ارجو الافادة في احدى مشاكل اللادا

[mini]

لما بطفي العربية بلاقيها بتترج ( الموتور مش بيطفي على طول )

ارجو الافادة بسرعة و اعتقد انها مشكلة في الكهربة؟

[Bob2009]

انا كنت شوفت موضوع هنا فى المنتدى بس مش فاكره المهم كانو بيقوله انها مشكله كهرباء زياده فى الموتور

[islambana]

الظاهره دي اسمها hot spots كان الباشمهندس سبعاوي كاتب موضوع عنها ودي بتكون نتيجه
سخونه زايده
ضبط كهرباء
تكون رواسب علي البوجيهات
واحسن حل عشان ماتضايقكش المشكله دي لغايه ماتظبط عربيتك اول ما تعمل كده ادي العربيه غيار وارفع رجلك من علي الدبرياش هتلاقي الموتور وقف علي طول علشان الطاقه دي ماتقدرش تحرك العربيه

[lada2010]

الظاهرة دى اسمها اب فاير ودى نتيجة وجود كهرباء زيادة فى الموتور وغلبا لادا فيها عيب الكهرباء الزيادة نتيجة السخونية او عدم وجود مياة فى الربادتير او الاسبراتير مش مضبوط

[M.FOUAD]

كلام سليم كل اللي محتاجة انك تضبط الاسبراتير بس لو المشكلة دايمة اما لو بتظهر بعد سفر طويل بس او اليومين دول عشان الجو اللي احنا فية متعملش حاجة و لو انت من الناس اللي بيشدوا الشفاط و انت سايق يبقى نزلة بعد كدة

[a_sabeq]

في الأغلب عربيتك بتسخن أكتر من اللازم، وده نتيجة عدم ضبط الكهرباء، والحرارة الزيادة ممكن تسبب انحناء وش السلندر وتلف جوان وش لسلندر، والعربية مش بتبطل على طول لأن السخونة الزايدة بتتسبب في اشعال الوقود بعد إطفاء المحرك فمش بيكون محتاج بوجيهات تديه الشرارة فبتفضل العربية دايرة رغم انك قفلت المفتاح يعني فصلت الموبينة اللي بتغذي البوجيهات.. ده غلط جدا على العربية، وكمان غلط إنك عشان تبطلها تديها غيار وتسيب رجلك من على الدبرياج فجأة عشان تجبرها إنها تبطل، بس للأسف هو ده الحل المعروف.. حاول تحل المشكلة وتشوف إيه سبب السخونة الزايدة دي..

[velkouf]

المشكلة دى نفسها عندى فى العربية ومحتار فى الحل ميكانيكى قال ان المشكلة فى الكونتكت بيعلق
بس انا فصلت البوجيهات و البطارية و الموتور لسة داير
ومش مشكلة كهرباء زيادة لانى اخرت الكهربا على الاخر و نفس الكلام العربية موش راضية تبطل
الغريب ان المشكلة دى ما ظهرتش الا اليومين دول مع بداية الموجة الحارة
العربية طول ما انا ماشى المروحة شغالة على طول مع ان الردياتير سليم و مليان مياة
والاغرب اللى هيجننى ان الفرامل بتهرب لما العربية بتسخن اوى تبقى عاملة زى ما يكون فيها هوا تكارك علشان البدال يعلى
ولما تكون العربية تبرد الفرامل تبقى 10/10

أرجو الافادة و شكرا

[masrawy1441]

السلام عليكم
المشكله دى يا جماعه ظهرت معايا قبل كده فى عربيتى لادا 2105 كل اللى حصل ان انا كنت بدورها الصبح وشديت السخان علشان تسخن بسرعه وبعدين لما جيت امشى طبعا نزلت الشفاط او السخان حسب ما هو متعارف عليه وجيت ابطلها عملت فيا الموقف السخيف ده رحت للميكانيكى لقيت ان الشفاط كان معلق ومرجعش كله
اول ما ظبطه كل حاجه بقت طبيعية

[velkouf]

الحمد للة المشكلة اتحلت يا شباب
مشكلة الباك فاير دى سببها
1-كهربا زيادة و يتم الظبط عن طريق الاسبراتير
2- ظبط تاكيهات و السبب دة برضة قوى
3- كاتينة موش مظبوطة و دة الاحتمال الاكبر لما ظبطت الكاتينة المشكلة اتحلت و الحمد للة

[hassanmm]

المشكله سببها السخونة الزائدة, والدليل أنها تحدث عندما يكون الموتور ساخن فقط .

[x_gomgom]

شوف هو في بالفعل عده اسباب:
1- و دا الاكثر شيوعاً كهربا مش مظبوطه الاسبراتير مقدم غالبا و بيتظبط .
2- بالنسبه للحاله دي بتكون مش عايز اقول قليله بس ان شاء الله متكنش عندك شداد الكاتينه او السي ذات نفسه عايز يتظبط (اوقات بيتشد و معرفش ازاي ز بيتغير شداد).
و اوقات و دي بتحصل معايا العربيه بيجيلها الهس هس و دا بقي انت و عربيتك (انا ساعات بحس انها فيها عفريت)
و ارجو ان اكون افدت