لادا كالينا و خلاص هنبيعها قطع غيار

[Shaimaa osman]

اشترينا لادا كالينا من اربع سنوات
كانت استعمال مستشار
وللاسف ماكشفناش عليها كويس
اكتشفنا فيما بعد انها كانت داخلة ف رصيف و مرشوشة و مقالب
مفيش مرة مشينا بيها الا و اتقطرنا
و في يوم كانت مركونة لها كذا يوم زوجي فكر يدورها شوية علشان البطارية و بطلها و طلع البيت بعدها بشوية لقينا الجيران بيخبطو علينا العربية بتتحرق
و الكبوت كان بيولع
طبعا كل حاجة ساحت
زوجي قرر يصلحها و اشتري قطع الغيار المطلوبة من كل حتة
توكيل ، وكالة البلح ، حمدي لادا ، سيد نصار
ووقفت العربية علي ضفيرة الكهرباء
دخنا عليها ف كل مكان مالقيناهاش و لا حتي تتفصل مخصوص ولا في الوكالة
لدرجة فكرنا نستوردها من روسيا
جبنا اسمها من التوكيل و بدانا ندور اونلاين ماعرفناش نوصلها
وفي الاخر قررنا نبيعها قطع غيار
الي عنده لادا كالينا وعايز لها قطع غيار يتصل بزوجي
٠١٠٠٢٥٠١٣١١

[Ahmed emad has]

اعتقد ان حضرتك مش حتوصلي لحاجة بمحاولة بيعها قطع غيار .

اعتقد ان انا عندي حل افضل . حضرتك حولي تدوري علي اي ضفيرة لعربية تكون شبه العربيه دي وتحولي تعدلي الضفيرة لتتناسب مع اكبر قدر ممكن من العريية و تحولي تغيري الحاجات اللي مستحيل تمشي مع الضفيرة دي و تحاولي ان العربية تمشي ولو يوم واحد تبيعيها فيه باي تمن وخلاص .. الحل البديل ان حضرتك تدوري علي اي تاحر من تجار قطع الغيار في الحرفيين تديهالو علي بعض باي تمن

[Shaimaa osman]

اعتقد ان حضرتك مش حتوصلي لحاجة بمحاولة بيعها قطع غيار .

اعتقد ان انا عندي حل افضل . حضرتك حولي تدوري علي اي ضفيرة لعربية تكون شبه العربيه دي وتحولي تعدلي الضفيرة لتتناسب مع اكبر قدر ممكن من العريية و تحولي تغيري الحاجات اللي مستحيل تمشي مع الضفيرة دي و تحاولي ان العربية تمشي ولو يوم واحد تبيعيها فيه باي تمن وخلاص .. الحل البديل ان حضرتك تدوري علي اي تاحر من تجار قطع الغيار في الحرفيين تديهالو علي بعض باي تمن

ياريت كان ينفع
الكنترول بتاعها مش قابل اي ضفيرة اخري
حلها انها تتحول لنظام ميكانيكي مش كهربائي
يعني تبقي زي العربيات القديمة ١٣١ ، ١٢٧ ، ١٢٨
هيتصرف عليها كتير مقابل ان نخلص منها يعني خسارة من كل حتة

[medo_31]

فيه شركة الامين في التوفيقية اسالي هناك ممكن تلاقي وصاحبها راجل محترم

[walidzakzok]

مهو توكيل اللادا بيجيب عربيات سيئة ويدبس الناس فيها واخرها الجرانتا اللي هيا امتداد للكالينا

[ahmdmagdy]

اعتقد ان ممكن ضفيره الجرانتا تركب عليها

[fourseasons]

Genuine/Aftermarket auto spare parts catalog

جربى اللنك ده كده و بالتوفيق ان شاء الله

[ibnelfared]

النصابين والكدابين والحرامية كتيييير الحمد لله أنها جت فى الحديد حسبنى ةأستعوضى فلوسك عند ربنا

[ahmedelaraby]

الموضوع مش صعب بأذن الله
الضفيرة اللي فيها مشكلة ضفيرة العدادت والانوار والتابلوه ولا ضفيرة الموتور بتاعت الدوارة وكهربة الموتور
اولا : لو المشكله في ضفيرة الانوار والعدادات والكلام ده يبقى كهربائي بيفهم بيعملها كلها وبتتكلف حوالي 2000 ج بكل حاجة و العربية بتبقى زي الفل
ثانيا : لو المشكله في ضفيرة الموتور يبقى عندك كذا حل
اول حل : تجيبوا دفيرة جديدة من االوكيل او الاستيراد ( طبعا منفعش الحل ده بالنسبالك )
ثاني حل : (مكلف جدا) تجيب موتور كامل بالدفيرة بالكمبيوتر يتفك من على نص "من اسكندرية عشان هي اللي فيها تجار كتير لادا"
ثالث حل : (افضل حل وارخص حل) تلغي الكمبيوتر وتعملي ضفيرة عادية
ازاي وبكام : حضرتك حتشتري الاتي من اي حد بتاع استيراد
1-كربراتير لادا سمارة استيراد ( من 300 : 600 بعد الفصال)
2- فرن بتاع الكربراتير سمارة 250
3- اسبراتير اليكتروتي لادا سمارة استيراد ( من 200 : 400 بعد الفصال)
4- كارتة اليكتروني استيراد او جديدة سمارة برضو حوالي 200
الميكانيكي يفك المانفولد الانجيكشن بالمسطرة بتاعت الحساسات بالكنترول بالفيش بالاسبراتير (الحاجات دي متترميش هتبيعها وتكسب منها كمان)
تركب الفرن بالكربراتير بالاسبراتير الاليكتروني بالكارتة ويقسم كهربه العربية من جديد ودور العربية وشكرا
على فكرة كل مواتير اللادا الجر الامامي قطع غيارها واحد تقريبا بنسبة 90 %
المميزات والعيوب :
العيوب :
1- زيادة طفيفة في استهلاك البنزين
الانجيكشن استهلاكه حوالي 7 او 8 ليتر لكل 100 كم
الكربراتير بتاع السمارة اسهلاكه حوالي 8 او 10 ليتر لكل 100 كم وكمان تقدر تحط بنزين 80 براحتك (انا بقول بزيادة عشان الموتور بتاع الكالينا اكبر شوية من موتور السمارة)
2- احساسك ان العربية قديمة نوعا ما بيكون ميزة وعيب
3- هدور على قطع الغيار شوية او محتاج مشوار للاسكندرية
4- هتفقد اي كماليات اليكترونية معتمدة ع الكمبيوتر بتاع العربية زي عداد الرحلات شاشة كشف الاعطال السنتر اللي بيقفل لوحده بعد التحرك الخ
المميزات :
1- حليت مشكلتك الاساسية
2- مشاكل الكربراتير اقل كتير من مشاكل الانجيكشن
3- التكلفة قليلة بأعتبار انك تبيع قطع الغيار اللي خلعتها من العربية
4- سهولة الصيانة والاصلاح في حالة حدوث مشاكل لاقدر الله




اتمنى اكون قدرت اساعدك

[mohsal]

لو صاحبة الموضوع لسه في نفس المشكلة ياريت تبعتي تفاصيل اكتر عن الضفيرة وهل مطلوب كمان كارته العربية وانا باذن الله اساعدك تجبيهم من روسيا عن طريق اﻻنترنت