بيض الادا

[AANIS]

ايه يا جماعه موضوع بيض الادا ده
انا عرفت انو حاجه خطره وممكن يقلب العربيه
ارجو الافاده بمعلومات كامله عن الموضوع انا لسه ما اشتريتش وناو اشتري بعد العيد زيرو ن شاء الله بس فهموني موضع البيض مكانه في العربيه يعني ايه بيملص و امتي بيملص وازا ما يملصش وصيانته ازاي واطمن ازاي انه هوا بخير واعمله صيانه دوريه كل قد ايه

شكرا ليكو يا جماعه انا عارف ان انتو مش هتتأخرو في الرد عليا للفأده العامه
شكرا

[hazem_khidr]

بص يا استاذ انيس
هو عيب خطير دا لو مش بتعمل الصيانه اللازمه للعفشه يعني لو انت بتكشف علي العفشه كل 6 شهور و تشوف لو في بيض بايظ او لاء يبقي كده عمره ما حيملص منك ابدا
يبقي لو حتجيب لادا تعمل حسابك انك كل 6 شهور تروح للعفشجي ينزلك العفشه و يغسلهالك و يشحمهالك كويس و اهم حاجه تشحيم البيض لان طول ما البيضه فيها شحم عمرها ما حتملص ابدا منك.
و ربنا يستر طريقنا جميعا :)

[TAG_Turbo0]

كل ست شهور؟
انا كان معايا لادا 2105 روسى موديل 1982 كانت مع الحج و بعتها 2004 وعمر البيض ماملص
انا أول مرة أسمع عن الموضوع ده؟

[hazem_khidr]

بتبقي علي حسب الاستعمال يا ميدو باشا.
غير كده انا بقول للاحتياط يعني لو سبع شهور او تمانيه مش حيملصو بس انا بتكلم عن ان العربيه تبقي جاهزه في اي وقت و ما تعملش حركات نقص علي الطريق .

[ahmed1981]

راجع هذا الموضوع:
http://www.nilemotors.net/Forum/viewtopic.php?t=593

[SAMER_ENGINES]

شوف يا باشا و بمناسبة اني لسه مغير البيض في الـ 2105
العفشة الأمامية بتاعة اللادا دي قايمة علي بيض اسمه بيض العفشة و البيض ده بعد فترة من الشغل بيبوظ و يملص بمعني انه تلاقي العجلة واقعة تحت العربية كأنه كسر في الأكس او المقص و بكدة العربية مش ممكن هتتحرك من مكانها لازم تتشال بالونش زي الأوتوماتيك او الجديد و لتفادي الموضوع ده بيكون بالصيانة و التشحيم زي ما قالوا الزملاء بس ده لا يمنع انه لازم هيتغير بعد فترة طالت او قصرت و من اعراض مشكلة البيض انه الدركسيون يتقل و يبقي في صوت و انت بتاخد الملف تزييق كدة و بالنسبة انه يقلب العربية ده لو كنت بتجري و البيضة ملصت بس لو الصيانة تمام متخافش و غير كدة انت بتقول ناوي تشتري زيرو و اعتقد اني الـ 110 و الكالينا و الكلام ده مفيش في بيض و الـ 2107 فيها بيض بس تم حل المشكلة بتاعته بعمل تعديل بوضع شبكة تحت العربية و بكدة في حالة ملص البيض الشبكة دي بتشيل العربية لغاية ما تروح بيها لأقرب ميكانيكي او للتوكيل و الكلام ده مؤكد و تقدر تسأل أي حد.
فمتخافش و اتكل علي الله و مبروك مقدماً.

[meeezo333eg]

الـ 2107 فيها بيض بس تم حل المشكلة بتاعته بعمل تعديل بوضع شبكة تحت العربية و بكدة في حالة ملص البيض الشبكة دي بتشيل العربية لغاية ما تروح بيها لأقرب ميكانيكي او للتوكيل و الكلام ده مؤكد و تقدر تسأل أي حد.
فمتخافش و اتكل علي الله و مبروك مقدماً.

اول مرة اسمع موضوع الشبكة
ياريت حضرتك تشرحه اكتر و صور ليه ان امكن

[Mustafino]

أيوة يا ريت لو سمحت توضيح أكثر لموضوع الشبكة دة حيث أننى لم الاحظ شىء مثل هذا فى عربيتى ال 2107 رغم انها تعتبر حديثة (2005).

و شكراً جزيلاً و كل عام و كل مصر بخير.......

[SAMER_ENGINES]

الموضوع اني في حاجة شبه شبكة تعديل يعني في الـ 2107 الجديدة محطوطة تحت العفشة فلو حصل و البيض ملص زي ما بيقولوا الشبكة دي بترفع العفشة او بتسندها بصفة مؤقتة طبعا لحد ما توصل بيها لاقرب ميكانيكي او للتوكيل ولو قدرت اجيب لك صور حجيب لك.

[ahmed1981]

ولو قدرت اجيب لك صور حجيب لك.

في إنتظار الصورة

[H.ibrahim]

[color=#0033CC][mark=#33FF66]و انا كمان فى انتظار الصور - وهل تصلح للتركيب فى لادا 2105 ؟ - وماهو افضل نوع للبيض حيث ان السوق به عدة انواع و غير معروف النوع الجيد بينها ؟ وشكرا جزيلا .[/mark][/color]

[SAMER_ENGINES]

بجد ببحث عن صورة ليها و مش لاقي بس لو حصلت علي صورة اكيد حنشرها طالما الصورة مطلوبة كدة.

[islamnasser10]

انا يا جماعة معاية لادا 2105 موديل 18 وتلت يد وعمرى ما سمعت عندى عن بيضة ملصت انا مش عارف انتو بتعملو اية عشان تملص انا البيض شغال معاية كويس وعمره ما فقص ههههههه ولا سمعت عن الكلام دة معاية بسم الله مشاء الله مايحسد المال الا صحابه