المساعده في عداد بنزين لادا 2017

[dr_elzawey]

السلام عليكم ورحمه الله وبركاته
كل عام وانتم بخير
الحمد لله اشتريت لادا 2107
ولكن عداد البنزين اللي فيها مش شغال
وديتها للكهربائي وقالي العداد بايظ وعايز يتغييير
المشكلة ان العداد مش موجود منه جديد وكمان استيراد عندنا في اسيوط وكمان سألت عليه في بورسعيد مش موجود
مش عارف اعمل ايه
هل في عداد عربية تانية يركب عليها أو تابلوة عدادات يركب علي اللادا 2107
شكرا لكم لسعة صدركم

[velkouf]

عداد البنزين موجود جديد فى القاهرة عند حمدى لادا
ان شاء الله هحاول اعدى علية اسأل عن السعر

[dr_elzawey]

بارك الله فيك أخي
اكون شاكر لك
منتظر ردك أخي

[hotmail]

انا عندي عداد البنزين بتاع لادا 1500 موديل 1983 ينفع يتركب عندك وعندي ايضا كل العدادات الحرارة وغيرها

[dr_elzawey]

اخي في الله الكهربائي قالي مينفعش نركب عداد غير بتاع 2107

[hotmail]

نتمنى لك يا أخى كل التوفيق في أن تجد ما تريده

[dr_elzawey]

بارك الله فيك أخي
منتظرين رد الاخ velkouf

[Zing0]

موجود فى سوق التوفيقية داخل المول, و عند أولاد نصار , و فى المركز الروسى
بيتباع جديد طبعاً, كنت سألت على العداد المتعدد (بتاع الحرارة و البنزين فى 2105) و ده أغلى عداد لكل أنواع اللادا, بـ 150 ج, فغالباً ده أرخص بكتييييير.
و فيه ناس بتصلح العدادات دى, بس معرفش حد فى أسيوط

[hassanin_lada]

باشا انا من اسيوط

حضرتك انت متأكد ان العداد هو اللي بايظ ولا العوامة

عموما في واحد بيصلح عدادات جنب وحيد اللي عند مطعم كرم

وجرب اسال عن وحيد ممكن تلاقي جديد ومجدي الطلياني ورضا
مافيش اكتر من بتوع قطع غيار اللاد في اسيوط

وده رقمي لو عوزت اي حاجه
01000718729

[Zing0]

hassanin_lada

[hassanin_lada]

مأســـــــــــــــــــــــــــــــــاة

النهارده نزلت اعمل شوية شغل في العربية

فوجئة ان في قطع غيار اللي موجوده في السوق مضروبه وقطع غيار الادا بقيت صعبه شوية

وسالت علي عداد البنزين وحيد قالي مش هتلاقي غير استيراد عن محسن جوده اللي ورا قصر الثقافه

بس قبل ماتروحله

روح عند رضا (خلف السنتر الملابس) هو بيبقي عندو المستخبي

[dr_elzawey]

شكرا لكم جميعاً
شكرا لك أخي hassanin_lada
أخي انا ساكن جنب وحيد ومعندوش العداد وكمان الراجل اللي حضرتك بتتكلم عليه روحتله وقالي انا شغال في عداد السرعة بس
اخي جالي كهربائي تاني وقعد يشتغل في العداد وطلع العداد سليم وقالي العيب في العوامة ولما سألت عند وحيد ملقتهاش ولقيتها عند محل جنبي اسمه النجار وقالي ب 75 جنية

[hassanin_lada]

هي فعلا بالسعر ده

بس نصيحه مني

انا غيرت عومتين قبل كده وبردو بتبوظ

انا عندي عداد الرحلات كل تفويله بصفر وطبعا انا ببقي حاسب التفويله هتمشيني قد ايه

لما العداد بيوصل 300 بدخل افول حوالي 34 لتر (طبعا مش بستني لحد مالتنك يفضي)

والحمدلله مرتاح علي الوضع ده

لو مش عارف تحسب استهلاك

يبقي هتجرب مره انك لما تدخل تفول تصفر العداد وتمشي 100 كيلو (مشاويرك العادية يعني)

ولما تتم ال 100 تدخل تفول وتشوف هتاخد منك كام لتر

نفترض اخدت منك 12 لتر

يبقي تقسم ال 100علي ال 12 هيطلعلك ان التر الواحد هيمشيك 8.33 كيلو بالظبط

يبقي العربية لما تفولها تمشيك 280 كيلو تقريبا وهيتبقي حوالي 10 لتر في التنك

الاول هتستصعب الموضوع بس هو سهل خالص وعشان توفر كل شوية تمن العوامة اللي هتغيرها :)

وانا في الخدمه بردو لو عوزت اي حاجه

[dr_elzawey]

تمام أخي في الله
ان شاء الله امشي زيك في الموضوع دا
بارك الله فيك

[dr_elzawey]

سؤال اخي
عندي في الطابلوة ناحية باب السواق في مفتاح بيلف ثلاث لفات ومرسوم عليه رسمه زي شعاع نور
المفتاح دا بتاع ايه