قدامي عربية لادا 2015

[fido77777]

قدامي لادا 2105 موديل 1994 موتورها ما اتفتحش قبل كده عاملة 136000 كم ومش فيها بارومة وفيها حاجات كتير فابريقة
صاحبها اول يد كان بيعاملها معاملة محترمة واشتراها منه واحد تاني يد شدها ورشها من بره بس ومش فيها خبطات ظاهرة
الرش الجديد بس فيه جزء صغير مقشر
بس هو هيبيعها عشان محتاج فلوس

صاحب العربية الاصلي واللي باشتري منه معارف من بعيد
وطالب فيها 25000 نهائي عشان اللي صرفه عليها

ممكن اهل الخبرة يفيدوني
يا تري الموتور اللي ما اتفتحش ده حلو ولا وحش
يا تري هيحتاج يتفتح مثلا قريب ولا لو بيتعامل حلو هيمشي اكتر؟
والسعر يا تري مناسب؟
ويا تري العربية دي حلوة لو حد عنده زيها؟
وايه المصاريف اللي ممكن تحتاجها بعد كده؟

ولو فيه نصايح او اراء اضافية يبقي جزاكم الله كل خير

اسف علي الاسئلة الكتيرة بس ده لقلة الخبرة لانها هتكون اول عربية ليا

[Truman]

العربية غالبا 1200 مش كده, هى عموما حسب الوصف كويسة بس محتاج تكشف على حالة الموتور لإن كونه متفتحش مش معناه أن الموتور 100 100 و عموما 136000 كيلو أكيد الموتور هيحتاج طقم شنبر بالكتير عند 150000 - عسى أكون أفدك

[M.FOUAD]

العربية غالبا 1200 مش كده, هى عموما حسب الوصف كويسة بس محتاج تكشف على حالة الموتور لإن كونه متفتحش مش معناه أن الموتور 100 100 و عموما 136000 كيلو أكيد الموتور هيحتاج طقم شنبر بالكتير عند 150000 - عسى أكون أفدك

كلام سليم
لكن حسب حالتة فية ناس بتعمل طقم شنبر على 100 الف و فية ناس زي حالاتي كنت بايع عربيتي و عاملة 172 الف و كان لسة الموتور بحالتة هي حسب الاستخدام و المحافظة
بالنسبة للسعر فية ناس كثير طالبة في 95 25 و 26 الف فالسعر مش لقطة اوي الا لو انت ضامن العربية و مفيش فيها مصاريف و مستخسر تروح لحد تاني

[fido77777]

العربية غالبا 1200 مش كده, هى عموما حسب الوصف كويسة بس محتاج تكشف على حالة الموتور لإن كونه متفتحش مش معناه أن الموتور 100 100 و عموما 136000 كيلو أكيد الموتور هيحتاج طقم شنبر بالكتير عند 150000 - عسى أكون أفدك

جزاك اللي كل خير علي سرعة الرد والافادة

طب عندك فكرة سعر طقم الشنبر ده كام؟
وسعر العربية ممكن يوصل لكام؟

[fido77777]

كلام سليم:ta_clap[1]:
لكن حسب حالتة فية ناس بتعمل طقم شنبر على 100 الف و فية ناس زي حالاتي كنت بايع عربيتي و عاملة 172 الف و كان لسة الموتور بحالتة هي حسب الاستخدام و المحافظة
بالنسبة للسعر فية ناس كثير طالبة في 95 25 و 26 الف فالسعر مش لقطة اوي الا لو انت ضامن العربية و مفيش فيها مصاريف و مستخسر تروح لحد تاني

شكرا للرد والافادة جزاك الله كل خير

انا فعلا باحاول انزل بالسعر
اللي في تفكيري اني اوصلها لحد 22 بالكتير

فيا تري كده معقول

موضوع ضامن العربية ممكن بنسبة 75% لان صاحبها هيبقي وشي في وشه علي طول
فاظن مش هيغشني ويخسرني

[fido77777]

في انتظار مساعدة باقي اهل الخبرة في المنتدي

[M.FOUAD]

شكرا للرد والافادة جزاك الله كل خير

انا فعلا باحاول انزل بالسعر
اللي في تفكيري اني اوصلها لحد 22 بالكتير

فيا تري كده معقول

موضوع ضامن العربية ممكن بنسبة 75% لان صاحبها هيبقي وشي في وشه علي طول
فاظن مش هيغشني ويخسرني

طقم الشنبر بيتكلف في حدود 400 جنية لكن المشكلة انك ممكن ساعة ما تفتح الموتور لو خفيف تلاقي حاجة تانية غير طقم الشنبر فتبدا تصرف معاك
بالنسبة للسعر دة بالاتفاق انا بعت عربيتي ب 24 الف لكن مكانتش محناجة مصاريف نهائي

[fido77777]

طيب ممكن افرض فرض كده معاكم
افرض العربية طلع فيها حاجات محتاجة تتغير وتتظبط
ايه اكتر حاجات في العربية دي بتحتاج تغيير وتوضيب
والتكلفة بتاعتها كام؟

[M.FOUAD]

طيب ممكن افرض فرض كده معاكم
افرض العربية طلع فيها حاجات محتاجة تتغير وتتظبط
ايه اكتر حاجات في العربية دي بتحتاج تغيير وتوضيب
والتكلفة بتاعتها كام؟

اكثر حاجة طقم البيض و الكورونة بالنسبة للبيض حوالي 400 جنيةاما الكورونة معرفش معملتهاش قبل كدة

[fido77777]

شكرا ليك علي معلوماتك ومتابعتك وردودك اسريعة
في انتظار اي معلومات اخري من خبراء اللادا

[Truman]

اكثر حاجة طقم البيض و الكورونة بالنسبة للبيض حوالي 400 جنيةاما الكورونة معرفش معملتهاش قبل كدة

أعتقد أن الأكس كامل بالكرونة فى إسكندرية بيعمل من 1000 إلى 1200 جنيه بس ده حسب كلام واحد معرفة إسكندرانى و الحقيقة مش عارف السعر إيه فى عزبة شلبى بس أعتقد هيكون أغلى

[fido77777]

طب ايه رايكم في العربية عموما
هتكون اول عربية ليا وقلقاااااااااااان
من ناحية الكفاءة والاداء
غالبا استخدامي جوه البلد وسفر مرتين مثلا من اسكندرية للاهرة او لمطروح في الشهر

والاعطال وسهولة الصيانة وقطع الغيار

[M.FOUAD]

طب ايه رايكم في العربية عموما
هتكون اول عربية ليا وقلقاااااااااااان
من ناحية الكفاءة والاداء
غالبا استخدامي جوه البلد وسفر مرتين مثلا من اسكندرية للاهرة او لمطروح في الشهر

والاعطال وسهولة الصيانة وقطع الغيار

احسن عربية ممكن تشتريها بالسعر دة بينافسها بس في نفس السعر السويفت لكن كل واحدة ليها مميزاتها و عيوبها

[Truman]

طب ايه رايكم في العربية عموما
هتكون اول عربية ليا وقلقاااااااااااان
من ناحية الكفاءة والاداء
غالبا استخدامي جوه البلد وسفر مرتين مثلا من اسكندرية للاهرة او لمطروح في الشهر

والاعطال وسهولة الصيانة وقطع الغيار

العربية فى السفر ممتازة و هتروح بيك أى حتة مش هتقول لأ بس نصيحة متزودش عن 100 كيلو فى الساعة لإن تماسك العربية بيقل تدريجيا فوق السرعة دى
أما جوه البلد المشكلة اللى هتقابلك هى الركن فى الأماكن الزحمة علشان الدركسيون تقيل زى ما كل الناس عارفة بس أن أعتقد أن ال 2105 ال 1200 دى كانت نازلة بعلبة دريكسيون بعمود توجيه قصير و ده أخف كتير من القديم أبو عمود توجيه طويل (زى بتاعة 132) و لكن الموضوع ده مع الوقت هتتعود عليه و مش هتحس بيه
بالنسبة للأعطال طالما محافظ على العربية مش هتعطل بيك أبدا لكن لازم تراعى الأتى:
غير الزيت و فلتر الزيت فى مواعيده و يستحسن تستخدم زيت بيتغير كل فترة قصيرة و إستخدم فلاتر زيت نضيفة (بلاش ال Frame المصرى)
إستخدم بنزين 92 حيريح العربية جدا و هيخلى سحبها ممتاز و هتتجنب موضوع شوائب النزين و سد بيكات الكربراتير لأن أغلب المشاكل بتيجى من السكة دى
غير طقم البوجيهات مع الأبلاتين و الكوندنسر بالكتير كل 5000 كيلو بأنواع تكون كويسة (مش أرخص حاجة) هتضمن أن ميبقاش أى مشاكل فى الإشعال أو ادورة الكهرباء سواء فى الصيف و لا فى الشتا
إتعامل مع ميكانيى كويس يكون بيشتغل فى اللادا و ليه زبايين كتير بعملوا عنده عربياتهم اللادا لإن موتور اللادا مش زى ال 128 و ال 127 لازم يكون الميكانيكى بيفهم فيه و خلى بالك السر فى ظبط أداء موتور اللادا هو ظبط الأسبراتير مع الكربراتير بتاعها (متخليش أى حد يلعب فى الأسبراتير غير الميكانيكى بتاعها)
واظب على تشحيم بيض المقصات و كرسى النص فى عمود الكردان (أذا ماكانش راكب ليهم مشاحم دلوقتى ركب مشاحم) مع كل غسيل للعربية (يستحسن كل شهر) مع ربط العفشة قدام و ورا
مع كل غيار زيت إتأكد أن زيت الكرونة و الفتيس و الباكم (الفرامل) كامل مش ناقص و أن كان أى واحد فيهم ناقص زوده
كل فترة روح لحد كويس بتاع زبط زوايا عجل (يستحسن قبل كل سفرية طويلة) عشان يزبط زوايا لإن ده بيحفظ ثبات العربية على السرعات العالية و بيوفر فى تأكل الكوتش
متقلقش من عداد حرارة العربية فى الصيف بيوصل للنص و متعتبرش دى سخونة ده العادى للعربية اللى مش مواصفات خليجى بس كل سنة روح لحد كويس بتاع ردياتيرات و خليه ينضف الرادياتير و القربة
طبعا متزودش ميه أبدا سواء فى الرادياتير أو القربة إلا لما تكون العربية دايرة و خلى بالك من إن مستوى الميه فى القربة ميزدش عن الحزام الجلد الإسود الى رابط القربة فى العربية
حاول تغير الكوتش كل 40000 كيلو بالكتير
و إنت سايق حاول أنك تتجنب حفر البلاعات بالذات علشان تحافظ على بيض المقصات
بالنسبة لقطع الغيار هى موجودة فى كل حته (شارع دمشق - التوفيقية بالنسبة للجديد و عزبة شلبى للمستعمل)
بس قبل ماتشترى حاول تتدور على الروسى أو حاجة تكون أوروبية (بلاش الحاجات الصينى و التركى) بس حاول تتأكد فعلا أن القطع روسية أو أوروبية المنشا (مش موضوع سهل للأسف) و عموما قطع الغيار رخيصة جدا مقارنة بأى ماركة تانية (إكسيسوارات العربية اللى جوه هى اللى غالية و مش موجودة كتي فحاول تحافظ عليها بقدر الإمكان)

و باتوفيق أن شاء الله و أهلا بك عضو جديد فى نادى اللادا (اللادا 2105 - 2107 - 20104 على فكرة هى أنجح خامس عربية فى التاريخ إتصنع منها 12 مليون عربية لحد النهاردة و لسه بتتنتج)

[fido77777]

و باتوفيق أن شاء الله و أهلا بك عضو جديد فى نادى اللادا (اللادا 2105 - 2107 - 20104 على فكرة هى أنجح خامس عربية فى التاريخ إتصنع منها 12 مليون عربية لحد النهاردة و لسه بتتنتج)

حقيقي مش عارف اشكر حضرتك ازاي
بجد لو ربنا كرم بالعربية هاطبع البوست دي واعلقها كدليل استخدام

ولسه فيه كلام بالنسبة للسعر وتردد طبيعي في الشرا
بس انا من محبي اللادا لاني بافضل الاداء والكفاءة علي الشكل والكماليات
كفاية انها اكتر عربية صمدت مع مقاتلي التاكسيات في ارض المعارك المصرية
وربنا كريم


وشكرا لكل من شارك في الموضوع واتمني يكون الكلام مفيد لكل اللاداوية
وفي انتظار مساهمات باي معلومة ممكن تكون مفيدة