مش حشرية.... بس عشرية

[yoyo2015]

فى البداية الحمد لله على كل شئ .....للاسف عملت حاثين فى اقل من ساعة الا ربع
الاول كان عند طالعة فيصل من ناحية الدائرى وعربية مقطورة كانت واقفة وللاسف طلعت مرة واحدة والحمد لله جت فى الاكدام اتخلع جزء منة واتكسر من النص......
التانى بعد طبعا متخانقت مع السواق وكان فى فاصل من الشتيمة طلع راجل كبير ومردتش اكلمة .....وبعدين مشيت وانا نازل عن نزلة شبرا الخيمة قابلنى متوسيكل والحمد لله خبطة بس من الجنب ولو كان جة من الوش كان الواد رااااااااح بي الحمد لله ....
طبعا بقى مستشفى ....وخياطة...ومحاضر...وسحب رخص ...الحمد لله جت سليمة فى الاخر
طولت عليكوا الخلاصة بقاااااا
1- ياريت محدش يمشى عكس خااااااااااااااااالص حتى لو الدائرى متنيل وواقف وقفة خرة سورى للالفاظ
2- احترس من الموتيسكلالالالالالالالالالالالالالالات من اى حتة هتلاقيهم طالعنلك
3- لا تقف بجوار مقطورات علشان السواقين بيشوفووووووووووش تحتيهم
4- اعمل اية بقااا فى موضوع الاكصداااااااام دة بيتصلح ولا بيتلحم ولا اية ....
5- لادا 2105 وانا ساكن فى شبرا مصر وشكرا للاهتمام وربنا يسترها معانا ومعاكوا

[M I D O]

معلش يا باشا المهم انك بخير وقدر الله وما شاء فعل ومشكور علي التحذير ونصيحة الحق احذف الكلمة الخارجة دي قبل ما التعديل يخلص وتاخد مخالفة من المراقبين

[yoyo2015]

اسف جداااااااااااااااااا......بس بصراحة مش عارف التعديل منين

[mohamed-محمد]

حمد الله ع السلامة ...... الموتوسيكلات دي حاجة تقرف -_-

[Zing0]

بمناسبة الموتوسيكلات
أنا لسه عامل أغرب حادثه ممكن تحصل لأى كائن حى قاعد على دركسيون
الموقف:
شارع واسع و فااااااااضى جداً لأنه مرمى فى منطقه جبليه عالأوتوستراد
لسه راكب العربيه و بأسم الله و طلعت عالأول و بألف بوسع الشارع (على مره واحده لأن الشارع واسع جداً)
و فجأه طلعلى واحد صعيدى (مع إحترامى لأهلنا فى الصعيد بس ده كان غبى شويه) راكب موتوسيكل و حاطط طرف الجلبيه فى بقه و بيسابق الريح
معرفش كانت سرعته فوق الـ100 بكام بس الراجل فاااااااااااتح على أساس إن الشارع فاضى
و فجأه ..... أتخض و لاقيته جاى مرتبك مش عارف يأحد قرار يعدى من أدامى و لا ورايا و أنا بقيت فى نص الشارع بالعرض .......... و هووووووووب طااااااااااااااااخ
دووووووووووووووووووم طشششششششششششششش
الحمد لله ربنا ستر و محصلش حاجه
ربنا ألهمنا أشاورله علشان يعدى من ورايا و أنا وقفت خالص
كان معايا 2 زمايلى قعدوا يضحكوا و يقولواأول مره نشوف حادثه عالغيار الأول!!!
الحمد لله على كل حال
---------------------------------------
قبلها بيومين
ماشى عالكورنيش فى القاهرة
و طبيعه الكورنيش للى مشى عليه إن حاراته بتوسع فى مناطق و ترجع تضيق فى مناطق تانيه
يعنى ممكن تبقى ماشى عليه 3 حارات , و فجأه تلاقيها حارتين و يرجعوا يبقوا 4 ....عادى
المهم ماشى يمين على 80
و أمامى على مسافه 10 متر تاكسى أبيض و شمالى كان فاضى
فجأه ظهر عالشمال أتوبيس نقل عام طااااير, إلتزمت فى حارتى ورا التاكسى
و فى لمح البصر التاكسى يفرمل بغباوة......... أصل فى زبون شاورله و طبعاً واقف فى الطريق , مالوش مكان يركن أصلاً
الحمد لله ربنا سترها من فضله, رغم إنى حسيت ساعتها إنى لابس فيه لامحاله
فرملت لحد ما الأتوبيس عدى و أخدت غرزه شمال وراه
من فضل الله إن كان وراه فاضى, و إلا كان هيبقى غلطتى 100%
-------------------------
ربنا يستر طريقنا و طريقكم و يسلمنا