صفارة فى العجل زى سن السكاكين!!!

[Mustafino]

السلام عليكم
من فترة و أنا بسمع يا جماعة صوت صفارة من العجل زى ما تكون حد "بيسن سكاكين"، الصوت دا بيكون فى أغلب الأوقات على السرعات الهادية، أو فى بداية تحركى بالعربية الصبح، أو من مع تحركى من إشارة... الخ، لكن لو بجرى بالعربية أو على سرعة عالية مش بسمع الصوت دا!!!!

حد من حضررات الزملاء مقتنى العربية اللادا يقدر يفيدنى لاننى مقلق من الصوت دا و خايف يكون له علاقة بالفرامل لا قدر الله؟

ملحوظة: فى سواق سألته قالى مجرد غسيل العربية من تحت هيضيع الصوت، و واحد تانى قالى ضبط زوايا... فهل الكلام دا صحيح؟!

[BLADE2006]

تيل الفرامل بيودع يا اما عايز يتنضف من التراب

[mando2002m]

تيل فرامل عاوز يتغير الحق غيرة قبل ما تخسر الطنابير

[aldesha989]

عندى نفس الصوت من العجله الشمال قدام بس بسمعه مع المطبات او مع الحفر

[Mustafino]

خلاص تمام، هغير التيل فى أقرب فرصة...

بجد شاكر جدا لكل اللى ردوا عليا و لكل المشاهدات كمان، جزاكم الله كل خير :-)

[محمود سيد محمو]

قبل ما تغير التيل خلى ميكانيكى كويس يبص عليه ويمكن يكون محتاج يتنظف ويتغسل بشوية ينزين وخلاص

[Zing0]

قبل ما تغير التيل خلى ميكانيكى كويس يبص عليه ويمكن يكون محتاج يتنظف ويتغسل بشوية ينزين وخلاص

كلام مضبوط
لو التيل لسه مليان متغيروش
هتغسل الطنابير بالبنزين و تخشن التيل على الأسفلت (أو بسنفرة خشنه 60 مثلاً) و تغسله بالبنزين و تسقطه مكانه
طبعاً لو متآكل, يبقى طفم جديد بحوالى 35 ج و ربنا يستر و ميكونش مضروب و كله رايش نحاس

[Mustafino]

سلام عليكم يا جماعة...
رحت أمبارح شارع دمشق جمبينا فى مصر الجديدة، جبت طقم تيل أمامى أصلى بـ 65 جنية من محل اسمه "أولاد حسين"، و غيريت القديم بمصنعية 30 جنية و قلت الحمدلله و أستبشرت خير و مشيت عادى و فعلاً الصوت أختفى... النهاردة لسه راجع بالعربية بعد كام مشوار، تصدقوا........... الصوت رجع تانى بس المرة دية من العجل الخلفى و زى ما قلت قبل كدا لما بكون طالع على الأول أو التانى أو مهدى فى ملف... الخ، يعنى لما بكون على سرعة بطيئة بيبقى الصوت عامل زى سن السكاكين تمام!!!!
أنا أمبارح سألت الصنايعى و البياع أغير قدام و ورا و لا أيه؟ هما الأتنين قالوا أمامى بس، اللى ورا بيبقى مش عارف أيه طارة أو حاجة زى كدا و مابيحتجش يتغير، لكن الصوت اللى ورا دا معناه أيه؟ لازم أغير التيل الخلفى كمان؟ و لا ايه الحكاية؟ أنا بجد محبط و خايف يكون الموضوع كبير، لأنى كنت فاكر غيرت التيل اللى فيه المشكلة و خلصت، لكن يظهر كنت غلطان :-(

ممكن حد من حضرات الأعضاء الكرام يفيدنى؟ أكون شاكر بجد
د/ مصطفى

[abokoko]

اخد 30 جنيه لمجرد تغيير التيل الامامى فقط
ومهانش عليه يبص على التيل الخلفي وينظفه على الاقل

سيبك منه واتعامل مع حد كويس تبقي زبونه الدائم

عموما حضرتك تروح لواحد يبص على التيل الخلفي ( طنبوره )
وينظفهم بالبنزين والهواء - وهو هيقول لك انهم عايزين يتغيروا ولا لسه فيهم



حضرتك غيرت التيل ب65 الامامى
ممكن صوره للعبه ان كانت معك
؟

[hobabmb2010]

اللادا مفيهاش تيل خلفي
بص على الاكس بتاع العجلة ممكن تكون البلية بايظة

[hesham fawzy h]

التيييييل لما يكووون بايظ بتسمع صوت سن السكاكين دة لما تدوس فرامل .. دة على اد علمى :)

بس انا مش عارف اللادا فيها تيل خلفى ولا ملهااااش ...

هو حوار سهل ان شاء الله متقلقش :)