عايزة اعرف سعر عربيتي تجيب كام

[mona_881]

السلام عليكم ورحمة الله وبركاته

كنت عايزة بعد اذنكم اعرف السعر المناسب لعربيتي (بما يرضي الله) لأني بفكر أبيعها

هي 2107 مو 2008 مصري 1600 سي سي عاملة العداد 16700 تقريبا استعمال بسيط جدا مشاوير عائلية وسفر وهي بحالتها جديدة تماما متغيرش فيها أي حاجة والله العظيم ماعدا بس ماستر الدبرياج وخزنة زيت الباكم ومروحة وطرمبة المياة ووش الفانوس اليمين (الوش بس مش الفانوس كله) والحاجات اللي غيرتها دي غيرتها بروسي أصلي من عند حمدي لادا اه ومرايات الجنب بس والله
باقي الحاجات بتاعة المصنع الفبريكا مساعدين وعفشة وكله متغيرش فيه مسمار والحمدلله

بس الصاج في بعض الخرابيش من الرفرف والكبوت والباب ودا بسبب الوقوف في الشارع والصالون مفيهوش خدش الجلد الاصلي عليه فرش قطيفة (تابلوه وكونسول وابواب وارضية موكيت) أخر نضافة والله بنضفها زي مابنضف البيت بالظبط وكل اللمبات والعدادات شغالة تمام بسم الله ماشاءالله

أنا لسه بفكر لوجابت السعر اللي في دماغي ممكن ابيع وشكرا واسفة علي الاطالة

[hassanin_lada]

يعني هي غالبا مش هتجيب اكتر من 36 الف

[mirra]

اولا ....موفق فى البيع ان شاء اللة....ثانيا العربية تعمل حوالى 35 الف و متنزلشى عن كدة.

[hassanin_lada]

وعلي فكره احنا عندنا في اسيوط موديل 2008 وانت طالع يعمل اكتر من 36 لانه بيترخص تاكس..

[mona_881]

الأخ الفاضل bkaltalamana
حضرتك في المداخلة الاولانية بتقول مش هاتجيب اكتر من 36 وفي المداخلة التانية بتقول تعمل اكتر من 36 علشان بتترخص تاكسي
طيب يعني هي كده قليل عليها اوي انا كنت عايزة فيها 39 او 38 يعني لانها جديدة والله اللي هايخدها هايبقي كأنه راكب زيرو بالظبط (17000) كيلو ومابتمشيش كتير يادوب علي قد طلبات البيت بس واساسيات فابريكا وحالة نضيفة بسم الله ماشاء الله

[hassanin_lada]

ياباشا البيع والشرا دي نصيب اولا واخيرا دي كمان ممكن تجيب اعلي معاك ..انا في اول مداخله قولت كده لانها مش هتجيب غير كده..لكن بعدين افتكرت ان السنه دي الموديلات المطلوبه للتكسيات عندنا في اسيوط هي من 2008 وانت طالع..فالحاجات دي بتقع غاليه لانها هتترخص تاكس مش ملاكي عشان كده غيرت رأي..والسعر الاولاني كان بناء علي اسعار موقع عربيتي انا كنت شفت عربيات مستعمله وفي السعر الاولاني اللي كنت بقولك عليه وزي ماقولتلك في الاول البيع بيبقي توفيق من عندنا ربنا وربنا يكرمك ياباشا ويجيلك فيها 60000 وتعزمني حلاوت بيع العربيه :d

[wera]

ايه الاسعار دى ؟؟؟؟؟؟؟؟؟؟؟؟؟؟؟؟؟
العربية دى لو جابت 30 يبقى حلو اووووووووووى وانا شوفت كتير مكيف نفس الموديل بيتكلموا فى 27 و 28 فابريكة برة وجوة يعنى متهيئلى الى مش مكيف يجيب 25 والله الموفق

[MEKAWY2000]

ياجماعه قيسو السعر على الجديد الجديد اخر سعر كانت 44000 فاضيه مصرى تنزل 10000 دالسياره عامله17
الف واقل من كده حرام

[Inteltech]

اختى في الله اتمنى لك التوفيق في البيع وربنا يرزقك باحسن منها ان شاء الله
دمتم بود

[wera]

ياجماعه قيسو السعر على الجديد الجديد اخر سعر كانت 44000 فاضيه مصرى تنزل 10000 دالسياره عامله17
الف واقل من كده حرام

انا معاك بس مش انا الى بتحكم فى سعر السوق وفى حاجة اسمها عرض وطلب هى الى بتحدد وبالسبة للعربية دى هى سعرها قليل لان لو سعرها اعلى من كده يعنى لو وصلت لـ 35 يبقى فى حاجات كتير افضل منها ونفس الموديل كمان او اقل منها بسنة او سنتين

[a7madramadan]

الأسعار المذكورة مجرد فكرة عامة عن اسعار السوق مش أكتر ... ولكن في عملية البيع نفسها كلام تاني خالص .. لو العربية حالتها ممتازة جدا و في مشتري عجبته العربية ممكن يطلع برة الرينج المذكور ولو العربية حالتها سيئة طبيعي هتنزل أكثر بكتييير عن الرينج الطبيعي حضرتك انزلي او خلي حد تابعك ينزل سوق المستعمل مش من مواقع البيع والشراء ويشوف ثمن العربية بما يرضي الله كام بعيدا عن التجار .. و ان شاء الله ربنا يكرمك ببيعة تناسب عربيتك وترضيكي..

[abdo1234456]

25000 ألف ايه يا عم المستفز انت على الط..... بقت حاجه تقرف بيقولك عربيه فابريكا بره وجوه و2008 وبعدين العربيات اللى ب 24000 وفيها باور وتكييف دى حالتها ايه ان شاء الله حتى لو كانت 2011 هتلاقى حالتها زى الزفت انت بس شاطر تخش على كام موقع بيع تجيب كام سعر وبعدين تكلم .... ده موش أسلوب .

ثانيا لصاحب السياره

عربيتك ممكن تكون كويسه آه لكن متعلقش آمال كبيره يعنى 38 و37 ده بعيد جدا لكن ممكن تجيب 30 أقصى حاجه 33 (بعيدا عن اخوانا التجار ) ونصيحه العربيه دى نعمه من ربنا متبيعهاش أحسن .

[abokoko]

ايه الاسعار دى ؟؟؟؟؟؟؟؟؟؟؟؟؟؟؟؟؟
العربية دى لو جابت 30 يبقى حلو اووووووووووى وانا شوفت كتير مكيف نفس الموديل بيتكلموا فى 27 و 28 فابريكة برة وجوة يعنى متهيئلى الى مش مكيف يجيب 25 والله الموفق

{وَيَا قَوْمِ أَوْفُواْ الْمِكْيَالَ وَالْمِيزَانَ بِالْقِسْطِ وَلاَ تَبْخَسُواْ النَّاسَ أَشْيَاءهُمْ وَلاَ تَعْثَوْاْ فِي الأَرْضِ مُفْسِدِينَ }هود85


غلط تحبط الناس
العربيه مش عاملة 17 الف كيلو
وهى موديل 2008


انا عربيتى 2007 وعاملة فوق ال 110 الف
على كده لما احب ابيع عربيتى ادى اللى هيشتريها فلوس عليها

[lad]

لادا 2107 موديل 2007 ماشية 70 الف فبريكة بره وجوه جنوط اسبور 14 انذار وسنتر زجاج كهربائى امامى كان مفيهاش الهوا بعتها ب 30 من 6 شهور بتاعتك 33 34 فى رأى

[wera]

{وَيَا قَوْمِ أَوْفُواْ الْمِكْيَالَ وَالْمِيزَانَ بِالْقِسْطِ وَلاَ تَبْخَسُواْ النَّاسَ أَشْيَاءهُمْ وَلاَ تَعْثَوْاْ فِي الأَرْضِ مُفْسِدِينَ }هود85


غلط تحبط الناس
العربيه مش عاملة 17 الف كيلو
وهى موديل 2008


انا عربيتى 2007 وعاملة فوق ال 110 الف
على كده لما احب ابيع عربيتى ادى اللى هيشتريها فلوس عليها

يا باشا انا مش ببخس هى ولا عرضت عليا ولا انا قولتلها عايز اشترى يعنى ولا فى منفعة ولا ضرر ليا فى بيعها بـ 100 الف
و ياريت نعرف معنى الاية ونعرف تفسرها كويس قبل ما نتهم الناس بالباطل
حتى لو انا عايز اشتريها وعرضت عليها السعر ده برضة مبقاش بخست للناس اشياءها لان دى مسألة عرض وطلب بخس الاشياء ده لما تكون مجبرة لسبب ما انها تبعلى انا بس يعنى مثلا ليا عندك مثلا فلوس ومديلك مهله محدد انك ترجعهالى ومعايا ورقة بالفلوس زى وصل امانة مثلا ومعرفتش تبيع عربيتك قبل نهاية المهله فاتتضر انك تبعلى العربية اقوم شاريها باى سعر على مزاجى لانك مافيش قدامك حل تانى فى الحالة دى ابقى بخستلك اشيائك
هى بتسأل وانا قولتلها الى شوفته فى السوق وتقدر تنزل السوق وتشوف بنفسك