رأى أهل الخبرة فى تعديلات لادا نيفا 84

[Eng.Hasabo]

السلام عليكم و رحمه الله و بركاته

أنا عندى عربيه لادا نيفا مو 84 وهيا أول تعامل ليا مع العربيات عموما وكنت عايز أخد راى أهل الخبره أو حد عنده نفس العربيه عن بعض التعديلات اللى عايز اعملها عليا.

أولا

عايز حل لمشكلة تقل الدركسيون (تغير علبة دركسيون) عايز اعرف علب الدركسيون اللى تنفع ليها ومنين أجيبها وسعرها فى حدود كام؟

ثانيا

عندى صوت صفاره فى الكارونه على السرعات العاليه. عايز أعرف ايه الاحسن ليها الكرونه السريعه ولا البطيئه وايه افضل نوع كرونه يركبلها ومنين وبكام؟

ثالثا

عندى بارومه خفيفه بس فى السوك فوق الكشافات وحز الشنطه من فوق . كنت عايز افضل حل ليها هل القص والتغير ولا فيه حل أخف من كده؟ ولو حد يعرف صنايعى أشتغل فى نيفا قبل كده يكون كويس ياريت يدلنى على مكانه ورقم تليفونه ؟

أنا عارف انى طولت فى الاسئله عليكم لكن ده من العشم فيكو طبعا وأن شاء الله ناس كتيره تستفاد معايا من ردودكم .

وشكرااا

[fordpuma2000]

54 مشاهدة و مفيش ولا واحد يفيد الراجل الراجل انا اخويا بردو جاب واحده و بيسال نفس الاسئله ياريت لو فيه حد يقدر يساعدنا ولا مفيش خبراء نيفا هنا ولا ايه

[Hosam_fouad]

والله يا باشا ربنا معاااااك ... انا عايز اشتري نيفا .. ونادرا لما حد يرد هنا في النفيا :d

[emad_ms]

بالنسبة لتقل الدركسيون فى ناس ركبت اسكترا بس للادا وبتشكر فيها جدا وتمنها 1000جنية بالتركيب فى المنصورة اما بالنسبة للكارونة انا غيرت دفرانسية كامل بالكارونة للادا 2105 من سنة ونص فى الحرفيين ب750 جنية واكيد النيفا فى نفس الحدود واللى اعرفة ان قطع غيار اللادا بتركب على النيفا اما بالنسبة للبارومة انت موضحتش درجتها اية فهى لو عاملة تاكل جامد فى الصاج يبقى مفيش حل الا القص والتغيير اما لوخفيفة فيتم تنظيفها جيدا (بالصاروخ الفرشة السلك ) واذا كانت بوية البلد حط عليها شحم ومنتدهنش علشان ما تقللش تمن العربية وبالتوفيق انشاء اللة

[hobyana47]

فى قطعة بتتغير فى الجزء اللى بعد علبة الدركسيون تقريبا فى حدد 100 جنيه انا ركبتها عندى فى النيفا خلت الدركسين تقريبا نص باور هجيبلك رقم المحل اللى اشتريتها منه هو فى السبتيه بالنسبة لعلبة الدركسين كمان عندهم جديدة تصليح القديمة بيكن فى معروف فى نفسالشارع اللى فيه كشرى ابو طارق انا معايا نيفا ومن عشاقها ان شاء الله هتابع معاك كمان سمعت ان ممكن يركب كارونه وفتيس يابانى للنيفا اكيد هيبقو افضل بكثير لان الات الجر اليابنى معمره جدا تعتبر معدومة الصوت كما ان الكارونه والفتيس اليبانى اسرع من الروسى

[emad_ms]

القطعة اللى بعد الدركسيون دى اسمها المناول ودة كان الاول جلبة فبر فكان بيتقل الدركسيون فى منة دلوقت مناول على رولمان بلى وهو فعلا بيخفف الدركسيون شوية بس مش قوى زى ماتركب اسكاترا وتمن المناول دة ب75جنية عند سيد نصار فى التوفيقية

[fordpuma2000]

شكرا عالرد يارجاله دا العشم برضو
بس ياريات لو حد ليه خبرة فعليه و كان معاه نيفا فعلا يقولى انا و البشامهندس على اماكن و اسعار علب الدركسيون و افضلهم ايه علشان تخليه خفيف و لو فيه كارونه يابانى ياااااااااااااااااااااااااريت هتبقى افضل طبعا بس هتبقى بتاعت ايه و سريعة ولا بطيئة و هتتجاب منين بردو و فى حدود كام ومعلش علشان طولت بس فعلا انا جربت الموضوع دا و الواحد بيبقى محتاااااااااااااااااااااااااااااااااس وشكرااااااااااااااااااا

[Eng.Hasabo]

شكرا عالرد يارجالة وانا مع الاسئله الى الاستاذ فورد قالها بس كنت عايز ازود موضوع التابلوه ايه التابلوهات الى تركب عليها سواء بتاعت لادا او غير لادا سمعت ان فيه حجات زى ال 128 و الليجانزا وسيتروين ax ارجو الافادة بس انا بظبط فى العربية دلوقتى علشان كدا ببقى محتاج ردودكو و خبراتكو بسرعة علشان استفاد منها قبل ماعمل اى حاجه فى العربية و ارجع اندم و شكرااااااااااااااااااااااااااااااااااااااااااااااا ااا

[fordpuma2000]

مفيش حد هيفدنى انا و الراجل صاحب الموضوع ولا ايه :(