مش لاقى عربيه لادا من غير عيوب

[bassoma]

السلام عليكم ورحمة الله
كنت اسال اخواتى هل فى ناس او تجار متخصصين فى بيع سيارات اللادا بالاسكندرية ويكونوا مصدر ثقة
وبدور على 2105 سنة95 او 1107 حتى 2002 و اقصد بالثقه طبعا ان العربيه تكون غير معيوبه والسعر غير مغالى فيه ....
انا تقريبا اتعقدت خلاص من كتر الفرجه على العربيات وكلها اما برومه منتشرة او ماتور عايز عامره ده غير كده السعر طبعا تحس ان هما بيبيعوا مرسيدس .

ولا يمكن وقت الشراء الان مش الموسم لان احنا فى الصيف ..


ده على الرغم من الاسعار فعلا نزلت فى السوق لكن فى ناس عايشه الوهم .....

واشكركم

[محمد جلال]

رائى انك تنزل سوق السيارات فى القاهرة ومع ان الاسكندرانيه بيعشقو اللادا وبصراحة كنت فاكر العملية عندكم اسهل وصعب انك تلاقى 2105 مو تسعينات ويبقى المحرك حالته ممتازة والمحرك امره سهل يا اما تغير المحرك او تعمله عمرة محترمة وكمان وانت بتشترى لازم تبص على الرفارف والعتب والابواب من تحت ومكان الاستبن والبارومة شئ عادى بس اهم حاجة تكون بعيد عن هيكل وقوايم العربية وخد معاك حد بيفهم فى العربيات واكيد هتلف وهتتعب شوية وبأذن الله ربنا هيوفقك وال 2105 لو حالتها كويسه مفيهاش بارومة وحالة المحرك كويسه تعمل بالكتير اوى 25000 جنيه واللى يقدر يفيدك العضو mohamed2002 كلمه على الخاص واتمنى لك التوفيق .

[medooo333]

عندك حق انا كمان باشترى لادا و مش لاقى حاجة سليمة واللى عربيتة سليمة بيغالى فى السعر قوى نصيحة حاول تشترى العربية من صاحبها و ليس من تاجر لان هم اللى بيغللو الاسعار و روح سوق القاهرة ومعاك خبير و خللى باللك من الورق و ابعد عن التجار واللى مش عاجبه السعر المناسب سيبك منه و خليهاله يشربها...........هههههههه

[thegoodhacker]

السوق دلوقتي اسعاره مضروبة بالنار عما كانت من سنة واحدة بس ....... يعني اللادا 2105 موديل 95 دي اللي سعرها حاليا ما يزيدش عن 25 الف كانت بتوصل الي 30 الف جنيه من سنة واحدة بس ..... فصعب فعلا حد يبيع عربية زي كده حالتها كويسة و يخسر فيها 5 الاف جنيه الا لو كان فعلا محتاج الفلوس لظروف طارئة ....
علي العموم زي ما الاخوة نصحوك ممكن تنزل سوق السيارات بالقاهرة و معاك صنايعي تثق فيه و ان شاء الله تلاقي حاجة كويسة ......

[M.ABDEEN]

بص يا باشا مدام فكرة المستعمل موجودة اذا فكرة ان في عيوب في العربية موجودة او لازم هتصرف عليها مش معقول موديل تسعينات ومفيهاش حاجة بس لازم تكون حريص لان في عيوب حتى لو اتصرف عليها مش هيجد جديد وكله طبعا على حسب امكانياتك وبالتوفيق

[bassoma]

اشكركم جميعا على الردود وكلكم عندكم حق وانا الحمد لله مش مستعجل بس اشكركم فعلا لان انتم صبرتونى شوية

[bassoma]

واشكرك الاستاذ تامر جلال على رده لى باهتمام وتفاصيل

[bassoma]

طب كنت عايز اعرف طبيعة الاسواق فى القاهرة واتعامل معاها ازاى لانى من الاسكندرية ؟؟؟؟

[a_sabeq]

على فكرة، أنا معايا 2105 روسي موتورها ناعم وكويسة جدا، وفعلا محدش بيبيع عربية زي كده مريحاه إلا لو كان فيها عيوب، لأن أنا بيجيلي ناس يشتروا ساعات ومش بارضى، ولا حتى أعرف لو بعتها هاتجيب كام.. ففكرة إنك هتشتري عربية من غير عيوب دي استحالة.. بس انت لما تشتري اشتري عربية تقدر بإمكاناتك تصلح العيوب اللي فيها.. بإمكاناتك المادية والوقتية.. مش المادية بس.. وربنا يوفقك