالمرة بص علي عمود الكردان والفلانشه بتاعه لو في اى تخبيط فيهم او مغير شيء فيهم جديد ومجموعه الفتيس كده من اول كرسي النص وانت طالع اطمن عليها شوفها مثبته كويس ولا لا ناقصه حاجه وهزها بايدك كويس اوي وشوف اذا كان في تسييل زيت من الفتيس كدا بالمرة وانت تحت العربية وبص في حوض العربيه دايما دايما بتلاقي شروخ كده من تحت علبه الدركسون في الصاج كده اتاكد انها سليمه

ثانيا -العفشة :-
بص يا سيدي عفشه العربية دي حديد في حديد لانها مصنوعه للطرق الجبليه والوعرة لكن مافيش مانع انك تتاكد منها برضوا . روح لوش العربية من قدام واضغط عليها كويس وشوف مدي العربية مت بتروح وتيجي معاكي وهل في صوت او لا الناحية الي بتنزل معاك بسهوله عن التانيه دي تبقي عفشتها حالتها مش اوي يعني ودي بتيجي بالممارسه يعني مش اى حد يعمل كده لازم يكون ركب نيفا قبل كدا وعارف كويس .. طيب نكمل ارجع بظهرك شويه لورا وبص لوضع العربية هل هيا مايله من ناحيه او متنزنه .. لو مايله من ناحيه دي تبقي العفشه فيها حالتها مش تمام .. وما تصدقش لو قالك ياعم دي سوسته او ركب لها جلده رفع . اركب العربيه وخد بها لفه خفيفه كده ولف الدركسون للاخر وشوف لو في فرقعه كده او صوت ما شابه ده يبقي البيض الامامي .. تعمد تاخد بيها مطب وشوف صوت العربيه مع المطبات هلي في خربطه او العريه خدت المطب من غير صوت الخربطه دي بص خد بالك صوت عن صوت بيفرق يعني ممكن يا صاحبي يبقي صوت علبه الشكمان وعايز يربط او الاكصدام مثلا ً.. اطلع علي العربية من ورد .. هتقول اطلع ازاى . هقولك من علي الاكصدام الخلفي يا صاحبي ماهي بتشيل بلالالالالالالالالالاوي واتهزي كدا عليها وشوف مدي استجابتها معاك بتطلع او بتنزل معاك او خشنه .. ماشي يا ريس ..

ثالثا- الموتور
دايما بتلاقي النيفا صوتها عالي وده الطبيعي يعني لو انت جاي تركب نيفا لاول مرة ما تستغربش لان ده الطبيعي .. بس اسمع بودنك او كويس نغمة الموتور هل بتعلي هل بتوطي لوحدها في تقطع في نغمه الدوران لو هو ماشي بوتيرة واحده . طبعا لو هو ماشي بوتيرة واحده ومش بيوطي ولا بيعلي ده كويس وهو داير كدا افتح غطاء الزيت وشوف لو في بخره بيضا كدا ولا مافيش . لو في يبقي نوعا ما موتور خفيف وشوف لون الزيت واسال الراجل انت مغير زيت امتي وقارن انت بقي بين لون الزيت والمدة الي هو غيره فيها و مدي احتراقه .. شوف لو في اى صهد كده خارج من الموتور وانت مشغله .. وهيا داير دوس بنزين فجاه وسيبه شوف مدي استجابه الموتور
هل طلع معاك بصور فجائه وبيعد هبط ولا ماقدرش يقوم معاك بسرعه .. شوف لو في اى لون عادم من الشكمان (ابيض او رمادي او ازرق مع سواد كدا ) باستمرار
اذا كان ابيض في جميع الظروف . فده معناه ان الميه التبريد بتتسرب لغرفه احتراق الوقود و بتتخلط معاه
اذا كان رمادي مايل للسود ده معناه انه بتحرق بنزين كتير ودي تبقي عايزة ظبطه كاربرتير من الاخر علي طول
اذا كان ازرق سماوي دي يعني انها بتحرق زيت من البنزين ودي تبقي المكنه عايزة تتحل او شنابر البساتم ودي مقرفه برضوا .. بس خد بالك انا بقولك باستمرار مش وهي واقفه كده ماشي
بعد كده خلي حد يركب مكانك ويدوس بنزين وانت فاتح الكبوت وشوف المكنه بتتهز او بتتحرك .. ده يبقي عايز كراسي مكنه او تربيط الكراسي دي كويس عشان الاهتزاز ده .. لو في العربية يقل ماشي كدا .. اما طبعا لو الموتور بيجيب ميه من الشكمان ودي في حالات نادره في النيفا اعرف ان الموتور تمام ومن غير كلام وربنا يبارك .

رابعا- الكارونه :-
الكارونه وما ادراك بالكارونه . في كارونتنين في النيفا خلفيه واماميه . وبتكون الاماميه راكبه لو في فتيس غرز شغال فيها . نيجي علي الي ورا .. نبص عليها كده وشوف لو في زيت عليه ااو مرشحه مثلا او اى حاجه من دي . وشوف الزيت اللي عليها هل هو جديد ولا قديم لو قديم يبقي بواقي اغيير زيت مثلا وما غسلش الراجل . ولو جديد يبقي حاجه من الاتنين اما هو مغير زيت جديد ليها او انها بترشح باستمرار وفي طريقها للفناء .. طيب اركب العربيه كده وامشي وشوف لو في صوت زن او خربطه او احتكاك من الكارونه الي ورا وارجع لورا كدا وشوف في صوت منها برضوا ولا لا ... واقولك اخسر شويه عشان تطمن وقوله اغير زيت للكارونه عشان اطمن منها .. لو هو رفض يبقي قلقان من حاجه اما لو وافق هيكون فرحان منت هتغير له علي حسابك .. لان في بعض التجار بيعملوا حاجت في الكارونه دي منهم لله .. يحط نشاره خشب .. قشر موز مثلا او يحط زيت ولولينا تقل عشان يمنع صوت الكارونه
منه لله الغشاش . كنت مرة بشرتي نيفا وكانت بتاعه واحد في البيت واشترها من تاجر .. ولت نروح نشكف في البنزيزنه وكده قالي مشاي مافيش مشكله وبنغير زيت الكارونه لاقين فيها نشاره خشب علي قشر موز وزيت ولولينا والله الراجل صعق .. والله .. اشتراها من حد وعمل فيه كدا .. ربنا يكفينا شر الحرام .

كفايه كده لاني تعبت من الكتابه ولو في اى استفسار انا تحت امرك

[sherif0333]

الف شكر على الشرح الوفى

[monzer_500]

تحت امرك ولو احتجت اى شيئ تاني كلمني

[MOSHAKS]

الله يكرمك يااستاذ منذر انت افادتنى شخصيا بمعلوماتك القيمة . لك خالص الشكر والتقدير ومتحرمناش من كلامك الشيق ده ولا من مواضيعك عن النيفا لانى من عشاقها.