استشارة عاجلة بخصوص لادا 1500 موديل 1975

[أسامة777]

السلام عليكم ،،
اخوانى وأصدقائى بالمنتدى اشكركم على نصايحكم اللى مش بتبخلوا بيها وجهودكم اللى بتقدموها
انا لسة عضو جديد بالمنتدى ولما شوفت امانتكم فى النصح وفى نفس الوقت خبرتكم حبيت اَخد رأيكم فى الموضوع ده
انا عاوز اشترى ـ باذن الله ـ عربية مستعملة بحد أقصى 15000 جنيه
وعمرى ما افهم حاجة فى العربيات من اى نوع ولا فى انواعها ولا فى الميكانيكا بتاعتها ولا السمكرة وحتى لسة متعلمتش السواقة بس الأسرة محتاجة عربية ضرورى جدا الأيام دى
وشوفت عربية لادا 1500 موديل 1975
بصراحة شكلها كويس نوعا ما وفرشها مقبول واستعمالها معقول
صاحبها طالب 15500 وقاللى ان كل اللى فيها ان فى كارتة فى المكنة محتاجة تتغير عشان بتعمل صوت لما المكنة تدور وان سعر الكارتة دى حوالى 300 جنيه والحاجة التانية انها عايزة تاخد وش نضافة لو انا عاوز
ايه رايكم فى كده وهل سعرها مناسب عالموديل القديم ده وايه موضوع الكارتة دى
ارجو سرعة الرد وألف شكر مقدما

[Abo_Mazen]

لأ ...خمستاشر ونص ..لأ ..كتير ..بص ..إبتدي معاه من تلاتاشر توصل معاه لتلاتشر ونص وأربعتاشر لو إنت غاوي ..خلي بالك وش النضافه ده بيفتح معاك في المصروف برضه ..لإن البوهيجي وهو بيلقط شغله بيلاقي برضه حتة بارومه هنا حتة مسوسه هنا ..فعشان كده يبىقى الكلام إن دي لسه فيها مصروف ..وبعدين كارتة إيه دي ياخويا اللي العربيه عايزاها ...بص ..قله غير إنت الكارته دي وإخصمها من السعر لما توصلوا سوا لإتفاق ..شوف كده وقلنا

[mossallem]

هو انا شايف ان الموديل قديم جدا جدا وانك هتعاني
واكيد هتحتاج مصاريف
والسعر غالي عليها
حاول تشوف ع الاقل 2105 تسعينات

[Zing0]

شوف حاجة غيرها بلاش العربية المعروضة دى

[أسامة777]

أنا روحت مع واحد صاحبى النهاردة واخدنا العربية وروحنا بيها لميكانيكى بس الدنيا كانت ليل والميكانيكى استخدم كشاف وبص عليها من ورا وقدام وصاحبى برده عمل نفس الكلام لانه بيفهم فى العربيات والميكانيكى وصاحبى رأيهم ان العربية حالتها العامة مش وحشة لكن فيها حاجتين : الكامة وحشة وعايزة تتغير (مع العلم ان انا مش عارف الكامة دى بتاعة ايه انا معرفش غير الكامة بتاعة الريسيفر بس فياريت حد يقوللى الكامة دى بتاعة ايه) والحاجة التانية انها عاوزة سمكرة ودوكو فى حدود 3000 جنيه ، فبالنسبة للكامة اتفقت مع صاحب العربية ان هو حيغيرها قبل ما اخد منه العربية ، وبالنسبة للسمكرة والدوكو مش مهم اعملهم دلوقتى ، وانا لاحظت ان المرايا بتاعة الباب اليمين مش موجودة ، وكمان العربية مفيهاش أى كماليات (لا زجاج كهرباء ولا سنتر لوك ولا مروحة ولا تكييف ولا جنوط .... إلخ) ، وصاحبى قال له ان العربية فيها برومة من برة من الجسم فرد عليه صاحب العربية وقاله لأ العربية مفيهاش أى برومة اللى فى الجسم ده معجون مفرقع لكن مش برومة وخبطله جامد على الصاج اللى تحت المعجون المفرقع عشان يبين له ان مفيهاش برومة
وأسئلتى هى :ـ
ـ (1) ـ إيه رأى أصدقائى فى المنتدى فى السعر اللى حاطه صاحب العربية ليها وهو 15500 جنيه ، بعد ما شرحتلكم حالتها (مع العلم احنا مبصناش على عدادات ولا مساحات ولا أرضية عشان الدنيا كانت ليل وممكن نعمل ده بكرة باذن الله) ، وممكن أوصل معاه لكام كسعر نهائى ليها .
ـ (2) ـ هى إيه العفشة بتاعة العربية دى : مكانها فين وفايدتها إيه فى العربية وأتأكد ازاى إذا كانت كويسة ولا لأ .
ـ (3) ـ هو قاللى انه مش هو مالك العربية وان الرخصة مش باسمه ، وانه معاه توكيل من المالك الأول للعربية اللى مات من فترة ، وان الرخصة لسة فيها سنة على ما تحتاج تتجدد وهو حيسافر فأرجو ـ رجاء حار جدا ـ ان إخوانى يشرحولى بالتفصيل الممل إيه الإجراءات المطلوبة عشان أنقل ملكية العربية ليا ، وايه اللى ححتاجه من اوراق واجراءات وفلوس .
وشكرا جزيلا ليكم

[أسامة777]

هو انا شايف ان الموديل قديم جدا جدا وانك هتعاني
واكيد هتحتاج مصاريف
والسعر غالي عليها
حاول تشوف ع الاقل 2105 تسعينات

شكرا لحضرتك
بس للأسف انا أخرى فى الفلوس 14 أو 15 ألف جنيه مينفعش يزيدوا ولا جنيه ، وده كمان بالمصاريف اللى حتحتاجها العربية
و 2105 دى مش حلاقيها فى الحدود دى

[أسامة777]

شوف حاجة غيرها بلاش العربية المعروضة دى

شكرا لحضرتك
بس انا بقالى فترة بدور والمبلغ اللى انا محدده (15000 جنيه) ميجيبش فى الغالب غير فيات 128 او 127 فكتير نصحونى أجيب لادا 1500 لانها اكبر وامتن رغم ان العربية اللى انا شوفتها دى موديل 1975 يعنى قديمة اوى بصراحة زى ما قال صديقى mossallem بس حعمل ايه مضطر مع العلم زى ما قولت فى بداية الموضوع انى مبعرفش اسوق ولا افهم حاجة فى العربيات خالص