لادا جرانتا

[asmaa shauib]

السلام عليكم...
أنا كنت عاوزة أسأل على اللادا جرانتا ... في ظل الأسعار الحالية تعتبر خيار معقول بالنسبة للسعر... بس أنا متخوفة من كونها غير منتشرة...
هل أتوكل على الله و اجيبها ولا لأ ؟؟؟؟
مع العلم ان دي اول عربية هتكون بتاعتي و أنا سقت قبل كده على شاهين...
أهدافي خيار اقتصادي متين و مش مستعمل...

[scientist9508]

بسم الله الرحمن الرحيم

الزميله المحترمه

زرت بنفسى فرع شركة الأمل و الكائن فى شارع النزهه لمعاينة لادا جرانتا الروسى و النسخه المصرى أيضآ و التحدث من مندوبى المبيعات . . و هذه الإنطباعات التى خرجت بها

1 - بعد معاينة السياره و الجلوس بداخلها أجدها سياره متوسطه فى كل شىء . . المحرك . . الخامات . . الجمال

2 - أكثر ما يعيب السياره المحرك القديم و الضعيف . . . محرك 1600 cc و لا يخرج سوى 87 حصان فقط!!

3 - و دائمآ المحركات القديمه و الضعيفه تستهلك وقود كثير . . هذا المحرك يحتاج 7.2 لتر لكل 100 كم

4 - ثم يأتى العيب الأكبر وهو إضطرارك للتعامل مع الوكيل طول الوقت . . لأنه حتى الآن السياره لا توجد لها قطع غيار أصليه خارج الوكيل . . و ذلك يرجع لعدم إنتشارها و ضعف شعبيتها (إلى الآن)

5 - سيارة مثل إيمجراند 7 . . حتى عام 2013 كان بها كوارث و فضائح رهيبه . . و لكن مع إصرار الشركه على الإستماع بعنايه لكل مشاكل الملاك و حلها . . و الوكيل الناجح الذى يرغب فعلآ فى نجاح السياره . . تم حل كل المشاكل و أصبحت هذه السياره منتشره أكثر من اللانوس و الفيرنا . . . ليس معنى كلامى أنها أصبحت سيارة الأحلام . . بل أقصد أنها نجح فى الحفاظ على عملائها بل و زيادة عددهم أيضآ

6 - المعامله التى تتلقينها بعد شراؤك للسياره هى التى ستحدد رضاك عنها أو سخطك عليها . . و لا قيمة لسيارة الأحلام إن لم أجدك من يحل لها مشاكلها مهما كانت صغيره

أوجز فى كلمات قليله الرأى

لادا جرانتا إختيار متوسط . . و لكن ليس الآن . . ربما فى المستقبل عندما أستطيع أن أشترى قطع غيارها الأصليه و أذهب بها لميكانيكى محترف لتركيبها و صيانتها أو أو مركز خدمه معتمد لإجراء الصيانات الدوريه للسياره . . و عندها سيكون سعر إعادة البيع للسياره قد إرتفع و أصبح مناسب . . إن أى سياره صينى مخدومه جيدآ قد تكون إختيار أفضل من الجرانتا حاليآ لسهولة حل كل مشاكلها

هداك الله لأرشد أمرك و أقومه

السلام عليكم و رحمة الله وبركاته

[Polar Star]

الله عالتحليل والكلام ..الله يباركلك scientist9508

[ehabomar1987]

طيب انا ليا استفسار دلوقتى انه احسن المصرى ولا الروسى مع العلم المصرى 16 صباب والروسى 8
فيه ناس بتشكر فى المصرى علشان الموتور قوته احسن وناس تانية بتقول الروسى علشان تقفيله احسن من المصرى
وسمعت اشاعة كمان الفتيس بتاع العربية فيه عضة علشان الوير بتاع الدبرياج
حد معاه العربية يقدر يفيدنى بالمعلومات ديه كلها وعاوز اعرف عيوب العربية قبل مميزتها وحكم الاعضاء عليها

[Mohamed Desoky]

لى صديق معه العربيه دى وبيشتكى من التوكيل ومعاملته سيئه جدا ومصاريف العربيه وصيانتها داخل التوكيل كل 5 الاف كيلو والعربيه لسه جديده والشكوى المتكرره من العفشه واستهلاك البنزين وتكيف فاشل بلا قيمه وتغير تيل الفرامل والطنابير قبل 15 الف كيلو ؟ كده فى عيوب فى الجرانيتا وكمان توكيل الامل سمعته زفت فى زفت نصيحه خليك فى توكيل قوى منصور او غبور والعربيه اللى سعرها قريب من الجرانيتا الانفى شكل وفخامه واسم وتوكيل قوى وربنا يصلح حالك ؟

[wasta]

السلام عليكم

أنا لسه شارى العربيه يوم الخميس اللى فات يعنى من 4 ايام

شارى الروسى

مبدأيا بالنسبة لإستهلاك البنزين كويس موش عالى
والسيارة عضمها ناشف الحمد لله
وسعرها كويس نسبيا وسط أسعار دلوقتى
ثابتة على الطريق
عاليه عن الارض
العفشه بتاعتها حلوه موش وحشه ولا ناشفه ولا طريه

لكن العربيه بتسخن
القعده فيها موش مريحه لو لمسافات طويله
هى واسعه وملمومه
و موش صعبه فى السواقه زى اللانسر مثلا و البى واى دى كا حجم العربيه
تانك البنزين بيتفتح بالإيد
الروسى مفيهاش كاسيت
الازاز اللى ورا أوكر
الازاز اللى قدام مبينزلش للأخر
مبتجمعش بسرعه
مفيش سويتشات فى الأبواب - فى واحد بس بتاع السواق
لمبة الشنطة مبتنورش ألا ومفتاح السيارة موجودة فى الكونتاكت
الكراسى بترجع لورا ب بكر يعنى تقعود تلفها ع شان ترجع لورا
فيبر البيبان ردىء جدا
مفتاح النور عامل زى مفتاح تايمر المروحه بيتلف كده ناحية الشمال فى التابلوه

[Colin Chapman]

السلام عليكم

أنا لسه شارى العربيه يوم الخميس اللى فات يعنى من 4 ايام

شارى الروسى

مبدأيا بالنسبة لإستهلاك البنزين كويس موش عالى
والسيارة عضمها ناشف الحمد لله
وسعرها كويس نسبيا وسط أسعار دلوقتى
ثابتة على الطريق
عاليه عن الارض
العفشه بتاعتها حلوه موش وحشه ولا ناشفه ولا طريه

لكن العربيه بتسخن
القعده فيها موش مريحه لو لمسافات طويله
هى واسعه وملمومه
و موش صعبه فى السواقه زى اللانسر مثلا و البى واى دى كا حجم العربيه
تانك البنزين بيتفتح بالإيد
الروسى مفيهاش كاسيت
الازاز اللى ورا أوكر
الازاز اللى قدام مبينزلش للأخر
مبتجمعش بسرعه
مفيش سويتشات فى الأبواب - فى واحد بس بتاع السواق
لمبة الشنطة مبتنورش ألا ومفتاح السيارة موجودة فى الكونتاكت
الكراسى بترجع لورا ب بكر يعنى تقعود تلفها ع شان ترجع لورا
فيبر البيبان ردىء جدا
مفتاح النور عامل زى مفتاح تايمر المروحه بيتلف كده ناحية الشمال فى التابلوه

الف مليون مليار مبروك ربنا يعطيك خيرها ويكفيك شرها !! معاك موتور واحد كامة ولا اتنين كامة ؟!!

[medo_31]

العربية اختيار أمثل ومعايا بقالها سنة وراضي عنها تماما الرضا روسي.. المصري تزيد في الماتور وزجاج فاميه و2 ايرباج وسعرها تقريبا 112 موديل 2016

[Moh-Mansy]

طيب انهو الاحسن المصري ام الروسي و لا بلاش منها اساسا

[Mohamedatef17]

انا معايا العربية المصري الموتور ٢ كامة صوتو خشن شوية بس مش عالي العربية قوية سحبها جميل جدا عفشة ناعمة العربية ١٦ صباب الدبراج مش تقيل عربية ملهاش دعوة بلادا خالص .
العربية معايا من اكتر مت ٣ شهور العربية ممتازة علي الاقل افضل من اللانوس والفيرنا و الانفي
العربية راسية علي الطريق انا جربتها لحد سرعة ١٥٠ كم فرامل abs التيل بتعها بيتغير كل ١٢٠٠٠ كم
لو بتمشي في زحمة كتير
العربية الخمات من الداخل عدية مش مبهرة ولاكن عملية جدا
من الاخر هي عربية عملية و اقتصادية و علي فكرة قطع الغيار موجودة في التوفيقية عند اكتر من محل

[Mohamedatef17]

طيب انا ليا استفسار دلوقتى انه احسن المصرى ولا الروسى مع العلم المصرى 16 صباب والروسى 8
فيه ناس بتشكر فى المصرى علشان الموتور قوته احسن وناس تانية بتقول الروسى علشان تقفيله احسن من المصرى
وسمعت اشاعة كمان الفتيس بتاع العربية فيه عضة علشان الوير بتاع الدبرياج
حد معاه العربية يقدر يفيدنى بالمعلومات ديه كلها وعاوز اعرف عيوب العربية قبل مميزتها وحكم الاعضاء عليها

طيب انهو الاحسن المصري ام الروسي و لا بلاش منها اساسا

[Mohamedatef17]

المصري اعلي في الامكانيات و الموتور