الحقوني العربيه باظت

[besokate]

وانا راجع امبارح في الليله الجميله ليله ٣٠ يونيه لقيت صوت تك عند الفتيس وهوب ابتدي الصوت يزيد لغايه ما لقيت العربيه وقفت خالص متحركتش تاني ومكلبشه في الارض مع اني ممورها حاولت ازقها قدام ورا مفيش
ببص من تحت لقيت عامود الكردان فالت من مكانه طيب وبعدين دي الساعه ٢ بليل هعمل ايه وللاسف كان شارع مفهوش ولا عربيه راكنه كان من الشوارع اللي العربيات بتجري فيها بس
وقف تاكسي بيقولي مالك ونزل بص علي العربيه من تحت قالي دي الجلدة اتاكلت بتاعه عامود الكردان وقعد يسايس العربيه وزقناها شويه الا وقلاقي زيت عمال ينزل منها بص عليها قالي ده زيت باكين اكيد الماسورة بتاعته اتخرمت زقناها شويه كمان ولقيت بنزين عمال ينزل من عند نفس المنطقه بنزين كتير
المهم ربنا هداني اروح افصل البنزين من عند التنك ورا واتنكدت اخر نكد وتعبت جدا ورحت ركنها عند اقرب محطه مترو وسبتها واخدت وش الكاسيت وروحت

[hamaka]

معلش ، ان شاء الله خير و تكون حاجة بسيطة و تتعمل بأقل تكلفة....ربنا معاك و يعينك...

[monamize4]

بسيطة ان شاء الله ,, متضايقش نفسك

[mahgoup]

ان شاء الله تكون بسيطة وتتحل

[besokate]

انهاردة انا رحت قطرتها لغايه البيت لكن بصيت عليها من تحت فى النور بقه انهاردة لقيت الشكمان مكسور وماسورة البنزين لفه حوالين عامود الكردان ومشددة ومقطوعه طبعا واتصلت بالميكانيكيه كلهم قافلين انهاردة قلت بكرة الصبح بقه اشوف حد وودهاله

[ashraf_sms]

معلش ان شاء الله هتتحل وتكون حاجة بسيطة

[mohammed dodda]

لاحول ولا قوة الا بالله....وقت صعب بس متقلقش ده ابتلاء ولازم تصبر وان شاء الله خير.... بس ياريت تقولنا ايه السبب فى اللى حصل والحل ايه وربنا يزيح عنك الغمة

[youssef_elgbaly]

ديه اسمها فلانشة الكردان المفروض لما تحس بصوت من الاول تحاول تنزل وتبص عليها لو لقيتها مقطوعة او فيها شرخ لازم تغيرها فورا لنها بتكلبش العربية ومستحيل تتحرك حصلت معايا قبل كده وكان يوم عيد وجبت ميكانيكى والعربية لاقيتها دبدبت منى اكنى بترميلها زق وكلبشت ديه اعراض الفلانشة الكاوتش اتاكل وبقت حديد فى حديد بيقفش ومايحركش العربية هاتجيب واحده تمنها 35 جنيه وتخلى الميكانيكى يركبها

[youssef_elgbaly]

وبالمرة بص على صلايب الكردان لو تعبانة غيرها بالمرة

[lad]

دى الفلانشة

[محمد نبيل]

انهاردة انا رحت قطرتها لغايه البيت لكن بصيت عليها من تحت فى النور بقه انهاردة لقيت الشكمان مكسور وماسورة البنزين لفه حوالين عامود الكردان ومشددة ومقطوعه طبعا واتصلت بالميكانيكيه كلهم قافلين انهاردة قلت بكرة الصبح بقه اشوف حد وودهاله

قول الحمد لله لو كنت ماشى بسرعة كان العامود خبط فى الأرض و رفع العربية من ورا قلبها , عشان كدة بتلاقيهم لاحمين سلسلة من جناب العربية معدية تحت الكردان فى النقل القديمة بتبان أكتر عشان الموضوع دا عشان لما الكردان يتكسر ينزل على السلسلة فا ما يعشقش فى الأسفلت و يقلب العربية , فا الحمد لله , هى أى نعم شكلها مرعب جدا كدة بس هتصفصف إن شاء الله على شوية قطع غيار و خراطيم و أولسيل و زيوت و ترجع تمام المهم سلامتك , الحمد لله

[besokate]

اخيرا اتصلحت بعد ما دفعت دم قلبي ٨٠٠ جنيه
فلانشه وصليبه وماسورة بنزين ٣ متر وماسورة زيت باكين وكرسي النص بالبليه بتاعته والقاعدة كمان
وكمان لقيت الشكمان مكسور خالص غيرته وزيت وكمان لقيت الفرامل سايبه خالص اتفكوا الاربع عجلات واتظبط الزيت
وانا عدمت من اللف علي بتوع قطع الغيار وطبعا مشي علي رجلي بدون عربيه

[waleed alsudy]

ربنا يصبرك وان شاء الله خير ومش مكلفه
بس تصدق اكتر حاجه عجبتين انك خذت وش الكاست ههههههههه
خير هون عليك ياجدع

[mohammed dodda]

اخيرا اتصلحت بعد ما دفعت دم قلبي ٨٠٠ جنيه
فلانشه وصليبه وماسورة بنزين ٣ متر وماسورة زيت باكين وكرسي النص بالبليه بتاعته والقاعدة كمان
وكمان لقيت الشكمان مكسور خالص غيرته وزيت وكمان لقيت الفرامل سايبه خالص اتفكوا الاربع عجلات واتظبط الزيت
وانا عدمت من اللف علي بتوع قطع الغيار وطبعا مشي علي رجلي بدون عربيه

....معلش تتعوض ان شاء الله وخد بالك اننا برضه فى نعمة كبيرة...ال800 جندى دول ميجوش تمن فانوس فى عربيات تانية كتير فقول الحمد لله على كل حال