ارجو الافادة بخصوص ماتور الادا

[ramyiar]

السلام علي اعضاء المنتدي الكرام
بعد التحية
انبارح و انا مسافرمن القاهرة الي الاسكندرية بسيارتي الادا 2007 موديل 1993 و قبل الوصول ب 50 كيلو سمعت صوت طخبيط في الماتور و العربية تقلت و بصيت لقيت لمبة الزيت بتنور رحت راكن و زوت زيت للماتور قلت يمكن يكون الزيت نقص علشان انا الماتور عندي خفيف و بياكل زيت بس بعد ما زوت الزيت بقا الحال كما هو علية و ملقتشي غير اني اسايس فيها لغاية ما اوصل الي الاسكندرية و هناك صضمني المكانيكي و قالي ال Bl تاكل و البساتم بتخبط و لازم عمرة . المشكلة اني كنت راجع القاهرة تاني يوم و معنديش لا وقت للماتور ولا فلوس والمكانيكي قلي لو رجعت بيها كدة ممكن الماتو يتكسر منك في الطريق
لقيت نفسي مزنوق في خانة اليك و معنديش اختيارات
اخترت المقامرة و الرجوع بيها علي حالتها و فعلن سايست فيها لغاية ما رجعنا جميعا بالسلامة بتوفيق من اللة
و اثبتت العربية دة بجد انها اصيلة و مرضيتشي تعمل حركة نقص معايا
اسف علي الاطالة بس سؤالي الان انا امام اختيارين الاول عمرة للماتور و الثاني ماتور استيراد و ارجو منكم النصيحة و الافادة عن افضل البدائل و عن الاسعار سواء للعمرة او استيراد و ياترا لو استيراد اجيب ابو كتينة كوتش علشان الصوت ولا حديد هلشان ميتقتعشي و انجكشن ولا كربداتير
سؤال اخير ياترا ممكن اجيبة جديد وياترا بكام
و شكرا لجميع الاعضاء

[H.ibrahim]

ده اثبات ان العربية الادا اصيلة فعلا و حمالة اسية كتير - انا واحد من الناس لا اثق فى موضوع عمرة الموتور نتيجة تجربتين سابقتين و افضل الاستيراد شرط ان يكون معاك ميكانيكى شاطر و على ضمانته هو شخصيا و بعد تجربة ( هذا رائى ) و انتظر باقى الخبراء بالمنتدى .

[VTEC]

انا رأيى العمره احسن
عشان ده بيبقى موتورك وانت عارف كل حاجه فيه
بس لازم يكون الميكانيكى شاطر عشان يعرف يجمع الموتور كويس

[mohamed2002]

عمرة عند ميكانيكي شاطر

[ramyiar]

شكرن ليكم جميعا علي الاهتمام و سرعة الرد
فعلان الموضوع محير علشان كدة انا حبيت اسمع خبرتكم بخصوص الموضوع دة
الراي الاول مع عمرة الماتور عشان الماتور الاستيراد مش مضمون و عامل زي البطيخة انتة و نصيبك
الراي التاني مع الماتور الاستيراد لان قطع الغيار اللزمة للعمرة الموجودة في السوق معظمها مضروبة غير ان الواحد مش ضامن الخراط ولا المكانيكي
بخصوص فرق التكلفة بين الاستيراد او العمرة فهو مش فارق معايا المهم الجودة علشان انا معنديش استعداد اصرف علي الماتور بعد كدة يفتح بقة تاني
معلش تعبكو معايا بس انا لسة شاري العربية من سبع شهور هي اول عربي بالنسبالي و كل شوية عمال اصرف عليها

[velkouf]

موتور استيراد عن تجربة
هو دة الكلام الصح
العمرة عمرها ما هترجع الموتور لحالتة 80%
لكن الموتور الاستيراد ممكن يبقى اعلى من 90% بس لازم ميكانيكى شاطر يختار الموتور الصح لان اللعب بقى كتير حتى فى الاستيراد بيجيبوا مواتير خلع ويبيعوها على انها استيراد
وربنا يوفقك للخير

[islambana]

ياجماعه انا مره سمعت ان الموتور الجديد ب6000 جنيها ممكن حد يتاكد من المعلومه دي علي فكره انا كنت قريها هنا في القسم

[ramyiar]

فعلان لو اي حد يعرف معلومات عن الماتور الجديد ياريت يفدنا

[ramyiar]

انا سالت في التوكيل علي العمرة الكملة و قالولي هتتكلف 3200 جنية
اية رايكم في التوكيل بي 3200 و برة التوكيل بي 2000
انتو مش شيفين ان الفرق كبير ولا الموضوع يستاهل الفرق دة
ياترا في حد عمل عمرة في التوكيل يقدر يفدنا

[lonedoctor]

ميكانيكى شاطر عنده ضمير احسن من التوكيل اكيد وقطع الغيار لو خايف تكون مغشوشة هاتها من التوكيل ووفر فرق اجرة اصلاح الموتور بس لو ينفع استيراد موتور موديل حديث انجكشن يبقى احسن من العمرة بكتير

[mohmdy]

السلام عليكم
انا عن تجربة العمرة افضل مع ميكانيكي شاطر يكون الماتور 90% ويكون انا عارف الماتور بتاعي وظروفة اة ومبخلتش علية وتمام وكلفني 1600 بس .
وعايز اوضح ان الماتور لما يتفتح انت وحظك ولازم تعملة صح ومتبخلش عليه وتقول لم وصدقني هيدليك علي الاقل 3 سنين مستريح . وللعلم ان الشمايس والبساتم لقيتها استندر والحمد لله . وكان الشغل كلة في الكرانك وطقم الشمبر والجوانات وجبت طرمبة زيت - وحنا بنقفل لقيت عمود الكام مبوش فجبت واحد استيراد 180 جنية . وبعد العمرة الحمد لله .
واسف للأطالة

[ramyiar]

شكرا ليكم جميعا
انا فعلن قررت اعمل عمرة و العربية دلوقتي عند المكانيكي بس واضح ان الموضوع هيفتح شوية
و ممكن يعدي 3000 علشان هغير حجات كتير في الماتور بالاضافة الي القنطرة علشان طلع فيها شرخ