البنزين

[hassanin_lada]

بعيدا عن العربيات والكلام الفارغ ده..البنزين بيروح فين؟؟ياريت بس الكل يشارك عشان الواحد يعرف هل ازمة البنزين دي في كل حته ولا مناطق ومناطق ؟؟

[ahmed_gamal777]

فى اعتقادى مناطق مناطق وكمان حسب سرعة الطرمبة وقوة دفعها
بمعنى تانى انا ساكن فى السلام والشارع الى ورا البيت فى 3 بنزينات فيها 80
ولكن بمون من مدينة نصر او التجمع يعنى على بعد 30كيلو
عشان الطبور بيمش اسرع والطرمبات نظيفة
تصدق اخر مرة مونت من عند البيت قعدت 4 ساعات من 8.15 الى 12.20
وكان من حوالى 3 شهور

[MEKAWY2000]

فى اعتقادى مناطق مناطق وكمان حسب سرعة الطرمبة وقوة دفعها
بمعنى تانى انا ساكن فى السلام والشارع الى ورا البيت فى 3 بنزينات فيها 80
ولكن بمون من مدينة نصر او التجمع يعنى على بعد 30كيلو
عشان الطبور بيمش اسرع والطرمبات نظيفة
تصدق اخر مرة مونت من عند البيت قعدت 4 ساعات من 8.15 الى 12.20
وكان من حوالى 3 شهور

وكان عندك صبرتستحمل 4 سعات

[hassanin_lada]

لا انا قصدي انه مافيش بنزين اصلا 80 ولا 90 والشغل كله علي 92 والبنزينه ممكن تقعد يوم او يومين مافيهاش بنزين اصلا

[hassanin_lada]

واللهي انا امبارح واقف ساعتين وفي الاخر قالي الطرومبه عطلت

[MEKAWY2000]

انا مونت اليوم بنزىن 80 زحمه شويه بس ماشيه

[ibnelfared]

مشكلة البنزين هيا مشكلة أنبوبة البوتاجاز هيا مشكلة كل السلع الأساسية الموجودة فى حياتنا .
وسبب الأزمة دى 3 أضلاع مثلث هما ألى ورا الكلام دة وهذا أن لم يصدق فبالعقل ونتدبر وقد أكون قد أخطأت .
1 - النقطة الأولى وهيا الضمير الذى مات عند الكثير من الشعب المصرى وهذة عن تجارب الجميع وليس تجربتى الشخصية وأبسط مثال أننى لا أذهب بسيارتى للعمل نظرا لنزولنا مواقع بعيدة خارج حدود القاهرة فأركب الميكروباص الذى أجرتة 1.5 جنية لنجد أن كل يوم أو يومين بتزيد ربع جنية لحد ما وصلت 3 جنية والناس تتخانق وتضرب وتتضرب وهكذا ولما سألت السواق قالى أصل بنحط 8 جنية زيادة فى الصفيحة عشان السولار مع العلم أنا كسبان كسبان يعنى 8 جنية مش حاجة ولكن هو لا يريد أن ينقص منة شيئا وهذا الأمر مصيبة كبرى كبرى لأننا أصبحنا نحب أنفسنا ولا نحب الأخرين ويقاس على هذا المثال فى كل مكان فالبنزين الـ 80 عند الدخول ألى المحطة يحاسب على اللتر ب1جنية و 2 جنية ألى 3 أتاوة غصب ولما تتكلم ما هاتعرف تعمل حاجة ونلاقى أصحب القلوب الطيبة يقولك يعنى كأنك قولت من برة ما الصفيحة برة ب 30 و ب25 جنية المهم أننا نلاقى .
2- النقطة الثانية : الأغلبية أو الأكثرية الذين يحكمون البلد عن طريق كمجلسى الشعب والشورى فكلهم معهم سيارات لا تعرف معنى بنزين 80 والحكومة هيا ألى بتمونلهم العربيات والمصيبة الأكبر أنهم لا ينظرون ألى الشعب أنما تصفية حسابات والدلائل الكثيرة عديدة وموجودة فأن توجهت ألى عضو مجلس الشعب عن دائرة الجيزة لأتقدم له بمذكة نحو أحتياجات الشعب والطرق المتعددة للحلول سواء منى أو من الأفاضل الأخرين فقد أنتظرت 11 يوم لمقابلتة وعندما أراد الله مقابلتة تفضل بالقول متشكر يا سيدى سيبونا بقى نشتغل ولما ووضحتلة أن المجلس مش معانا قالى بكل فم مليان ومالة الدورة الجاية محدش ينتخبنا .
3-النقطة الثالثة الفوضويين : وهم وما يسعون ألى الظهور على التلفزيون والصحف والفضائيات وغيرها ويتحدثون يكل سفالة وقلة أدب فما منهم ألا أن يلقبوا بالثوار والنشطاء السياسين وأصبح هذا الشعب درهم فى أيديهم يقلبونة كيف ما يشائون .
فالمشكلة يا أخى مشتركة بيننا كشعب لا نخاف على بعضنا والكل يأكل بعضة وبين أفراد خصهم الله لمصالحنا ولكنهم لا يسعون ألا لمجد شخصى وثأر أيضا وبعض الأفراد الذين نصبوا أنفسهم على الشعب والشعب لا حول له ولا قوة وأفراد أخرون يعايروننا ويمنون على الله أنه قدم شهيدا أن كانوا شهداء ونحسبهم عند الله شهداء ويتحدث الكثيرون ليقولوا أن الفلول وراء ذلك .
وأنا لى قريب بوزارة البترول أقسم لى أن هناك أشخاص يديرون هذة الأزمة لكى يكونوا هم بأيديهم خزائن البلد والتحكم فيها ومثالا على ذلك حزب الحرية والعدالة تفضل مشكورا ببيع الأنبوبة بــ 9 جنية مع العلم هو يأخذها ب ــ 3 جنية فأذن هم قادرون على توفيرها وأيضا وهذا ملحوظ فى البنزينات الموجودة بالأرياف أغلبهم ينتمون للحرية والعدالة يوجد عندهم البنزين 80 بصفة مستمرة وهذا موجود بناهيا ووكرداسة وصفط وغيرة من القطاعات التى أعرفها والباقى يعلمة الله .
فعلينا أن نفيق ونصلح علاقتنا مع الله تعالى ومع انفسنا ونقف ضد أى من يريد أن يتحكم فينا .
أنا لا أتكلم بصفة شخصية عن أشخاص معينين ولكن والله والله أنا كنت رايح بوالدى المستشفى وهيا فى طريق مصر الأسماعلي ه الصحراوى والجلسة ب 450 جنية والتاكسى بياخد 200 جنية عشان يستنانى وقعدت ألف على بنزين 80 مالقتش قولت أفول 90 أو 92 وجت عربية راكبها راجل محترم عربية تانك كبير وملت العربية بنزين 80 ولما بقولة ما هو فى قالى أصل دة أخو صاحب البنزينة وما أقدرش أعمل حاجة من وراة وللأسف فول التانك بتاعه .


اللهم أحفظ بلدنا وأحميها من أعدائها بالداخل وأعدائها بالخارج وأحمها وأحرصها بفضلك يا أرحم الراحمين

[MEKAWY2000]

يارب نجنا من القوم الفاسدين

[mirra]

للة الامر من قبل و من بعد.

[medooo333]

ربنا يستر على البلد دى وفعلا كلامك صح جدا با سيدibnelfared هى ازمة ضمير وقلة ايمان والله ما فى مسؤل فى البلد دى بيحبها سواء فى الحكم او المجالس البرلمانية او اى ساعى الى سلطة او منصب فيها.........والحل من عند الله فقط وليس من عند اى مصرى او اجنبى.................

[MEKAWY2000]

محطه تاون ميدان الجيزه زحمه مووووووووووووووووووت ولا 5سعات

[tifa55555]

فى العجمى ما فيش 80 ولا 90 ولا حتى سولار والموجود 92

[MEKAWY2000]

طيب احمد ربنا انا انتظرت ساعه والاخر لا مونت 90 ولا 90 ولا 92 ومونت 10 بنزين 95 ب27جم

[MEKAWY2000]

مع ان الوزاره بتضخ بنزين و سولار زياده مش عارف من زياده الاستهلاك ولا التهريب ولا دى ازمه مفتعله ولا ايه الحكايه والله حرام من كل ناحيه انا حاسس اندى تاديب للشعب لان الزمات جايه ورا بعضها بقالها اكتر من 6 شهور بنزين وجاز وبتوجاز الطف من عندك يارب

[citywolf]

هأحكى اللى شوفته بعينى ولو كان حد حكى لى اللى حصل ما كنتش هأصدقه..... فى بنزينة عند مصنع الجوهرة بحوش عيسى و ده مركز فى البحيرة و أنا راجع من المستشفى دخلت البنزينة و أنا متأكد ان مافيش 80 لقيت البنزينة فاضية قلت أحط 90 أو 92 أى حاجة تمشينى والساعة كانت 10:35 بالليل يوم الجمعة المهم لقيت 80 بس اللى واقف عليها بيملأ 8 جراكن كبيرة قدامه وواحد تانى أخد الجركن اللى اتملى و دخل بيه جوه عند مكان غسيل السيارات و فوجئت بعربية نصف نقل راكنة جوه و عليها جراكن كبيرة مرصوصة المهم فولت 80 و مشيت و العربية دى أنا عارف أرقامها و حفظتها و كنت عاوز أبلغ عنها لكن أبلغ مين ؟ و لما أبلغ هييجوا بعد قد أيه ؟ تكون العربية مشيت و البنزين بيروح فين بيتباع سوق سوداء و لا بيترمى فى الصحراء زى ما كان د/ جمال حشمت بيقول من يومين على قناة مصر 25 . حسبنا الله و نعم الوكيل فى كل اللى بيتاجر فى أزمات الناس