هام جدا بخصوص لادا 1500

[أسامة777]

السلام عليكم
لو سمحتم ياجماعة أنا لسة شارى عربية لادا 1500 مستعملة موديل 1975 ، ودى أول عربية اشتريها فى حياتى حتى انا لسة مبتدأ فى السواقة فكنت عاوز أعرف إيه الحاجات اللى بتتغير فى العربية لانى معرفش عنها حاجة :ـ
ـ 1 ـ يعنى الزيت والمياه وزيت الفرامل والفلاتر وكده ؟
ـ 2 ـ وإيه الفرق بين الزيوت (موبيل ـ شل .....) وإيه منهم المناسب لعربيتى ، صاحب العربية اللى اشتريتها منه قاللى انه كان بيحطلها زيت شل 3000 ؟
ـ 3 ـ وكمان إيه الفرق بين المياه (الزرقاء ـ الخضراء ـ الحمراء ....) وإيه منهم المناسب لعربيتى ؟
ـ 4 ـ هل فى مياه بتتغير للعربية غير مياه الرادياتير ؟
ـ 5 ـ إيه المكان اللى بغير فيه الزيت والمياه والفلاتر ... وكده ، هل بنزينة ولا ميكانيكى ولا فين ؟
ـ 6 ـ فى كبوت العربية فى علبة زيت الفرامل ولازق فيها علبة تانية شبهها ، هل دى برده علبة زيت فرامل يعنى لما اَجى أزود زيت الفرامل أزود العلبة التانية دى كمان ، ولا العلبة التانية دى بتاعة إيه ؟
ـ 7 ـ فرامل اليد ضعيفة ، أعمل فيها إيه ؟ ، وهل زيت الفرامل اللى بيتزود فى علبة زيت الفرامل اللى فى الكبوت دى ، هل الزيت ده خاص بفرامل العربية اللى هى الدواسة فقط ، ولا ليه علاقة برده بفرامل اليد ؟
ـ 8 ـ مش لاقى فى كبوت العربية عصاية مقاس الزيت ، قلبت عليها الكبوت مش لاقيها .
وأرجو الرد على النقاط دى بالترتيب زى ما انا كاتبها عشان مفيش حاجة منها تسقط من الرد
أرجو الإهتمام بالرد عليا ضرورى جداً بالله عليكم
وأعتذر عن الإطالة
وجزاكم اللهُ خيراً مقدماً

[sharkass]

بسم الله الرحمن الرحيم
انا اسف لعدم سرعة الرد على حضرتك لأنى بدخل المنتدى كل فين و فين .
بالنسبة للرد على استفسارات حضرتك مع العلم ان والدى الله يرحمه جايب العربية ديه من الزيرو :-
1- انا دائما بغير زيت 3000 موبيل لأنه تقيل ( لو صاحب العربية بيغير نوع تانى تقيل بردوا عادى جدا استعمله ) .
المياه انا بحطلها مياه خضراء 35 ج + علبه صفيح ابرو مانع للصدأ لونه اخضر و بغيرهم كل سنتين او لو حصل حاجة طارئة ( كوعة شقت أو افيز مش مربوط كويس و المياه نقصت ) .
زيت الفرامل اى نوع كويس وانا بزوده كل 3 شهور حاجة بسيطة جدا ( مع الكشف على التيل عند الميكانيكى و التأكد من عدم وجود ترشيح من أى عجلة سواء المستر العمومى أو المساتر الفرعية بكل عجلة او الخراطيم ).
الفلاتر هما 2 فتر بالعربية فلتر هواء ( باعلى الكرابتير ) و الثانى فلتر البنزين ( قبل طرمبة البنزين ) .
2- غير الزيت زى ما صاحب العربية معودها عليه شل 3000 كويس .
3 - المياه الخضراء ممتازه جدا جدا كع مراعاة التأكد من عدم وجود سدد فى الريداتير ( ممكن الكشف عليه عند صنايعى كويس يسلك الريداتير و تحط المياه الخضراء كما كتبت سابقا ) و المروحة 6 ريشة و انسى الحرارة.مش هتوصل لدرجة 90 .
4- لا توجد مياه اخرى بخلاف مياة الريداتير بس فيه مياه اخرى وهى خاصة بقربة المساحة لو شغالة .
5- بغير الزيت و الفلتر عند محلات تغيير الزيت , و المياه بتتزود بس من القربة و الفلاتر و البوجيهات و الفرامل عند الميكانيكى .
6-العلبة الثانية دى خاصة بماستر الدبرياج وهما فى العربية ديه 2 ماستر دبرياج واحد علوى كبير و اخر صغير قبل الفتيس لسهولة الضغط على الدبرياج وده بزوده كل 6 شهور تقريبا ( مع التأكد بعدم وجود ترشيح فى المواسير يتم التأكد من الميكانيكى ) .
7-فرامل اليد ليس لها علاقة بمستوى الزيت ليها واير ( سلك فرامل اليد ) يتم التقريط عليه لضبط مستواه عند 4 تكات بفرملة اليد ( اذا كان الميكانيكى شده على الأخر والفرامل ضعيفة يبقى لازم تغير تيل فرامل خلفى مع الكشف على الطنابير لو محتاجه تتغير هيه كمان و قبل تركيب تيل جديد نصيحة خلى الميكانيكى يرسل الطنابير إلى خراط كويس يساوى الطنابير زى بعض بالمللى لو هيه متاكلة كتتير يبقى غيرها احسن و هتنساها 5 سنوات على القل وممكن اكتر كمان .
8- مافيش عصايه ده مقياس موجود تحت البوجيهات على طول و متأشر عليه مستوى الزيت قليل او كثير .
مع الشكر

[sharkass]

كان فيه مشاركة تانيية لحضرتك و بتسال على العدادات فى التابلوه و بالأخص رقم 2 و فيه ثلاثة لمبات .
لمبة لفرامل اليد لما تكون مرفوعة بتنور ثابت لمدة 10 ثوانى ثم تبدا تنور و تطفى ( نوع من علامات التحذير ).
اما اللمبة الثانية فهى لمبة الشفاط ( عبارة عن دراع تحت الدركسيون العربية ناحية الشمال لما تشده عندما تكون العربية باردة بيساعد على عملية الدوراة ايام الشتاء و بيرفع من صوت الماتور شوية ( مثل العربيات الجديدة تعلى الماتور لمدة 1 دقيقة و تهدأ اوتوماتيك ) بس فعربيتك ترجع الدراع تانى لوضعه المبه تطفئ و العربية يرجع صوتها طبيعى .
اللمبة الثالثة خاصة بالدينامو تنمور عند البدا بالدوراة و تطفئ عند دوران المحرك ولو استمرت لا قدر الله يبقى كتاوت الدينمو اتحرك او السليكونات اتحرقت و بالتالى بينبهك ان فيه مشكلة فى شحن البطارية .
مع الشكر