لادا 2107 أم فيات تمبرا

[ALMOSTABAL]

السلام عليكم ورحمة الله وبركاته

اخوانى الأفاضل اعضاء المنتدى الكرام
اخوكم جديد فى المنتدى وجديد فى عالم السيارات كله وجديد فى السواقة كمان وحتاج مساعدتكم ضرورى
انا بأختصار مقبل على شراء سيارة استعمال فى حدود 30000 وطبعا كنت ناوى على لادا 2107 روسى انجكشن وبالفعل لقيت حجات كويسة موديل 2006 و2008 فى نفس الرنج بتاع المبلغ بس ليا اصدقاء بينصحونى اجيب فيات تمبرا وبصيت بصة على المعروض منها لقيت حجات موديل 92 و90 و 96 بحالات مختلفة
فأرجو منكم النصيحة لادا ام فيات تمبرا وأرجو من الأخوة الكرام الناصحين لى ان يقولو سبب فنى او من خبرتهم بالسيارة لترجيح احداهم على الأخرى
مع اخذ فى الأعتبار الأتى
1- انا جديد فى السواقة ودى حتكون اول عربية اركبها يعنى معرض لخبطات كتير فى الفترة الاولى من السواقة حسب ماأسمع
2- انا فى طريقى اليومى بمر على منطقة غير ممهدة وطبعا المطبات اللى زى الفل اللى بطول الطريق تقريبا فعايز حاجة تكون عفشتها كويسة جدا وتستحمل
3- تكون مش عايزها تعقدنى من العربيات والسواقة وكل شوية عند ميكانيكى بعمل حاجة وبصرف عليها يعنى اجيبها استعملها كام سنة كده وبعدها ابدأ احط ايدى فيها واصرف عليها

[أبو يحيى]

السلام عليكم
الأخ الفاضل أنا عندى لادا 2107 وأنا مقتنع بيها ممزيتها وعيوبها وعن تجربة وأنت ليك الاختيار
1 - المميزات
عربية جامدة وحمالة قسية ومناسبة لشوارعنا الحرير وعفشتها جامدة وبننحمل
سهلة الصيانة بالنسبة للميكانيكى وأى ميكانيكى بيفهم فيها لأنها على النظام القديم
اقتصادية فى استهلاك البنزين وبتمشى ببنزين 80 عادى
قطع غيارها رخيصة و متوفرة فى كل حتة زى ال 28 بالظبط

2 - العيوب
عايزة صيانة دورية واهتمام بالعفشة علشان موضوع ملص البيض ( يعنى بالبلدى كدة كل شهر أو شهرين لازم تروح للعفشجى عشان يبصلك عالعفشة ويربطها كويس )
دريكسيونها تقيل جدا وعايز واحد بيتدرب كمال أجسام فى دراعه
صوت موتورها خشن حبتين
الصالون بتاعها ضيق شوية
تصميمها قديم
يعنى أرجو أن أكون قد أفدت حضرتك ببعض المعلومات اللى أعرفها عن اللادا
وده بمنتهى الأمانة عن تجربة أما التمبرا فلم اجربها قبل كده
و كل عام وحضرتك بخير

[Abo_Mazen]

تمبرا طبعا ..حد يقارن مرسيدس الفيات باللادا؟؟؟؟!!!!

[ahmscu]

باختصار التمبرا عربيه مريحه نوعا ما ممكن تلاقى فيها تكيف وانعم فى السواقه وعفشتها كويسه مش وحشه وصيانتها قليله زى معظم العربيات الجديده بس عيبها ان قطع غيارها شحيحه حبتين وهتضطر تعتمد فى معظم قطع الغيار على الاستيراد وده انت وحظك فيه وطبعا مش الميكانيكيه يفهموا فيها على عكس الادا :صيانتها كتير ولازم ايدك فيها على طول وتكون فاهم ميكانيكا كويس لانها ممكن تعملها فيك فى الطريق على اتفه سبب وطبعا تقيله فى السواقه ووسائل الراحه تكاد تكون منعدمه بس يميزها قطع غيارها عند البقال وروسى اصلى جديد وصعب تتخم فيها وعندك حمدى لادا بتجيب منه الحاجه وانت مطمن وطبعا كل الميكانيكيه حافظينها وعفشتها مصممه زى النقل وتتحمل المشى فى الجبل ومشاكل العفشه اتحلت تماما