أوووووووووووووف

[hassanin_lada]

الواحد اتخنق من ام العربيه دي

معلش ياجماعه استحملوني شويه بس مش بلاقي حد اتكلم معاه غيركو

لسا راجع من بره وانا مروح قولت افك بالعربيه شويه لاني علطول ماشي هادي عشان استهلاك البنزين المهم طلعت علي طريق سريع وفتحت بالعربيه لحد 130 وطبعا قارص فالعربيه المهم بمور عشان مطب لقيت الار بي ام بقي علي الصفر والعربيه بترعش ومش مظبوطه !!

هل ده كده لازم اكشف علي طقم الكهربا تاني واظبطها ولا ايه ؟؟ مش معقول لكل مره اقرص بيها تعمل معايا كده

وحاجه تاني كنت جبت ليدات للصالون عشان طبعا نور الصلون في الضياع المهم ركبتهم بالعافيه عشان الفنوس طبعا صغير واشتغلو تمام بس ببص لقيتها فصلو هل ده من فيوز ولا ايه ؟ ؟

ارجو المساعده ومحدش يبخل عليا ودمتم سالمين

[hassanin_lada]

ايه ياجدعان 39 مشاهده ومافيش ولا رد ؟؟

انا بس عاوز اعرف هل طبيعي اني لما اقرص علي العربيه تتبرجل كده ولازم اروح اظبطها كهربا من الاول ولا كده في مشكله ؟؟

[MEKAWY2000]

بص يابن عمى على شان انا شرقاوى انت اهنت السياره بصراحه 130 كتير على الادا ليه السياره المظبوط100 دى حاجه التانيه معنى انك تدى السياره فوق طاقتها بيحصل الاتى 1 استهلاكك للبنزين بيزيد 2 التكهات بتفتح فوق طبيعتها وده سبب نزول الار بى ام 4 متنساش انك فى السرعه الزياده الابلاتين بيفتح هو كمان وبتزيد سرعته يعمل شربون ويبطل السياره
لو حابب السرعه العاليه يبقى فى المعقول دى لادا 8 صباب وليس 16 وكده السياره بتقلك خف على وركب طقم كهرباء نوعيه عاليه زى البوش الاصلى او الهيونداى او الان جى كى وابلاتين ايطالى او فرنساور ريشه عريضه وكوندنسر فرنساوى واضبط كاربرتير وتكهيات ونجرب بقى بس سيطر على تمام ياباشا مليح الكلام

[ahmed_gamal777]

مليح الكلام يا ابو عمو

[hassanin_lada]

طيب اشمعنا لما كان معايا 128 موديل 79 كنت بجيب 140 /150 عادي ومابتحصلش اي برجله في العربيه ؟؟

يعني كده لازم اغير ابلتين وكوندونسر !!

طيب لو ركبت اسبرايتر الكتروني ايه الكلام ؟؟

وبعدين ماهو في ناس كتير بتقول انها ماشت بالعربيه 150 و 170 والمكانيكي قبل كده بتاعي مشي بيها 170 وعادي !!

اشمعنا انا :@ :@

[besokate]

انا عن نفسي سوقت مرة بيها علي ١٤٠ وحرمت بعد كدة لان من سعتها الكاربراتير باظ ومرجعش تاني زي الاول لكن لغايه ١٢٠ ١٣٠ بتمشي عادي

[ahmed_gamal777]

مفيش مرة فيك يا سوسن وصلت بيكى ال 130 او حتى 110 والا سوسن تبرجل وتفتف والبنزين يعىلى والبوابة التانية تفتح ومترضاش تقفل وبعد السبق - اقف على جنب زى الشاطر واقعد اظبط الكربيراتير
لو انت كنت خد ت بالك وانت فى ال128 كان اى عقاطى (كلم من بلدنا هوا الوحيد الى هيفهمها كويس)
كان بيظبتهلك
ام فى الامورة الادا - لازم الميكانيكى يكون بيحب الادا عشان يظبط الى الكهرباء بناء على ظبط الكربيراتير وفوق دا كلة متاكلش معاك بنزين - او تخنق معاك فى السلانسية
بص الادا عملة زى مخلة الجيش - شكل وقماش تحس انة فستك ولكن قوة تحمل جيدة
هى عربية شقى اكتر منها عربية جرى باحتراف ( قطر بيجرى بص دكر فرملة )
عموما راجع كلام واد عمنا الشرقاوى - واجرى براحتك ( والله يرحمك و يرحمنا ) هههههههههه

[hassanin_lada]

انا فعلا رحت لبتاع الكاربرتير قالي البوابه التانيه علقت وانا رجعتهالك والابلتين فتح عاوز يتقفل عليه وطبعا بعيا عن العقاطي المكانيكي اللي شغال معاه واللي بوظه في العربيه بس الحمدلله العربيه لسا ماتظبتتش واديني مسافر بيها دلوقت وربنا يسترها

[MEKAWY2000]

اتحداكى يامصر كلها ان الادا 2107 الى المبير بتاعها 180كم فى الساعه والسرعه القصوى 140كم انها تزيد عن 140الى فى حاله الزيرو غير كده لا170ولا160

[ahmdmagdy]

انا اقصي سرعه جبتها في اللادا كانت 160 كم بس كنت مشربها بنزين 92 و مطولتش في السرعه دي اكتر من 3 دقائيق حسيت ان العربيه هتطير

[karimmagdy50]

يامعلم العربية دى متستحملش 140 دى اخرها 100
اكيد الباب التانى فتح ومرجعش تانى انت كده عايز ضبط كاربراتير بس عند واح بيفهم لها
ومتعملهاش تانى

[karimmagdy50]

وبعدين اغلب اطقم الكهرباء دلوقتى مضروبة انصحك مدورش على طقم محترم عشان هيضحك عليك
دى مش بتاعت جرى دى حمالة اسية بس مش ركوبة للجرى

[hassanin_lada]

الف شكر للمشاركه ياشباب

سافرت بالعربيه امبارح مسافة 200 كيلو تقريبا وزيهم وانا راجع ودي تعتبر اول مره للعربيه تعمل مشاور زي ده طبعا اختها واحنا رايحين صحراوي طبعا مازوتش عن 100 / 110 عشان خفت تعملها معايا في الصحره طبعا العربيه مش مظبوطه زوايا والعجل ضارب سلك ومش مترصصه والحاله في الضياع توكلنا علي الله وطلعنا علي الطريق الثبات معقول حتي لما بتعدي ترله من جنبك سواء كانت قادمه بالمعاكس او بالجوار بس في رعشه ودي طبعا من العجل بس صوت المتور دوشه و بيعمل صداع الكراسي غير مريحه بالمره الحته اللي عند عضلة القطنيه بتولع من القعده في الكراسي اللي قدام اما الكنبه فهي قعدة ملوك بتزل المخده اللي في النص وتبقعد ملك

استهلاك البنزين عملت معانا حوالي 220 فالصفيحه وده لان واحنا راجعين اخدناها زراعي وطبعا كنا بنقرص جامد لان الدنيا كانت ليل والنور مش كويس خالص وكنا ماشين بنحسس وراي اي عربيه نقل او مكروباص وطبعا طول بيقرصو جامد بس الحمدلله العربيه كان سحبها ممتاز جدا خصوصا ان الجو بالليل كان مبرد شويه

بس هي لو كوتشات نضيفه وجنط 14 العربيه كانت فرقت في الطوالي جدا من حيث الراحه

دي تجربتي امبارح والحمدلله رجعنا سالمين :d

[hassanin_lada]

صح نسيت اقولكم ان مؤشر الحراره كان علي الابيض او بين الابيض والاخضر في النص بين اللونين هل ده طبيعي ؟؟

[mazagngi2010]

مفيش اسبراتير الكترونى للادا ؟